သိုၵ်းမၢၼ်ႈလႄႈပလိၵ်ႈမၢၼ်ႈ ယိုဝ်းၵူၼ်းႁေႃႈလူတ်ႉၶိူင်ႈတၢႆၵေႃႉၼိုင်ႈ

ၵူၼ်းၼုမ်ႇၵေႃႉၼိုင်ႈ ႁေႃႈတင်းလူတ်ႉၶိူင်ႈသေ ၽႅဝ်ၵႂႃႇတီႈႁိမ်းလၢၼ်ႉၶၢႆၵုၼ်ႇၵူႈလွင်ႈလွင်ႈ ၼႂ်းပွၵ်ႉၵလၢတ်ႉၵူင်း ၸႄႈဝဵင်းၽႃၵၢၼ်ႉ မိူင်းၶၢင်ၼၼ်ႉ ထုၵ်ႇသိုၵ်းမၢၼ်ႈလႄႈပလိၵ်ႈမၢၼ်ႈ ဢဝ်ၵွင်ႈယိုဝ်းတူၵ်းလူတ်ႉတၢႆထင်တီႈ ၼႆယဝ်ႉ။

မိူဝ်ႈဝၼ်းထီႉ 2 October 2022 (လိူၼ်သိပ်းဢဵတ်းမႂ်ႇ 8 ၶမ်ႈ ပီႊတႆး 2116 ၼီႈ) ယၢမ်းၵၢင်ၶိုၼ်း 22:00 မူင်းပၢႆၼၼ်ႉ ၸုမ်းသိုၵ်းမၢၼ်ႈ လႄႈ ပလိၵ်ႈမၢၼ်ႈ ၵႂႃႇတင်ႈလၢၼ်ႇၵူတ်ႇထတ်း ၵူၼ်းၵႂႃႇမႃး တီႈၼႂ်းပွၵ်ႉၵလၢတ်ႉၵူင်း၊ ၽွင်းၼၼ်ႉ မီးၼုမ်ႇၸၢႆးၵေႃႉၼိုင်ႈ ဢႃႇယု 25 ပီႊ ႁေႃႈတင်းလူတ်ႉၶိူင်ႈသေ ၵူဝ်ၵူဝ်ႁႄႁႄ ဢမ်ႇႁတ်းၵိုတ်းပၼ်လူတ်ႉလႄႈ ထုၵ်ႇသိုၵ်းမၢၼ်ႈ တင်းပလိၵ်ႈမၢၼ်ႈ ဢဝ်ၵွင်ႈယိုဝ်းၸပ်းတၢႆထင်တီႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ “မိူဝ်ႈၵူႈပွၵ်ႈဢွင်ႈတီႈၼၼ်ႉဢမ်ႇမီးၽႂ် ၵႂႃႇပႂ်ႉၵူတ်ႇထတ်းသင်၊ ၶမ်ႈဝၼ်းထီႉ 2 ၼၼ်ႉသမ်ႉ သိုၵ်းမၢၼ်ႈလႄႈပလိၵ်ႈမၢၼ်ႈ ၵႂႃႇပႂ်ႉၼိူဝ်သဵၼ်ႈတၢင်းသေ ၸႅတ်ႇၵူၼ်းၵႂႃႇၵူၼ်းမႃး၊ ၵမ်းၼၼ်ႉ မွင်ႇမယၢၼ်ႇသၢႆးၵူႇ ဢႃႇယု 25 ပီႊ ၵူၼ်းၼႂ်းပွၵ်ႉၵူၺ်းၼင်ႇၵဝ်ႇ သမ်ႉႁေႃႈလူတ်ႉၶိူင်ႈၵႂႃႇၺႃး သိုၵ်းမၢၼ်ႈလႄႈပလိၵ်ႈမၢၼ်ႈ ၶဝ်ၸႂ်ႉႁႂ်ႈမၼ်းၵိုတ်းလူတ်ႉ မၼ်းသမ်ႉၵူဝ်လႄႈဢမ်ႇၵိုတ်း ၶီႇပူၼ်ႉၵႂႃႇပႅတ်ႇသေ ထုၵ်ႇၺႃးယိုဝ်းၸိူင်ႉၼၼ်” ဝႃႈၼႆ။

ပေႃႈမႄႈပီႈၼွင်ႉ မွင်ႇမယၢၼ်ႇသၢႆးၵူႇ ဢွၼ်ၵၼ်ၵႂႃႇတူၺ်းၶၢပ်ႈတူဝ်မၼ်းၸၢႆး တီႈႁူင်းယႃသေတႃႉ ၶၢပ်ႈတူဝ်မၼ်းၸၢႆးၼၼ်ႉ ဢမ်ႇမီးတီႈႁူင်းယႃယဝ်ႉလႄႈ ထုၵ်ႇသိုၵ်းမၢၼ်ႈတင်းပလိၵ်ႈမၢၼ်ႈ ၵႂႃႇဢဝ်ပႅတ်ႈဢွၼ်တၢင်းယဝ်ႉဝႃႈၼႆ။

တႆးလွတ်ႈလႅဝ်း

ၶေႃႈမုၼ်းတီႈ − Kachinwaves