သိုၵ်းလေႃးလႄး လူင်းၵဵပ်းသိုၵ်း ၼႂ်းၸႄႈဝဵင်းၵျွၵ်ႉမႄး

ၸုမ်းသိုၵ်းလေႃးလႄး ဢၼ် SSPP ဢွၼ်ႁူဝ်ဝႆႉၼၼ်ႉ ႁွင်ႉဢဝ် သိုၵ်း TNLA သေ လူင်းတဵၵ်းၵဵပ်းသိုၵ်းမႂ်ႇ တီႈၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။

မိူဝ်ႈဝၼ်းထီႉ 8 April 2022 (လိူၼ်ႁႃႈမႂ်ႇ 8 ၶမ်ႈ ပီႊတႆး 2116 ၼီႈ) ၸုမ်းသိုၵ်းလေႃးလႄး ဢၼ်မီးၸုမ်းသိုၵ်း SSPP၊ TNLA ၼၼ်ႉ လူင်းတဵၵ်းၵဵပ်းသိုၵ်းမႂ်ႇ တီႈၼႂ်းၸႄႈဝဵင်းၵျွၵ်ႉမႄး မိူၼ်ၼင်ႇ − ၼႂ်းဢိူင်ႇဝၢၼ်ႈၶႃႇ 6 ၵေႃႉ၊ ဢိူင်ႇပိင်းၼႄးၵုင်း 8 ၵေႃႉ ႁူမ်ႈ 14 ၵေႃႉသေ ပေႃးထိုင်ဝၼ်းထီႉ 17 April 2022 ပဵၼ်ဝၼ်းလိုၼ်းသုတ်းလႄႈ တေလႆႈၵႂႃႇဢၢပ်ႈတီႈ ဝၢၼ်ႈၶူဝ်ယၢဝ်း ဢိူင်ႇၵျွၵ်ႉမႄးလူင် ၸႄႈဝဵင်းၵျွၵ်ႉမႄး ၼႆယဝ်ႉ။

ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ၸုမ်းသိုၵ်းလေႃးလႄးၶဝ်ၵေႃႈ လႆႈလူင်းတဵၵ်းၵဵပ်းသိုၵ်းမႂ်ႇ ထႅင်ႈလၢႆလၢႆဝၢၼ်ႈ ၼႂ်းဢိူင်ႇမိူင်းတၢင်ႈ ၸႄႈဝဵင်းၵျွၵ်ႉမႄး မိူၼ်ၼင်ႇ − ဝၢၼ်ႈလူင် 6 ၵေႃႉ၊ ဝၢၼ်ႈၸၢၼ်း 6 ၵေႃႉ၊ ဝၢၼ်ႈႁူၺ်ႈပူ 3 ၵေႃႉ၊ ဝၢၼ်ႈၼႃးမူၼ်း 3 ၵေႃႉ၊ ဝၢၼ်ႈပဵင်းၶႃး 3 ၵေႃႉ၊ ဝၢၼ်ႈပၢင်တီး 1 ၵေႃႉ ႁူမ်ႈ 23 ၵေႃႉသေ ပေႃးဝၼ်းထီႉ 15 April 2022 ႁႂ်ႈလႆႈၸူႉၵၼ်ဝႆႉလႄႈ တီႈတေလႆႈၵႂႃႇဢၢပ်ႈတေႉ ဢမ်ႇလႆႈႁပ်ႉႁူႉၸွမ်း ဝႃႈၼႆ။

ၼွၵ်ႈလိူဝ်သေ ဢိူင်ႇမိူင်းတၢင်ႈယဝ်ႉ တီႈၼႂ်းထုင်ႉပုင်ႇဝူဝ်းၵေႃႈ ၸုမ်းသိုၵ်းလေႃးလႄးၶဝ် လူင်းၵဵပ်းသိုၵ်းမႂ်ႇ ၼႂ်းဢိူင်ႇၵုၼ်ႁႅၼ် တႃႇ 7 ဝၢၼ်ႈသေ တဵၵ်းယွၼ်းၵူၼ်း 17 ၵေႃႉၼႆလႄႈ ဝၢၼ်ႈတေႃလိူဝ်ႇ လႆႈပၼ် 2 ၵေႃႉ၊ ဝၢၼ်ႈၵုင်းၺွင်ႇ 2 ၵေႃႉ၊ ဝၢၼ်ႈထမ်ႈဢွၵ်ႇ 1 ၵေႃႉ၊ ဝၢၼ်ႈၵုၼ်ႁႅၼ် 3 ၵေႃႉ၊ ဝၢၼ်ႈႁၢင်ၼွင် 2 ၵေႃႉ၊ ဝၢၼ်ႈပဵင်းထွၼ် 3 ၵေႃႉ၊ ဝၢၼ်ႈၼမ်ႉၵိၼ်လီ 4 ၵေႃႉ သေဢမ်ႇၵႃး တီႈၼႂ်းဢိူင်ႇၵုၼ်ႁႅၼ်ၼႆႉ ၶဝ်ယင်းပၢႆတဵၵ်းယွၼ်းပႃး ၶဝ်ႈသၢၼ် 80 ပွတ်းထႅင်ႈၵွၼ်ႇ ဝႃႈၼႆ။

မိူၼ်ၼၼ်ၵူၺ်းၼင်ႇၵဝ်ႇ တီႈၼႂ်းထုင်ႉပုင်ႇဝူင်း ဢိူင်ႇၵွင်းလၢင်းၵေႃႈ ၸုမ်းသိုၵ်းလေႃးလႄး ဢၼ် SSPP ဢွၼ်ႁူဝ်သေ ႁွင်ႉဢဝ်သိုၵ်း TNLA လူင်းၵဵပ်းသိုၵ်းမႂ်ႇ ၼႂ်းဝၢၼ်ႈၵွင်းလၢင်းၶၢႆးသိမ်ႇ 7 ၵေႃႉ၊ ဝၢၼ်ႈႁူင်းလၢႆး 6 ၵေႃႉ၊ ဝၢၼ်ႈပၢင်ပဵင်းသေႃႉ 7 ၵေႃႉ ဢိၵ်ႇတင်း တီႈၼႂ်းဢိူင်ႇတွင်ႇထိၵ်ႈ မိူၼ်ၼင်ႇ − ဝၢၼ်ႈတွင်ႇထိၵ်ႈ 7 ၵေႃႉ၊ ဝၢၼ်ႈၼမ်ႉဢုၼ်ႇ 2 ၵေႃႉ၊ ဝၢၼ်ႈၵွင်းမူးၶၢၼ် 2 ၵေႃႉ၊ ဝၢၼ်ႈၶူၵ်ႉၼမ်ႉ 4 ၵေႃႉ ထႅင်ႈမိူၼ်ၵၼ် ဝႃႈၼႆ။

တႆးလွတ်ႈလႅဝ်း