သိုၵ်းမၢၼ်ႈႁၢင်ႈႁႅၼ်းၸတ်းႁဵတ်းပၢင်လိူၵ်ႈတင်ႈ ၼႂ်းပီႊ 2025

ၼႂ်းပီႊ 2025 ဢၼ်တေထိုင်ၼႆႉ ၸုမ်းသိုၵ်းမၢၼ်ႈယိုတ်းမိူင်း ႁၢင်ႈႁႅၼ်းတေၸတ်းႁဵတ်းပၢင်လိူၵ်ႈတင်ႈ လႄႈ တေတႄႇၵဵပ်းသၢႆမၢႆ ၵူၼ်းမိူင်းႁူမ်ႈတုမ် ၼႂ်းလိူၼ် October 2024 ၼႆႉ ဝႃႈၼႆ။

မိူဝ်ႈဝၼ်းထီႉ 15 June 2024 (လိူၼ်ၸဵတ်းမႂ်ႇ 9 ၶမ်ႈ ပီႊတႆး 2118 ၼီႈ) ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ ၵႂႃႇတီႈဝဵင်းမဵၵ်ႉထီႉလႃႇ ႁူပ်ႉထူပ်း ၶႃႈႁၢပ်ႇၵၢၼ်ၶုၼ် လႄႈ ၽူႈၵဵဝ်ႇၶွင်ႈလၢႆလၢႆႁွင်ႈၵၢၼ်သေ လၢတ်ႈၵႂႃႇဝႃႈ ၼႂ်းပီႊ 2025 ဢၼ်တေထိုင်ၼႆႉ တေၸတ်းႁဵတ်းပၢင်လိူၵ်ႈတင်ႈ၊ ၼင်ႇႁိုဝ်ပေႃးတေပဵၼ် ၸတ်းႁဵတ်းပၢင်လိူၵ်ႈတင်ႈၼၼ်ႉၵေႃႈ လူဝ်ႇလႆႈတႄႇၵဵပ်းသၢႆမၢႆၵူၼ်းမိူင်းၵႂႃႇယဝ်ႉ ဝႃႈၼႆ။

မိူဝ်ႈပၢင်လိူၵ်ႈတင်ႈ ပီႊ 2020 ၸုမ်းပႃႇတီႇၼူၵ်ႉယုင်း NLD ဢၼ်မီး တေႃႇဢွင်ႇသၢၼ်းသုၵျီႇ ဢွၼ်ႁူဝ်ဝႆႉၼၼ်ႉ ဢွင်ႇပႄႉပၢင်လိူၵ်ႈတင်ႈ လႄႈ ၸုမ်းသိုၵ်းမၢၼ်ႈၶိုၼ်းၵၢဝ်ႇၼႄးဝႃႈ ထူပ်းႁၼ်ၶႅပ်းၵၢင်ၸႂ် ဢၼ်ဢမ်ႇၸွမ်းပၵ်းပိူင် ပၢင်လိူၵ်ႈတင်ႈၼႆသေ ၶိုၼ်းယိုတ်းဢၢမ်းၼၢတ်ႈၸိုင်ႈမိူင်းမႃး ၶၢဝ်းတၢင်း 3 ပီႊပၢႆ ႁၢၼ်ႉတေႃႇယၢမ်းလဵဝ်၊ ၽူႈဢွၼ်ႁူဝ်ၸၼ်ႉသုင် ၼႂ်းပႃႇတီႇၼူၵ်ႉယုင်း NLD ၵေႃႈ လႆႈတူၵ်းၶွၵ်ႈတင်းၼမ်တင်းလၢႆ ပႃးၸဵမ်ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸုၵျီႇ လႄႈ ၸွမ်ၸိုင်ႈ ဢူးဝိၼ်းမျိၼ်ႉ ယူႇယဝ်ႉ။

ၵူၼ်းထတ်းသၢင်ႈၵၢၼ်မိူင်းၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇ RFA ဝႃႈ ၽွင်းယၢမ်းမိူဝ်ႈလဵဝ်ၼႆႉ ၼႂ်းမိူင်းလၢႆလၢႆပိုၼ်ႉတီႈ ပဵၼ်ပၢင်တိုၵ်းႁၢဝ်ႈႁၢဝ်ႈႁႅင်းႁႅင်း ယူႇလႄႈ တွၼ်ႈတႃႇတေၸတ်းႁဵတ်းပၢင်လိူၵ်ႈတင်ႈၼၼ်ႉ ဢမ်ႇပဵၼ်လႆႈ ဝႃႈၼႆ။

တၢင်းၽၢႆႇၸုမ်း PDF ဢၼ်ယူႇၽၢႆႇတႂ်ႈၵုမ်းၵမ် လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG လႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းမၢင်ၸုမ်း ပိုၼ်ၽၢဝ်ႇဝႆႉဝႃႈ သိုၵ်းမၢၼ်ႈဢထမ်ႇမယိုတ်းဢဝ်ဝၢၼ်ႈမိူင်း လႄႈ လွင်ႈပၢင်လိူၵ်ႈတင်ႈၼၼ်ႉၵေႃႈ တေဢမ်ႇပၼ်ပဵၼ်ၸတ်းႁဵတ်းၼႂ်းပိုၼ်ႉတီႈ ဝႃႈၼႆ။

မိူဝ်ႈပီႊ 2023 ၼၼ်ႉၵေႃႈ သိုၵ်းမၢၼ်ႈပိုၼ်ၽၢဝ်ႇဝႃႈ တေၸတ်းႁဵတ်းပၢင်လိူၵ်ႈတင်ႈ လႄႈ  ၼႂ်းၶၢဝ်းတၢင်း 60 ဝၼ်း ၸုမ်းပႃႇတီႇၵၢၼ်မိူင်း ႁႂ်ႈသူင်ႇၸိုဝ်ႈသဵင်ၸုမ်းပႃႇတီႇ တႃႇၶဝ်ႈၶႄႉၶဵင်ႇပၢင်ႇလိူၵ်ႈတင်ႈဝႃႈၼႆသေတႃႉ ဢမ်ႇပဵၼ်ၸတ်းႁဵတ်း။

တႆးလွတ်ႈလႅဝ်း