သိုၵ်းမၢၼ်ႈဢမ်ႇၸၢင်ႈပၼ်ၾႆးၾႃႉတူဝ်ႈတင်းမိူင်း

မိူဝ်ႈဝႃးဝၼ်းထီႉ 7 January 2025 ၽူႈမီးပုၼ်ႈၽွၼ်းၽၢႆႇၾႆးၾႃႉမိူင်းႁူမ်ႈတုမ် ၸတ်းႁဵတ်းပၢင်ၵုမ်ၵၼ်တီႈၼိုင်ႈသေ ၼႂ်းၼၼ်ႉ ၸွမ်ႁၢၼ် တိၼ်ႇဢွင်ႇၸၢၼ်း ႁူဝ်ပဝ်ႈၵေႃႇမသျိၼ်ႇၽၢႆႇၾႆးၾႃႉ လၢတ်ႈၵႂႃႇဝႃႈ−

“လွင်ႈဢမ်ႇပၼ်ၾႆးၾႃႉလႆႈ တူဝ်ႈတင်းမိူင်းၼၼ်ႉ ယွၼ်ႉၽေးသၽဝႃႉ ၼမ်ႉၼွင်းထူမ်ႈလႄႈ ႁဵတ်းႁႂ်ႈထူပ်းတၢင်းယၢပ်ႇ ၵၢၼ်ဢိတ်ႇဢွၵ်ႇၾႆးၾႃႉ၊ ထႅင်ႈလွင်ႈၼိုင်ႈ ဢွင်ႈတီႈၵဵပ်းၾႆးၾႃႉ၊ လၵ်းသဝ်ၾႆးၾႃႉ ထုၵ်ႇယႃႉၵွႆလႄႈ ႁဵတ်းႁႂ်ႈမီးလွင်ႈယၢပ်ႇ တႃႇသူင်ႇၾႆးၾႃႉဢွၵ်ႇ၊ ယွၼ်ႉလွင်ႈၶွင်ႉၶမ်လၢႆလၢႆလွင်ႈ လႄႈ ဢမ်ႇၸၢင်ႈဢိတ်ႇဢွၵ်ႇလႆႈၾႆးၾႃႉ တဵမ်တဵမ်ထူၼ်ႈထူၼ်ႈ” ဝႃႈၼႆ။

ၵူၼ်းမိူင်းတူၼ်ႈတီးလၢတ်ႈၼႄဝႃႈ တင်ႈတႄႇဢဝ်ဝၼ်းထီႉ 1 January 2025 ၼႆႉမႃး ၵၢၼ်ၸႂ်ႉၾႆးၾႃႉတေႃႇဝၼ်းၼႆႉ ပေႃးၵၢင်ဝၼ်းၼႆ ၸုမ်းသိုၵ်းမၢၼ်ႈ ပွႆႇပၼ်ၵူၼ်းမိူင်း ၸႂ်ႉၾႆးၾႃႉ မွၵ်ႈ 1 ၸူဝ်ႈမူင်းၵူၺ်းလႄႈ ပေႃးၶၢဝ်းပိူၼ်ႈလပ်းပိူၼ်ႈ ၼွၼ်းသမ်ႉ ၸင်ႇပွႆႇမႃးထႅင်ႈပွၵ်ႈၼိုင်ႈ၊ ပေႃးၾႃႉပၢင်ႇမိူင်းလႅင်းမႃးၵေႃႈ မွတ်ႇၶိုၼ်းယဝ်ႉ၊ ၾႆးၾႃႉ ဢၼ်ပွႆႇပၼ်ၵူၼ်းမိူင်းၸႂ်ႉၼၼ်ႉၵေႃႈ ဢမ်ႇႁႅင်းသင်၊ သၢင်းမၢၵ်ႇထၢတ်ႈၵေႃႈဢမ်ႇလႆႈ (ပႃႇဝႃႇပႅင်ႉ၊ ပႅတ်ႇထရီႇ)၊ ဢိၼ်ပႃႇတႃႇၵေႃႈ ၵွႆၸွမ်းလုၵ်ႈၼိုင်ႈယဝ်ႉ၊  ၵၢင်ၶမ်ႈၵေႃႈလုၵ်ႈဢွၼ်ႇဢမ်ႇၸၢင်ႈတူၺ်းလိၵ်ႈလီလီ၊ ၸဝ်ႈႁူင်းၵၢၼ် ဢၼ်ၸႂ်ႉၾႆးၾႃႉၼၼ်ႉၵေႃႈ ထူပ်းလွင်ႈယၢပ်ႇၽိုတ်ႇမိူၼ်ၵၼ် ဝႃႈၼႆ။

ၼင်ႇႁိုဝ်ပေႃးတေၸၢင်ႈဢိတ်ႇဢွၵ်ႇလႆႈၾႆးၾႃႉထႅင်ႈၼၼ်ႉ ၸွမ်ၸိၵ်းသိုၵ်း မိၼ်းဢွင်ႇလၢႆႇ ၸီႉသင်ႇႁႂ်ႈၶူင်သၢင်ႈတီႈ မႄႈၼမ်ႉၵဵဝ် (ဢေႇယႃႇဝတီႇ) လႄႈ တိူဝ်းတမ်းဝၢင်းဝႆႉပႃး ၵၢၼ်ႁူမ်ႇလူမ်ႈ ၼႂ်းပိုၼ်ႉတီႈ ၼႆယူႇယဝ်ႉ။

တႆးလွတ်ႈလႅဝ်း