သိုၵ်းၵူဝ်းၵၢင်ႉပိုၼ်ၽၢဝ်ႇ ယႃႇႁႂ်ႈၵူၼ်းၼႂ်းၼႃႈတီႈဢုပ်ႉပိူင်ႇ ၵဵဝ်ႇၶွင်ႈၸွမ်း ၼွၵ်ႈမိူင်း လႄႈ မိူင်းဝၼ်းတူၵ်း

မိူဝ်ႈဝႃးဝၼ်းထီႉ 10 October 2024 (လိူၼ်သိပ်းဢဵတ်းမႂ်ႇ 8 ၶမ်ႈ ပီႊတႆး 2118 ၼီႈ) ၸုမ်းသိုၵ်းၵူဝ်းၵၢင်ႉ MNDAA ပိုၼ်ၽၢဝ်ႇၵႂႃႇဝႃႈ မိူဝ်ႈပူၼ်ႉမႃး ဢမ်ႇပႆႇႁိုင်သင်ၼႆႉ ၸုမ်းႁႅင်းၼွၵ်ႈမိူင်းၶဝ် ၶဝ်ႈၵဵဝ်ႇၶွင်ႈယုင်ႈၸွမ်း ပၼ်ႁႃၼႂ်းမိူင်းႁူမ်ႈတုမ် လႄႈ တေၸၢင်ႈမီးၵၢၼ်လႅၵ်ႈလၢႆႈယႂ်ႇလူင်သေ ၼင်ႇႁိုဝ်မုၵ်ႉၸုမ်းၸဝ်ႈၵဝ်ႇ ပေႃးတေဢမ်ႇတူၵ်းပဵၼ်ၶိူင်ႈမိုဝ်းပိူၼ်ႈၼၼ်ႉ ႁႂ်ႈလႆႈႁဵတ်းၸွမ်းၼင်ႇပၵ်းပိူင် ၵၢၼ်ဢုပ်ႉပိူင်ႇ MNDAA ဢၼ်တမ်းဝၢင်းဝႆႉၼၼ်ႉယူႇယဝ်ႉ။

ၼႂ်းလိၵ်ႈပိုၼ်ၽၢဝ်ႇၸုမ်းသိုၵ်းၵူဝ်းၵၢင်ႉ MNDAA ၼၼ်ႉပႃးဝႆႉဝႃႈ  ၵူၼ်းၼႂ်းၸုမ်းပႃႇတီႇ လႄႈ ၵူၼ်းသိုၵ်း ၸၼ်ႉသိုၵ်းႁၢၼ်တေႃႇၽူႈမီးၸၼ်ႉ ဢိၵ်ႇပႃးၸိူဝ်းယူႇသၢင်ႈၵိၼ်သဝ်း ၼႂ်းၼႃႈတီႈဢုပ်ႉပိူင်ႇ MNDAA ပေႃးဢမ်ႇလႆႈၶႂၢင်ႉ ၽူႈၵဵဝ်ႇၶွင်ႈၼႆၸိုင် တေဢမ်ႇလႆႈဢွၵ်ႇၶၢဝ်းတၢင်းၵႂႃႇတီႈ မိူင်းဢမေႇရိၵၢၼ်ႇ၊ မိူင်းဝၼ်းတူၵ်းၸိူဝ်းၼႆႉ၊ ပေႃးဢမ်ႇလႆႈၶႂၢင်ႉၽူႈၵဵဝ်ႇၶွင်ႈၼႆၸိုင် ယႃႇပေၵႂႃႇၶိုၼ်ႈပၢင်ၵုမ် လွင်ႈၼွၵ်ႈမိူင်းၸတ်းႁဵတ်း ၵဵဝ်ႇလူၺ်ႈပၼ်ႁႃၵၢၼ်မိူင်း မိူင်းႁူမ်ႈတုမ်၊ ယႃႇပေတွပ်ႇၽူႈသိုဝ်ႇၶၢဝ်ႇ ဢမေႇရိၵၢၼ်ႇ လႄႈ မိူင်းဝၼ်းတူၵ်း ဢိၵ်ႇပႃး တၢင်ႇၼွၵ်ႈမိူင်းၸိူဝ်းၼႆႉ၊ လွင်ႈပၼ်တၢင်းႁၼ်ထိုင်  ၵဵဝ်ႇလူၺ်ႈငဝ်းလၢႆးမိူင်းႁူမ်ႈတုမ် လႄႈ တွပ်ႇလၢတ်ႈတီႈသိုဝ်ႇၶၢဝ်ႇၼႂ်းမိူင်းႁူမ်ႈတုမ်ၼၼ်ႉၵေႃႈ ပေႃးဢမ်ႇလႆႈၶႂၢင်ႉၼႆ ယႃႇပေတွပ်ႇလၢတ်ႈလႃးလႃး ဝႃႈၼႆ။

သင်ဝႃႈၽူႈလႂ်ၵေႃႈယဝ်ႉ ဢမ်ႇႁပ်ႉႁဵတ်းၸွမ်းၼင်ႇ ပၵ်းပိူင်ဢၼ်တမ်းဝၢင်းဝႆႉၸိူဝ်းၼႆၸိုင် တၵ်းတေထုၵ်ႇၺႃးဢဝ်တၢင်းၽိတ်းၼႆ လႆႈႁၼ်ပိုၼ်ၽၢဝ်ႇဝႆႉၼင်ႇၼႆ။

မိူဝ်ႈဝၼ်းထီႉ 25 September 2024 ၼၼ်ႉၵေႃႈ ၸုမ်းသိုၵ်းမၢၼ်ႈပိုၼ်ၽၢဝ်ႇၵႂႃႇဝႃႈ ၸုမ်းသိုၵ်း TNLA, သိုၵ်း MNDAA လႄႈ ၸုမ်း NUG ဢၼ်ၵုမ်းၵမ်ဝႆႉ PDF ၼၼ်ႉ လႆႈႁပ်ႉငိုၼ်းတီႈ ဢမေႇရိၵၢၼ်ႇ ၼိုင်ႈပီႊလႂ် 200 လၢၼ်ႉတေႃႇလႃႇ  ဝႃႈၼႆသေ တၢင်းၽၢႆႇၸုမ်းသိုၵ်းၵူဝ်းၵၢင်ႉၵေႃႈ လႆႈဢွၵ်ႇလိၵ်ႈပိုၼ်ၽၢဝ်ႇတွပ်ႇၶိုၼ်းဝႃႈ ဢမ်ႇလႆႈႁပ်ႉငိုၼ်းၸွႆႈထႅမ် လႄႈ ဢမ်ႇလႆႈၵဵဝ်ႇၶွင်ႈၸွမ်းလွင်ႈၼႆႉသေ လွင်ႈႁူမ်ႈႁွမ်းၵၢၼ်သိုၵ်း ၵၢၼ်မိူင်းၵၼ်တင်း ၸုမ်း NUG ၼၼ်ႉၵေႃႈ တိုၼ်းတေဢမ်ႇႁဵတ်း ဝႃႈၼႆ။

ၽွင်းယၢမ်းမိူဝ်ႈလဵဝ်သမ်ႉ လႆႈႁၼ်ပႃးထႅင်ႈတၢင်းၽၢႆႇ မိူင်းၶႄႇ မိပ်ႇႁႅင်းဢီးႁၢဝ်ႈႁႅင်းဝႆႉ လွင်ႈယႃႇပေႁႂ်ႈ ၸုမ်းသိုၵ်းဢူၺ်းလီ 3 ၸုမ်း သိုပ်ႇၶႂၢၵ်ႈၵၢၼ်သိုၵ်းလႄႈပၢင်တိုၵ်း ၼႂ်းပိုၼ်ႉတီႈထႅင်ႈ ၼႆယဝ်ႉ။

တႆးလွတ်ႈလႅဝ်း