သိုၵ်းမၢၼ်ႈဢဝ်ၾႆးၽဝ်ႁိူၼ်းၵူၼ်းမိူင်း

မိူဝ်ႈဝၼ်းထီႉ 5 January 2025 (လိူၼ်ၵမ်မႂ်ႇ 7 ၶမ်ႈ ပီႊတႆး 2119 ၼီႈ) ယၢမ်းၵၢင်ဝၼ်း မွၵ်ႈ 11:00 မူင်း ၸုမ်းသိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ လုမ်းၽၢႆႇၽုၵ်ႇသွမ်ႈ ၸႄႈဝဵင်းယိၼ်းမႃႇပိၼ်ႇ တိူင်းၸႄႈၵႅင်းၼၼ်ႉ ဢဝ်ၾႆးၸုတ်ႇႁိူၼ်းၵူၼ်းမိူင်း ဝႃႈၼႆ။

ၸွမ်းၼင်ႇသိုဝ်ႇၶၢဝ်ႇ Khit Thit Media ဢွၵ်ႇဝႆႉဝႃႈ သိုၵ်းမၢၼ်ႈၸုမ်းၼႆႉ ၶဝ်ႈၵႂႃႇတီႈၼႂ်းဝၢၼ်ႈမဵဝ်ႉတိတ်ႉ ၸႄႈဝဵင်းယိၼ်းမႃႇပိၼ်ႇသေ ဢဝ်ၾႆးၸုတ်ႇ ၽဝ်ပႅတ်ႈ ႁိူၼ်းၵူၼ်းမိူင်း 2 လင်၊ တီႈၵဵပ်းၶဝ်ႈသၢၼ် လႄႈ တီႈၵဵပ်းၶူဝ်းၶွင် ႁူမ်ႈပဵၼ် 4 လင်၊ ၸၢၵ်ႈထႆ 1 လမ်း၊ လူတ်ႉၶိူင်ႈ 1 လမ်း၊ လူတ်ႉထိပ်ႇ 2 လမ်း လႄႈ ၶူဝ်းၶွင်ၵူၼ်းမိူင်းထႅင်ႈလၢႆလၢႆလွင်ႈ ၼႆယဝ်ႉ။

မိူဝ်ႈဝၼ်းထီႉ 3 January 2025 ယၢမ်းၵၢင်ၶိုၼ်းၼၼ်ႉၵေႃႈ ၸုမ်းသိုၵ်းမၢၼ်ႈ ယိုဝ်းမၢၵ်ႇလူင် 120 MM ၶဝ်ႈၵႂႃႇတီႈၼႂ်းဝၢၼ်ႈၵျွၵ်ႉမေႃႇ ၸႄႈဝဵင်းယိၼ်းမႃႇပိၼ်ႇ သေ ၸၢၵ်ႇမၢၵ်ႇတႅၵ်ႇတိူဝ်ႉၸပ်းၺႃးၵူၼ်းမိူင်း 4 ၵေႃႉ ၼႆယူႇယဝ်ႉ။

တႆးလွတ်ႈလႅဝ်း