သိုၵ်းမၢၼ်ႈ တီႉၺွပ်းၽူႈၸတ်းၵၢၼ်ၶွမ်ႇပၼီႇၶၢႆၶူဝ်းၵုၼ်ႇၵျႃႇပၢၼ်ႇ

သိုၵ်းမၢၼ်ႈ ဢဝ်လွင်ႈတၢင်းၶိုၼ်ႈၵႃႈၶၼ်ၶဝ်ႈသၢၼ်ၼႆသေ ၶဝ်ႈတီႉၺွပ်း ၽူႈၸတ်းၵၢၼ်ၶွမ်ႇပၼီႇၶၢႆၶူဝ်းၵုၼ်ႇၵျႃႇပၢၼ်ႇ ဢိၵ်ႇတင်း ၵူၼ်းဢၼ်မီးလွင်ႈထၢင်ႇထိူမ်ထႅင်ႈ 10 ၵေႃႉ ၼႆယဝ်ႉ။

ၸွမ်းၼင်ႇသိုဝ်ႇၶၢဝ်ႇ Al Jazeera လႄႈ Irrawaddy ဢွၵ်ႇဝႆႉၼၼ်ႉဝႃႈ မိူဝ်ႈဝၼ်းထီႉ 1 July 2024 (လိူၼ်ၸဵတ်းလွင်ႈ 10 ၶမ်ႈ ပီႊတႆး 2118 ၼီႈ) ၼၼ်ႉ သိုၵ်းမၢၼ်ႈလႆႈတီႉ ၺွပ်း Hiroshi Kasamatsu ပဵၼ်ၵူၼ်းၶိူဝ်းၵျႃႇပၢၼ်ႇသေ ပဵၼ်ၽူႈၸတ်းၵၢၼ်ၶွမ်ႇပၼီႇ ၶၢႆၶူဝ်းၵုၼ်ႇၵျႃႇပၢၼ်ႇ Aeon လႄႈ ပဵၼ်ၵူၼ်းလုမ်းလႃးၸတ်းၵၢၼ်ၼႂ်း Aeon Orange supermarket ၵိင်ႇၽႄၼႂ်းမိူင်းႁူမ်ႈတုမ် သေဢမ်ႇၵႃး ယင်းလႆႈတီႉၺွပ်းပႃးထႅင်ႈ ၵူၼ်းၵႃႉၶၢႆၶဝ်ႈသၢၼ်၊ ၵူၼ်းႁဵတ်းၵၢၼ်ၼႂ်းႁူင်းၸၢၵ်ႈတမ်ၶဝ်ႈ 10 ၵေႃႉ လူၺ်ႈလွင်ႈတၢင်းၶၢႆၶဝ်ႈသၢၼ်ၵႃႈၶၼ်သုင် လိူဝ်သေဢၼ်လႆႈမၵ်းၶၢၼ်းဝႆႉၼၼ်ႉ ပဵၼ်ႁူဝ်ပၢၵ်ႇၸဵတ်းသိပ်း 70% ဝႃႈၼႆ။

ဢွၼ်တၢင်းၼႆႉ မိူဝ်ႈၼႂ်းဝၼ်းထီႉ 30 June 2024 ၼၼ်ႉ ၽၢႆႇတၢင်းသိုၵ်းမၢၼ်ႈ လႆႈ လၢတ်ႈဝႃႈ Hiroshi Kasamatsu လႄႈ ၵူၼ်းမိူင်းႁူမ်ႈတုမ်ထႅင်ႈ 3 ၵေႃႉ ပဵၼ်ၵူၼ်းဢၼ် မီးလွင်ႈထၢင်ႇထိူမ် ႁဵတ်းႁႂ်ႈၵႃႈၶၼ်ၶဝ်ႈသၢၼ်ၵႃႈၶိုၼ်ႈမႃးသေ မီးယိူင်းဢၢၼ်း ႁဵတ်းႁႂ်ႈပၢႆးမၢၵ်ႈမီးၼႂ်းမိူင်းႁူမ်ႈတုမ်သုၵ်ႉယုင်ႈ ၼႆယဝ်ႉ။

ၵဵဝ်ႇလူၺ်ႈလွင်ႈၼႆသေ ၽၢႆႇတၢင်းလူင်ပွင်ၸိုင်ႈၵျႃႇပၢၼ်ႇ လႆႈတုၵ်းယွၼ်းႁႂ်ႈသိုၵ်း မၢၼ်ႈပွႆႇတူဝ် Hiroshi Kasamatsu ဢၼ်ပဵၼ်ၵူၼ်းၶိူဝ်းၵျႃႇပၢၼ်ႇၼၼ်ႉ ၵမ်းလဵဝ် ဝႃႈၼႆ။

ၸိူင်ႉႁိုဝ်ၵေႃႈလီ ၽၢႆႇတၢင်းသိုၵ်းမၢၼ်ႈတႄႉ ဢမ်ႇလႆႈလၢတ်ႈပႃးဝႃႈ လႆႈတီႉၺွပ်း Hiroshi Kasamatsu မိူဝ်ႈလႂ် လႄႈ ၵုမ်းၶင်ဝႆႉတီႈလႂ် ၼႆယဝ်ႉ။

တႄႇၸဵမ်မိူဝ်ႈႁူဝ်လိူၼ် June 2024 ၼၼ်ႉမႃး ၽၢႆႇတၢင်းသိုၵ်းမၢၼ်ႈ လႆႈတီႉၺွပ်း ၵုမ်းၶင်ၵူၼ်းမိူင်း 35 ၵေႃႉ ၽွင်းဢၼ်ၵႅတ်ႇႁႄႉလွင်ႈသိုဝ်ႉၶၢႆၶမ်း လႄႈ ၵၢၼ်လႅၵ်ႈ ငိုၼ်း ဢိၵ်ႇတင်း တူဝ်တႅၼ်းၶၢႆႁိူၼ်းယေးၼႂ်းတၢင်ႇၸိုင်ႈမိူင်း ပိူဝ်ႈတႃႇၵုမ်းထိင်း လွင်ႈမၼ်ႈၼိမ်သဝ်းၶွင်ၶၼ်ငိုၼ်းမၢၼ်ႈ ဢၼ်တူၵ်းလူင်းၵႂႃႇႁႅင်းၼၼ်ႉ ၼႆယဝ်ႉ။

တႆးလွတ်ႈလႅဝ်း