သိုၵ်းမၢၼ်ႈ လႄႈ သိုၵ်းၶၢင် ယိုဝ်းၵၼ်ၼႂ်းမိူင်းတႆး

မိူဝ်ႈဝႃးဝၼ်းထီႉ 4 September 2022 ယၢမ်းၵၢင်ဝၼ်း 12:00 မူင်းပၢႆ သဵင်ၵွင်ႈသဵင်မၢၵ်ႇ တႅၵ်ႇမေႃးပၼ်းၸွမ်းၸိူဝ်းႁိမ်းႁွမ်း သဵၼ်ႈတၢင်းလူင်ဢၼ်ပူၼ်ႉတူဝ်းၵဵၵ်ႉ ဝဵင်းသႅၼ်ဝီ ၵႂႃႇဢိတ်းၼိုင်ႈၼၼ်ႉ လႄႈ ၵူၼ်းမိူင်းၼႂ်းပိုၼ်ႉတီႈ ၸိူဝ်းၵႂႃႇတႃႈပႆတၢင်း ၼၼ်ႉၵေႃႈ လႆႈၵိုတ်ႉယင်ႉဝႆႉၸွမ်းတၢင်း ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ “ငိၼ်းဝႃႈပဵၼ် တပ်ႉၸုမ်း 10 သိုၵ်းၶၢင် လႄႈ သိုၵ်းမၢၼ်ႈယိုတ်းမိူင်းပိုတ်းယိုဝ်းၵၼ်ၼႆၶႃႈ၊ သဵင်ၵွင်ႈဢွၼ်ႇ ၵွင်ႈလူင်တႄႉထူၼ်ႈယဝ်ႉ၊ မၢၵ်ႇလူင်ၸုမ်းလႂ်တႄႉဢမ်ႇႁူႉ ၵႂႃႇတူၵ်းတႅၵ်ႇ တီႈတူဝ်းၵဵၵ်ႉလုၵ်ႈၼိုင်ႈလႄႈ ဢမ်ႇတၼ်းတိူဝ်ႉၸပ်းၽႂ်ၼင်ႇၵဝ်ႇ၊ ၶဝ်သွင်ၸုမ်းယိုဝ်းၵၼ် ၶႂ်ႈၸမ်ဝၢႆးဝၼ်း 15:00 မူင်းၼႆႉယူႇ၊ ၵူၼ်းမိူင်းၸိူဝ်းဢွၵ်ႇတၢင်းၵေႃႈ လႆႈၵိုတ်းပႂ်ႉတေႃႇသဵင်ႈၵွင်ႈပေႃးယဵၼ်” ဝႃႈၼႆ။

တီႈၼႂ်းၸႄႈဝဵင်းသႅၼ်ဝီၼႆႉ မီးၸုမ်းသိုၵ်းဢူၺ်းလီ လႄႈ ပျီႇတူႉၸိတ်ႉ တင်း သိုၵ်းမၢၼ်ႈ တူင်ႉၼိုင်ၵႂႃႇမႃးသေ ဝၢႆးမႃး မီးပႃးၸုမ်း PDF ဢၼ်ယူႇၽၢႆႇတႂ်ႈၵုမ်းၵမ် ၸုမ်းဢူၺ်းလီၼၼ်ႉၵေႃႈ တူင်ႉၼိုင်ၼႂ်းပိုၼ်ႉတီႈမိူၼ်ၵၼ်ယူႇယဝ်ႉ။

တႆးလွတ်ႈလႅဝ်း