သိုၵ်းမၢၼ်ႈ ၽိူမ်ႉၼမ်ႉၵတ်ႉၼႂ်းၵၢၼ်ၸႂ်ႉၶိူင်ႈမိၼ်တရူၼ်း ပၼ်ၵူၼ်းသိုၵ်းမႂ်ႇၶဝ်

ဝၢႆးလင်သိုၵ်းမၢၼ်ႈသုမ်းသိုၵ်းလႄႈ သုမ်းပိုၼ်ႉတီႈၶဝ်မႃးၼမ်ယဝ်ႉ တႃႇတေထူဝ်းသိုၵ်း တိုၵ်းၶိုၼ်းၸုမ်းလုၵ်ႉၽိုၼ်ႉၼၼ်ႉ ၸင်ႇမီးလွင်ႈၵဵပ်းသိုၵ်းမႂ်ႇႁၢဝ်ႈႁႅင်းလႄႈ ၽိူမ်ႉသွၼ်ပၼ်ပႃးလၢႆးၸႂ်ႉၶိူင်ႈမိၼ်တရူၼ်း ၸဵမ်ဢဝ်လၢႆးပွႆႇမၢၵ်ႇလႄႈ လၢႆးမိၼ်ၸွပ်ႇၶၢဝ်ႇလႂ်ၸိူဝ်းၼႆႉ ဝႃႈၼႆ။

တင်ႈတႄႇၼႂ်းလိူၼ် October – November 2024 ၼႆႉ သိုၵ်းမၢၼ်ႈယိုင်ႈၶႅၼ်းတိူဝ်းသွၼ်ၵၢၼ်တရူၼ်း ပၼ်ၵူၼ်းသိုၵ်းၶဝ်ၼမ်လိူဝ်ၵဝ်ႇလႄႈ လႆႈႁူႉဝႃႈၵူၼ်းသိုၵ်းမႂ်ႇဢၼ်ၶဝ်ၵဵပ်းမႃးၸိူဝ်းၼၼ်ႉ ပေႃးဝႃႈသွၼ်ၵၢၼ်ငဝ်ႈၶၢမ်ႇပိုၼ်ႉၵၢၼ်သိုၵ်းယဝ်ႉ သိုၵ်းမၢၼ်ႈၶဝ်ၶိုၼ်းလိူၵ်ႈဢဝ် ၵူၼ်းၸိူဝ်းသူၼ်ၸႂ်ၼႂ်းၵၢၼ်ၸႂ်ႉၶိူင်ႈမိၼ်တရူၼ်းၼၼ်ႉသေ သွၼ်ပၼ်လၢႆးဢဝ်မၢၵ်ႇပွႆႇ လႄႈလၢႆးၸႂ်ႉတရူၼ်းမိၼ်ၸွပ်ႇၶၢဝ်ႇၸိူဝ်းၼႆႉ ၼႆယဝ်ႉ။

လိူဝ်သေၼၼ်ႉဢမ်ႇၵႃး သင်ၸိူဝ်ႉဝႃႈၶဝ်ၵဵပ်းသိုၵ်းမႂ်ႇမႃးထႅင်ႈၸုပ်ႈၼိုင်ႈၸိုင် ၼႂ်းပၢင်သွၼ်ၵၢၼ်သိုၵ်းၵူႈပိုၼ်ႉတီႈၼၼ်ႉ သိုၵ်းမၢၼ်ႈၶဝ် တေဢဝ်ၽႃႇသႃႇတရူၼ်း ၼႆႉသွၼ်ပၼ်ထႅင်ႈ ႁႂ်ႈပေႃးၸွတ်ႇတူဝ်ႈပတ်းပိုၼ်ႉၸိုင်ႈမိူင်းသေ တေႁႂ်ႈထူဝ်းသိုၵ်းတိုၵ်းဢဝ်ၶိုၼ်း ပိုၼ်ႉတီႈဢၼ်ၶဝ်တူၵ်းသုမ်းဝႆႉၸိူဝ်းၼၼ်ႉ ပႃးၸဵမ်ၼႂ်းမိူင်းတႆးၼႆယဝ်ႉ။

ၸွမ်းၼင်ႇလႅင်ႇၶၢဝ်ႇၶဝ်ဢွၵ်ႇဝႆႉၼၼ်ႉတႄႉ တရူၼ်းဢၼ်သိုၵ်းမၢၼ်ႈၸႂ်ႉယူႇၼၼ်ႉ ပဵၼ်ၶွင်ၶိုတ်းၸၼ်ႉ ဢၼ်ႁဵတ်းဢွၵ်ႇမႃးတီႈမိူင်းၶႄႇၼႆသေ မၢၵ်ႇတႅၵ်ႇဢၼ်ၸႂ်ႉၸွမ်းတရူၼ်းၼၼ်ႉသမ်ႉ ပဵၼ်ဢၼ်သိုၵ်းမၢၼ်ႈၶဝ်ႁဵတ်းဢွၵ်ႇၼၼ်ႉသေ ၸႂ်ႉတိုဝ်ၸွမ်းၵၼ်ၵႂႃႇ ယၢမ်းလဵဝ်ၼႆႉၼႂ်းမိူင်းယၢင်းၽိူၵ်ႇလႄႈ မိူင်းတႆးၼၼ်ႉ သိုၵ်းမၢၼ်ႈၶဝ်တႄႇၸႂ်ႉတိုဝ်းၵႂႃႇယဝ်ႉ ဝႃႈၼႆ။

လႆႈႁူႉၸွမ်းထႅင်ႈဝႃႈ ယၢမ်းလဵဝ်သိုၵ်းမၢၼ်ႈၶဝ်သင်ႇဝႆႉ ၶိူင်ႈမိၼ်တရူၼ်း တီႈမိူင်းၶႄႇ ထႅင်ႈတၢင်းၼမ်လႄႈ ​​တေသူင်ႇပၼ်ၼႃႈသိုၵ်းၵူႈပိုၼ်ႉတီႈၸႂ်ႉတိုဝ်းၵႂႃႇ တႃႇတိုၵ်းဢဝ်ၶိုၼ်းတပ်ႉယႂ်ႇတပ်ႉလူင် လႄႈဝဵင်းဢၼ်ၶဝ်တူၵ်းသုမ်းၵႂႃႇၸိူဝ်းၼၼ်ႉ ၼႆယဝ်ႉ။

ၶေႃႈမုၼ်း – Khit thit Media

တႆးလွတ်ႈလႅဝ်း