သိုၵ်း ဝ UWSA ၶဝ်ႈၵုမ်းၵမ်ဝဵင်းတၢင်ႉယၢၼ်း တေတမ်းပႃးၵၢၼ်ဢုပ်ႉပိူင်ႇ

ၼင်ႇႁိုဝ် ပၢင်တိုၵ်းပေႃးတေဢမ်ႇလၢမ်းၶဝ်ႈ တီႈၼႂ်းပိုၼ်ႉတီႈ ဝဵင်းတင်ႉယၢၼ်း ၼၼ်ႉၼႆသေ ၸုမ်းသိုၵ်း ဝ UWSA လႆႈငူပ်ႉငီႉၵၼ်တင်း သိုၵ်းမၢၼ်ႈယဝ်ႉ ဢဝ်ႁႅင်းသိုၵ်းၶဝ်ႈၵႂႃႇၵုမ်းၵမ်ဝႆႉ တီႈဝဵင်းတၢင်ႉယၢၼ်း လႄႈ တေတမ်းဝၢင်းပႃး ၵၢၼ်ဢုပ်ႉပိူင်ႇ ၼႆယူႇယဝ်ႉ။

မိူဝ်ႈဝႃးဝၼ်းထီႉ 11 July 2024 (လိူၼ်ပႅတ်ႇမႂ်ႇ 6 ၶမ်ႈ ပီႊတႆး 2118 ၼီႈ) ၸုမ်းသိုၵ်းမၢၼ်ႈ လႄႈ ၸုမ်းသိုၵ်း ဝ UWSA ဢုပ်ႇဢူဝ်းငူပ်ႉငီႉၵၼ်ယဝ်ႉသေ တၢင်းၽၢႆႇသိုၵ်း ဝ UWSA ဢဝ်ႁႅင်းသိုၵ်း မွၵ်ႈ 2,000 ၵေႃႉ ၶဝ်ႈၵႂႃႇတီႈ ၼႂ်းဝဵင်းတၢင်ႉယၢၼ်း တႃႇၵုမ်းၵမ်ပႅတ်ႈၼႂ်းပိုၼ်ႉတီႈတင်းမူတ်း လႄႈ တေၸတ်းၵၢၼ်တမ်းဝၢင်းပႃးၵၢၼ်ဢုပ်ႉပိူင်ႇထႅင်ႈ ၼႆယူႇယဝ်ႉ။

ဢူးၺီႇရၢၼ်း ၽူႈၼင်ႈလုမ်းၵပ်းသၢၼ် UWSA ဢၼ်မီးတီႈဝဵင်းလႃႈသဵဝ်ႈၼၼ်ႉ သပ်းလႅင်းလၢတ်ႈတီႈသိုဝ်ႇၶၢဝ်ႇ Yangon Khit Thit ဝႃႈ ၼင်ႇႁိုဝ်ပၼ်ႁႃ ဢၼ်ပဵၼ်ယူႇတီႈ ၼႂ်းမိူင်းတႆးပွတ်းႁွင်ႇ ပေႃးတေဢမ်ႇလၢမ်းၶဝ်ႈထိုင်ၸူး ၼႂ်းပိုၼ်ႉတီႈတၢင်ႉယၢၼ်းၼၼ်ႉ တၢင်းၽၢႆႇၸုမ်းသိုၵ်း ဝ UWSA လႄႈ သိုၵ်းမၢၼ်ႈ လႆႈဢုပ်ႇဢူဝ်းငူပ်ႉငီႉ တူၵ်းလူင်းၵၼ်သေ တၢင်းၽၢႆႇႁဝ်းၶႃႈ လႆႈဢဝ်ႁႅင်းသိုၵ်း ၶဝ်ႈၵႂႃႇဢဝ်တီႈယူႇဝႆႉ ၼႂ်းပိုၼ်ႉတီႈတၢင်ႉယၢၼ်း လႄႈ ၵႅတ်ႇၶႄဝႆႉလူင်ႈၼႃႈ၊ ပၢင်တိုၵ်းဢၼ်ပဵၼ်ယူႇၼႆႉ မုၵ်ႉၸုမ်းႁဝ်းၶႃႈ တိုဝ်းၵမ်ဝႆႉမူႇပိူင် တေဢမ်ႇၸုၵ်းယူႇၽၢႆႇလႂ် လႄႈ လွင်ႈပဵၼ်ပၼ်ႁႃၼၼ်ႉၵေႃႈ မုၵ်ႉၸုမ်းႁဝ်း ဢမ်ႇႁၼ်လီ၊ လွင်ႈၵတ်းယဵၼ်ၼိမ်သဝ်း ၼႂ်းပိုၼ်ႉတီႈတၢင်ႉယၢၼ်းၼႆႉ ယုမ်ႇယမ်ဝႃႈ တေမီးၽွၼ်းလီ တွၼ်ႈတႃႇၵူႈၽၢႆႇၽၢႆႇယူႇ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈၵေႃႈ လၢတ်ႈတီႈသိုဝ်ႇၶၢဝ်ႇ Yangon Khit Thit ၵႂႃႇဝႃႈ မိူဝ်ႈလဵဝ် ၼႂ်းပိုၼ်ႉတီႈတၢင်ႉယၢၼ်းတင်းမူတ်းၼၼ်ႉ ၸုမ်းသိုၵ်းဝ UWSA ၵုမ်းထိင်းယဝ်ႉသေ ၶိုၼ်းႁူပ်ႉထူပ်းၵူၼ်းမိူင်း လႄႈ ၼႂ်းပၢင်ႁူပ်ႉထူပ်းၼၼ်ႉ ၸုမ်းသိုၵ်း ဝ လၢတ်ႈဝႃႈ တေၸတ်းၵၢၼ်တမ်းဝၢင်းၵၢၼ်ဢုပ်ႉပိူင်ႇ ၶွင်မုၵ်ႉၸုမ်း UWSA ၵႂႃႇ ဝႃႈၼႆ။

ၵဵဝ်ႇလူၺ်ႈလွင်ႈၵုမ်းၵမ်ၼႂ်းပိုၼ်ႉတီႈတၢင်ႉယၢၼ်းၼႆႉသေ သိုၵ်းမၢၼ်ႈ လႄႈ ၸုမ်းသိုၵ်း ဝ UWSA ဢုပ်ႇဢူဝ်းၵၼ်သင်လၢႆလၢႆ တူၵ်းလူင်းၵၼ်သင်လၢႆလၢႆ ၼႆၼၼ်ႉ ဢမ်ႇပႆႇမီးၽႂ်ႁူႉၸွမ်း ၼႆယဝ်ႉ။

ၼႂ်းပိုၼ်ႉတီႈဝဵင်းတၢင်ႉယၢၼ်းၼႆႉၵေႃႈ ၸုမ်းသိုၵ်း ဝ UWSA သဵင်ၵွင်ႈဢမ်ႇတႅၵ်ႇသေလုၵ်ႈ ၵုမ်းၵမ်လႆႈၵႂႃႇလီလီငၢမ်းငၢမ်း မိူၼ်ၼင်ႇ ဝဵင်းႁူဝ်ပၢင်ႇ၊ ဝဵင်းပၢင်ႇလူင် ၼၼ်ႉယူႇယဝ်ႉ။

ၸုမ်းသိုၵ်းဝ UWSA ၼႆႉ ပဵၼ်ႁူဝ်ပဝ်ႈ FPNCC မီးလုၵ်ႈၸုမ်းဝႆႉ မိူၼ်ၼင်ႇ TNLA, SSPP, KIA, MNDAA, AA, NDAA ။

တႆးလွတ်ႈလႅဝ်း