သိုၵ်းၵူဝ်းၵၢင်ႉ MNDAA တဵၵ်းၵဵပ်းသိုၵ်းႁၢဝ်ႈႁႅင်း တီႈသႅၼ်ဝီ

ၸုမ်းသိုၵ်းၵူဝ်းၵၢင်ႉ MNDAA သၢင်ႉၵဵပ်းသိုၵ်း ၼႂ်းၸႄႈဝဵင်သႅၼ်ဝီႁၢဝ်ႈႁႅင်း သင်ၽႂ်ဢမ်ႇၵႂႃႇ တေဢဝ်ႁႅင်းသိုၵ်းၶဝ်ႈၺွပ်းဢဝ်ႁင်းၵူၺ်း ၼႆသေ ႁဵတ်းႁႂ်ႈၵူၼ်းမိူင်းၵႂင်ပူၵႂင်ပႃ တေပၢႆႈၵေႃႈဢမ်ႇၸၢင်ႈ ဝႃႈၼႆ။

မိူဝ်ႈဝၼ်းထီႉ 23 May 2024 (လိူၼ်ႁူၵ်းလွင်ႈ 1 ၶမ်ႈ ပီႊတႆး 2118 ၼီႈ) ၸုမ်းသိုၵ်းၵူဝ်းၵၢင်ႉ MNDAA ဢၼ်တူင်ႉၼိုင်ႉပွတ်းသႅၼ်ဝီၼၼ်ႉ သၢင်ႉၵဵပ်းသိုၵ်းႁၢဝ်ႈႁႅင်း မိူၼ်ၼင်ႇ ပွတ်းၼမ်ႉၸလၢပ်ႈ ထိုင်ပၢင်ၽၢတ်ႇမိူင်းလီ ၸိူဝ်းၼႆႉ ၶဝ်သၢင်ႉၵဵပ်းၼိုင်ႈဝၢၼ်ႈၼိုင်ႈၵေႃႉ သင်ဢမ်ႇၵႂႃႇသၢင်းပၼ်လႆႈၼႆ ၶဝ်တေဢဝ်ႁႅင်းသိုၵ်းၶဝ်ႈသွၵ်ႈတဝ်တီႉၺွပ်းဢဝ်ႁင်းၵူၺ်း ၼႆယဝ်ႉ။

ၵူၼ်းမိူင်းဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈၼႄဝႃႈ “သိုၵ်းၵူဝ်းၵၢင်ႉၶဝ် သၢင်ႉၵဵၵ်းသိုၵ်း ၼိုင်ႈဝၢၼ်ႈၼိုင်ႈၵေႃႉဢမ်ႇၵႂႃႇဢမ်ႇလႆႈၶႃႈ ၶဝ်လၢတ်ႈမႃးဝႃႈ မိူဝ်ႈၼႆႉ(23 May 2024) ႁႂ်ႈၵႂႃႇသၢင်းပၼ်ၶဝ်ႁႂ်ႈလႆႈၼႆဢေႃႈ။ မိူဝ်ႈလဵဝ်ၼႆႉ ၵူၼ်းမိူင်းမၢင်ဝၢၼ်ႈ ဢမ်ႇၸၢင်ႈဢဝ်ၵူၼ်းတီႈလႂ်သၢင်းပၼ်လႄႈ ၶဝ်သမ်ႉဝႃႈ ပေႃးဢမ်ႇၵႂႃႉၼႆ တေၶဝ်ႈၺွပ်းဢဝ်ႁင်းၵူၺ်းၼႆၶႃႈ ၵူၼ်းမိူင်းယွၼ်းတွင်းပၢၼ်ႇၵေႃႈဢမ်ႇလႆႈ” လၢတ်ႈၼႄၼင်ႇၼႆ။

သိုပ်ႇလၢတ်ႈၼႄဝႃႈ “ဢၼ်ၶဝ်ၵဵပ်းၼႆႉ တႄႇဢဝ်ပွတ်းၼမ်ႉၸလၢပ်ႉ လူင်းမိူဝ်းထိုင် ပၢင်ၽၢတ်ႇမိူင်းလီပုၼ်ႉဢေႃႈ ၵူၼ်းလူင်ၼႂ်းဝၢၼ်ႈၼႂ်းၼႃးၶဝ်ၵေႃႈ တိုၵ်ႉဢွၼ်ၵၼ်ဢုပ်ႇၵၼ်ယူႇ လွင်ႈဝႃႈၽႂ်တေလႆႈၵႂႃႇၼႆၼၼ်ႉ မၢင်ဝၢၼ်ႈတႄႉ တိုၼ်းဝႃႈဢမ်ႇမီးၵူၼ်းတႃႇၵႂႃႇယဝ်ႉ ၶဝ်သမ်ႉဢထမ်ႇမဢဝ် ပေႃးဢမ်ႇၵႂႃႇတိုၼ်းဢမ်ႇလႆၼႆၶႃႈ” လၢတ်ႈၼင်ႇၼႆ။

တင်ႈတႄႇမိူဝ်ႈပဵၼ်ပၢင်တိုၵ်း 1027 ၼႂ်းၸိုင်ႈတႆးပွတ်းႁွင်ႇယဝ်ႉၼၼ်ႉ မိူၼ်ၼင်ႇ ပွတ်းသႅၼ်ဝီၼႆႉၵေႃႈ ၵူၼ်းမိူင်းမၢင်ၸိူဝ်လႆႈပၢႆႈၽေးပၢင်တိုၵ်း ယင်းပႆႇပွၵ်ႈၵေႃႈမီး ၸုမ်းသိုၵ်းၵူဝ်းၵၢင်ႉၶဝ်သမ်ႉသၢင်ႉၵဵပ်းသိုၵ်း ၵမ်းၼိုင်ႈယဝ်ႉၵမ်းၼိုင်ႈသေ ႁဵတ်းႁႂ်ႈၵူၼ်းမိူင်းယၢပ်ႇၸႂ် တေပၢႆႈၵေႃႈဢမ်ႇၸၢင်ႈပၢႆႈ ၼႆယဝ်ႉ။

လိူဝ်ၼၼ်ႉၼႂ်းဝူင်ႈဝၢင်ႈၼႆႉ သိုၵ်းၵူဝ်းၵၢင်ႉလၢတ်ႈတီႈၵူၼ်းမိူင်းသႅၼ်ဝီ ၸိူဝ်းပၢႆႈၽေပၢင်တိုၵ်းသေ ၵႂႃႇမီးတၢင်ႇတီႈၼၼ်ႉ ႁႂ်ႈပွၵ်ႈၶိုၼ်းႁိူၼ်းၽႂ်မၼ်း သင်ဢမ်ႇပွၵ်ႈၼႆ သိုၵ်းၵူဝ်းၵၢင်ႉ MNDAA တေယိုတ်းသိမ်းလႄႈ ၶဝ်ႈယူႇၼႂ်းႁိူၼ်းၼႆယဝ်ႉ။

တႆးလွတ်ႈလႅဝ်း