သိုၵ်းမၢၼ်ႈ ၶတ်းၶႂၢင်ႁႄႉႁၢမ်ႈ ဢမ်ႇပၼ်ၽၢႆႇယူႇလီမေႃယႃ RCSS ၶဝ်ႈၵူတ်ႇထတ်းပၼ်ပၢႆးယူႇလီ လႄႈ ပၼ်ၵႂၢမ်းႁူႉၵူၼ်းမိူင်း ၵဵဝ်ႇလူၺ်ႈ COVID-19

သိုၵ်းမၢၼ်ႈ ၶတ်းၶႂၢင်ႁႄႉႁၢမ်ႈ ဢမ်ႇပၼ်ၽၢႆႇယူႇလီမေႃယႃ RCSS ၶဝ်ႈၵူတ်ႇထတ်းပၼ်ပၢႆးယူႇလီ လႄႈ ပၼ်ၵႂၢမ်းႁူႉၵူၼ်းမိူင်း ၵဵဝ်ႇလူၺ်ႈ  COVID-19

သိုၵ်းမၢၼ်ႈ ဢၼ်ပၵ်းတပ်ႉမႂ်ႇဝႆႉတီႈၵွင်းပႅၵ်ႇ ၼႂ်းၵႄႈၵၢင်ဝၢၼ်ႈၼွင်လိူဝ်ႇ လႄႈ ဝၢၼ်ႈမႆႉပူၵ်ႇ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း ၶတ်းၶႂၢင် ႁႄႉႁၢမ်ႈ ဢမ်ႇပၼ်မေႃယႃၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး ၶဝ်ႈၵူတ်ႇထတ်းပၼ်ပၢႆးယူႇလီ လႄႈ ပၼ်ပိုၼ်ႉႁူႉၵူၼ်းမိူင်း ၵဵဝ်ႇလူၺ်ႈၽေး COVID-19 ဢၼ်ၽႄႈလၢမ်း ၸွတ်ႇတူဝ်ႈၼႂ်းလုမ်ႈၾႃႉယူႇယၢမ်းလဵဝ်။

မိူဝ်ႈဝၼ်းထီႉ 7 March 2020 (လိူၼ်ႁႃႈမူၼ်း ပီႊတႆး 2114 ၼီႈ) သိုၵ်းမၢၼ်ႈၸိုဝ်ႈ မဵဝ်းမိၼ်းၵူဝ်ႇၵူဝ်ႇ ဢွၼ်ႁူဝ်လုၵ်ႈၼွင်ႉမၼ်းသေ ၵႂႃႇလၢတ်ႈတီႈ ပေႃႈမႄႈပီႈၼွင်ႉၵူၼ်းမိူင်း ၼႂ်းဢိူင်ႇၼႃးမွၼ် လွင်ႈဝႃႈ ဢမ်ႇပၼ်ၵူၼ်းၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး RCSS ၵႂႃႇၵူတ်ႇထတ်းပၼ်ပၢႆးယူႇလီ လႄႈ ပၼ်ပိုၼ်ႉႁူႉၸိူဝ်းၼႆႉ ၊ သင်ဝႃႈ သိုၵ်းမၢၼ်ႈႁၼ်ၼႆ တေတီႉၺွပ်းသႂ်ႇၶွၵ်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈၼႄဝႃႈ “လွင်ႈသိုၵ်းမၢၼ်ႈ ဢမ်ႇပၼ်မေႃယႃ ၽၢႆႇပၢႆးယူႇလီ RCSS ၶဝ်ႈၵူတ်ႇထတ်းပၢႆးယူႇလီၼၼ်ႉ ပႃးတီႈဝၢၼ်ႈမႆႉပူၵ်ႇ ဝၢၼ်ႈၼိုင်ႈယူႇၶႃႈ၊ တၢင်ႇဝၢၼ်ႈၵေႃႈ လႅပ်ႈတေၺႃး သိုၵ်းမၢၼ်ႈ ႁၢမ်ႈမိူၼ်ၵၼ်ယူႇ၊ သိုၵ်းမၢၼ်ႈႁႄႉႁၢမ်ႈၸိူင်ႉၼႆၼႆႉ တင်ႈၸႂ်ပွႆႇႁႂ်ႈၵူၼ်းမိူင်း ၼႂ်းဢိူင်ႇၼႃးမွၼ်ႁဝ်းၶႃႈ ဢမ်ႇလႆႈၵူတ်ႇထတ်းပၢႆးယူႇလီ လႄႈ ဢမ်ႇလႆႈႁပ်ႉႁူႉလွင်ႈ လၢႆးႁႄႉၵင်ႈတၢင်းပဵၼ် COVID-19” လၢတ်ႈၼႄၼင်ႇၼႆ။

ၼင်ႇႁိုဝ်ပေႃႈမႄႈၵူၼ်းမိူင်း ၼႂ်းပိုၼ်ႉတီႈ ပေႃးတေႁပ်ႉႁူႉလွၵ်းလၢႆးႁႄႉၵင်ႈ တၢင်းပဵၼ်ၸိူဝ်ႉမႅင်း COVID-19 ၼႆႉ ယူႇတီႈၽူႈမီးပုၼ်ႈၽွၼ်း ၶွင်ႇသီႇဢဝ်ၶိုၼ်းၸိုင်ႈတႆး တေၶတ်းၸႂ်ႁဵတ်းသၢင်ႈၵႂႃႇ ၸွမ်းၼင်ႇ ပွင်ပဵၼ်လႆႈယူႇ ၊ ထႅင်ႈလွင်ႈၼိုင်ႈ ၶွင်ႇသီႇဢဝ်ၶိုၼ်းၸိုင်ႈတႆး ဝႆႉၼမ်ႉၼၵ်းၼိူဝ် ပေႃႈမႄႈၵူၼ်းမိူင်းသေ  လႆႈၶွတ်ႇၽွတ်ႈဝႆႉ ၵေႃႇမတီႇ ၽၢႆႇပၢႆးယူႇလီ တႃႇႁႄႉၵင်ႈၸိူဝ်ႉမႅင်း COVID-19 ၸိူဝ်းၼႆႉ လႄႈ လႆႈလူင်းၵူတ်ႇ ထတ်း ပၢႆးယူႇလီ ပၼ်ပိုၼ်ႉႁူႉၵူၼ်းမိူင်း ၵဵဝ်ႇလူၺ်ႈ COVID-19 ယူႇယဝ်ႉ။

မိူဝ်ႈၼႆႉဝၼ်းထီႉ 10 April 2020 (လိူၼ်ႁႃႈလွင်ႈ 3 ၶမ်ႈ ပီႊတႆး 2114 ၼီႈ) ၼႆႉၵေႃႈ ၵေႃႇမတီႇၽၢႆႇပွင်သၢင်ႈ လွင်ႈငမ်းယဵၼ် (PMC) RCSS ၶုၼ်သိုၵ်းလူင် ၶမ်းသိူဝ်း ဢွၼ်ႁူဝ်သေ လႆႈသိုပ်ႇဢဝ်ၶိူင်ႈၵမ်ႉၵႅမ်ပၢႆးယူႇလီ ဢၼ်ၽူႈမီးၼမ်ႉၸႂ်ၸေႇတၼႃႇၶဝ် ၸွႆႈထႅမ်ဝႆႉၼၼ်ႉ သူင်ႇၵႂႃႇတီႈ ၽူႈမီးပုၼ်ႈၽွၼ်း ၽၢႆႇပၢႆးယူႇလီ RCSS လႄႈ ၽၢႆႇပၢႆးယူႇလီလူင်ပွင်ၸိုင်ႈ ဢၼ်မီးတီႈ မိူင်းၼွင် ၊ မိူင်းသူႈ ၊ မိူင်းၵိုင် ၊ လၢႆးၶႃႈ ၊ ပၢင်လူင်။

သိုၵ်းမၢၼ်ႈ ဢၼ်ပၵ်းတပ်ႉမႂ်ႇ တီႈၵွင်းပႅၵ်ႇၼႆႉ ယူႇၽၢႆႇတႂ်ႈၵုမ်းၵမ်  ၽႅၼ်ၵၢၼ်ယၢၼ်ႇသိုၵ်း (ၸၵၶ) 17 ငဝ်ႈငုၼ်းတိူင်းသိုၵ်း ဝၼ်းဢွၵ်ႇၵၢင် (ယလၶ) ဝဵင်းၶူဝ်လမ်။

တႆးလွတ်ႈလႅဝ်း