သိုၵ်းမၢၼ်ႈႁူမ်ႈပျီႇတုၸိတ်ႉ လေႃႇတိုၵ်း RCSS/SSA လႄႈ ၽၢႆႇၽူႈၶဵၼ်လူႉတၢႆ 5 ၵေႃႉ

မိူဝ်ႈဝႃးဝၼ်းထီႉ 19 September 2024 (လိူၼ်သိပ်းလွင်ႈ 2 ၶမ်ႈ ပီႊတႆး 2118 ၼီႈ) ၶၢဝ်းယၢမ်း ၵၢင်ဝၼ်း 11:00 မူင်း ထိုင် 11:35 မူင်းၼၼ်ႉ ၸုမ်းသိုၵ်းမၢၼ်ႈ ႁူမ်ႈတင်းပျီႇတုၸိတ်ႉ ဢဵၼ်ႁႅင်းမွၵ်ႈ 100 ၵေႃႉ တင်ႈၸႂ်ၽႅၼ်ၶဝ်ႈလေႃႇတိုၵ်းတပ်ႉသိုၵ်းၸိုင်ႈတႆး RCSS/SSA ဢၼ်တူင်ႉၼိုင်ပၵ်းသဝ်းဝႆႉ တီႈႁိမ်းဝၢၼ်ႈယၢင်းၶမ်း ၸႄႈဝဵင်းမိူင်းပဵင်း ၸိုင်ႈတႆးပွတ်းဢွၵ်ႇ ၼႆယဝ်ႉ။

ပၢင်တိုၵ်းပဵၼ်ႁိုင်မွၵ်ႈ 30 မၼိတ်ႉပၢႆ ၽၢႆႇတၢင်းသိုၵ်းမၢၼ်ႈ လႄႈပျီႇတုၸိတ်ႇၶဝ် ထွႆဢွၵ်ႇပၢင်တိုၵ်းၵႂႃႇသေ ဝၢႆးသဵင်ၵွင်ႈၵၢင်ႇယဵၼ်ယဝ်ႉၵေႃႈ ၽၢႆႇတၢင်းတပ်ႉသိုၵ်းၸိုင်ႈတႆး RCSS/SSA ၶဝ်ၵူတ်ႇထတ်းပိုၼ်ႉတီႈပဵၼ်ပၢင်တိုၵ်းသေ ထူပ်းႁၼ်တူဝ်တၢႆသိုၵ်းမၢၼ်ႈ 1 ၵေႃႉ၊ ပျီႇတုၸိတ်ႉ 4 ၵေႃႉ လႄႈသိမ်းလႆႈၵွင်ႈၵၢင်ႇ မၢၵ်ႇမိုဝ်ႉၸိုၼ်းယၢမ်းၶဝ်ၵမ်ႈၽွင်ႈ၊ ၽၢႆႇတပ်ႉသိုၵ်းၸိုင်ႈတႆးတႄႉလွတ်ႈၽေး ဢမ်ႇမီးလွင်ႈတုမ်ႉတိူဝ်ႉမၢတ်ႇၸဵပ်းသင်။

ၼႂ်းပိုၼ်ႉတီႈၸႄႈဝဵင်းမိူင်းပဵင်းၼႆႉ ၽၢႆႇတပ်ႉသိုၵ်းၸိုင်ႈတႆး RCSS/SSA တိုၼ်းတူင်ႉၼိုင်ပၵ်းသဝ်းဝႆႉတၢင်းၼမ်လႄႈ ဢၼ်လႆႈပဵၼ်ပၢင်တိုၵ်းပွၵ်ႈၼႆႉ ပဵၼ်ၽၢႆႇသိုၵ်းမၢၼ်ႈတင်း ပျီႇတုၸိတ်ႉ ၶဝ်ႈလေႃႇတိုၵ်းဢွၼ်တၢင်း လႄႈၸင်ႇလႆႈပဵၼ်ပၢင်တိုၵ်း ၼႆယဝ်ႉ။

တႆးလွတ်ႈလႅဝ်း