သိုၵ်းၵူဝ်းရီးယႃးႁွင်ႇ ၶဝ်ႈၸွႆႈရၢတ်ႉသျႃး တိုၵ်းတေႃးယူႇၶရဵၼ်း

ဝၢႆးသေၵူဝ်းရီးယႃးၸၢၼ်း လၢတ်ႈဝႃႈ မီးလွင်ႈပဵၼ်ၵႂႃႇလႆႈ လွင်ႈဝႃႈ သိုၵ်းၵူဝ်းရီးယႃးႁွင်ႇ ၶဝ်ႈၵႂႃႇၸွႆႈထႅမ်ရၢတ်ႉသျႃး ၼႂ်းပၢင်တိုၵ်းယူႇၶရဵၼ်းၼၼ်ႉၼႆ သေ မိူဝ်ႈၼႂ်းဝၼ်းထီႉ 10 October 2024 ၼၼ်ႉၵေႃႈ ၽၢႆႇတၢင်းရၢတ်ႉသျႃး လႆႈဢွၵ်ႇ မႃးပၢၵ်ႈပႅတ်ႈၶေႃႈၵၢဝ်ႇၼႄးၼႆႉသေ လၢတ်ႈဝႃႈ မၼ်းတူၺ်းမိူၼ်ပဵၼ်ၶၢဝ်ႇပွမ်ထႅင်ႈ ႁူဝ်ၼိုင်ႈၼႆ ၽူႈတၢင်လၢတ်ႈႁိူၼ်းႁေႃၸွမ်ၸိုင်ႈရၢတ်ႉသျႃး လၢတ်ႈၼင်ႇၼႆ။

သိုဝ်ႇၶၢဝ်ႇယူႇၶရဵၼ်း လႆႈဢၢင်ႈဢိင်လႅင်ႇၶၢဝ်ႇ ဢၼ်ပဵၼ်သၢႆလပ်ႉ လၢႆးငၢၼ်းမိူဝ်ႈၼႂ်း ဝၼ်းထီႉ 4 October 2024 ၼၼ်ႉဝႃႈ ယွၼ်ႉယူႇၶရဵၼ်း ယိုဝ်းမၢၵ်ႇမိတ်ႉသႆးသႂ်ႇၼႂ်း ဝဵင်းဢၼ်ရၢတ်ႉသျႃး ယိုတ်းသိမ်းလႆႈ ဢၼ်ယူႇၸမ်ပွတ်းတွၼ်ႈတူဝ်းၼႅတ်ႇသ်ၶ် ၼၼ်ႉသေ ႁဵတ်းႁႂ်ႈမီးၵူၼ်းသိုၵ်းၵူဝ်းရီးယႃးႁွင်ႇ လူႉသဵင်ႈတၢႆ 6 ၵေႃႉ ဝႃႈၼႆ။

ၼွၵ်ႈလိူဝ်သေၼၼ်ႉ မိူဝ်ႈၼႂ်းဝၼ်းထီႉ 8 October 2024 ယူႇတီႈ ၽွင်းလူင်ၽၢႆႇၵႅတ်ႇ ၶႄၵူဝ်းရီးယႃးၸၢၼ်း လႆႈလၢတ်ႈဝႃႈ လၢႆးငၢၼ်းၶၢဝ်ႇၼၼ်ႉ မၼ်းတေၸၢင်ႈပဵၼ် လွင်ႈတႄႉ “မိူဝ်ႈႁဝ်းၼပ်ႉသွၼ်ႇတူၺ်း လွင်ႈလူႉသုမ်းၶွင် ၸဝ်ႈၼႃႈတီႈ လႄႈ ၵူၼ်း သိုၵ်းၵူဝ်းရီးယႃးႁွင်ႇယဝ်ႉ မၼ်းပဵၼ်ၵႂႃႇလႆႈသုင် ယွၼ်ႉၶေႃႈတူၵ်းလူင်း ဢၼ်မိူၼ် ပဵၼ်ဢူၺ်းလီၽၢႆႇၵၢၼ်သိုၵ်း ၼႂ်းၵႄႈၵၢင် ရၢတ်ႉသျႃး တင်း ၵူဝ်းရီးယႃးႁွင်ႇ” ၼၼ်ႉ ၼႆယဝ်ႉ။

မီးၵူၼ်းသိုၵ်းၵူဝ်းရီးယႃးႁွင်ႇ ယူႇဝႆႉၼႂ်းပၢင်တိုၵ်း ပွတ်းတွၼ်ႈတူဝ်းၼႅတ်ႇသ်ၶ် ၼၼ်ႉ ပႂ်ႉတူၺ်းၵၢၼ်ၸႂ်ႉတိုဝ်းမၢၵ်ႇမိတ်ႉသႆး လႄႈ မၢၵ်ႇလူင်ၵူဝ်းရီးယႃးႁွင်ႇ ဢၼ် ရၢတ်ႉသျႃး လႆႈပိုင်ႈဢိင်ဝႆႉ ပႅၵ်ႉသမ်ႉမီးၼမ်ႉၵတ်ႉဢေႇၵေႃႈယဝ်ႉၼႆ ၽူႈပွင်ၵၢၼ် ၽၢႆႇတေႃႇသူႈၶေႃႈမုၼ်းၶၢဝ်ႇပွမ်ၶွင်ယူႇၶရဵၼ်း လႆႈတႅမ်ႈလၢတ်ႈ မိူဝ်ႈၼႂ်းဝၼ်းထီႉ 5 October 2024 ဝႆႉၼင်ႇၼႆ။

ၵဵဝ်ႇလူၺ်ႈလွင်ႈၼႆႉ ၽၢႆႇတၢင်းၽူႈလူင်ႉလႅၼ်ႇၶဝ် လၢတ်ႈမႃးယူႇတႃႇသေႇဝႃႈ တပ်ႉသိုၵ်းရၢတ်ႉသျႃး ၸႂ်ႉတိုဝ်းမၢၵ်ႇမိတ်ႉသႆးၵူဝ်းရီးယႃးႁွင်ႇ တီႈၼႂ်းပၢင်တိုၵ်းယူႇၶရဵၼ်း ၼႆသေတႃႉ ၽၢႆႇရၢတ်ႉသျႃး လႄႈ ၵူဝ်းရီးယႃးႁွင်ႇ လႆႈဢွၵ်ႇမႃးပၢၵ်ႈပႅတ်ႈ လွင်ႈၼႆႉၵႂႃႇ မိူၼ်ၵၼ်။

ၵူဝ်းရီးယႃးၸၢၼ်း ယင်းလႆႈၵၢဝ်ႇၼႄးၵူဝ်းရီးယႃးႁွင်ႇ သူင်ႇပၼ်တိူၵ်ႈတေႃႉတၢင်ႇ ၵဵပ်းသိမ်းၶူဝ်းၶွင် (Container) ဢၼ်ၼႂ်းမၼ်းသႂ်ႇဝႆႉၶိူင်ႈယိပ်းလၢႆႁဵင်တိူၵ်ႈ ပၼ်ရၢတ်ႉ သျႃး တႃႇဢဝ်ၵႂႃႇၸႂ်ႉ တိုဝ်းၼႂ်းပၢင်တိုၵ်းယူႇၶရဵၼ်း ၼႆယဝ်ႉ။

ၵူဝ်းရီးယႃးႁွင်ႇ ပဵၼ်ၸိုင်ႈမိူင်းဢၼ်မီးမၢၵ်ႇၼိဝ်းၶလီးယႃးမိူင်းၼိုင်ႈသေ လႆႈသၢင်ႈ လွင်ႈၸမ်ၸႂ်ၸွမ်းရၢတ်ႉသျႃး လႄႈ ယူႇတီႈၸွမ်ၸိုင်ႈရၢတ်ႉသျႃး ပူႇတိၼ်ႇၵေႃႈ လႆႈဢွၵ်ႇၶၢဝ်းတၢင်းၵႂႃႇ မိူင်းၵူဝ်းရီးယႃးႁွင်ႇ မိူဝ်ႈၼႂ်းလိူၼ် June 2024 မီးၶေႃႈတူၵ်း လူင်းၽၢႆႇၵၢၼ်သိုၵ်းၸွမ်း ၽူႈၼမ်းသုင်သုတ်းၵူဝ်းရီးယႃးႁွင်ႇ ၶိမ်းၵျွင်းဢိုၼ်း ဝႃႈၼႆ။

တႆးလွတ်ႈလႅဝ်း