မိူဝ်ႈဝၼ်းထီႉ 30 March 2022 (လိူၼ်သီႇလွင်ႈ 14 ၶမ်ႈ ပီႊတႆး 2116 ၼီႈ) သိုၵ်း SSPP တေၵဵပ်းသိုၵ်းမႂ်ႇ ၼႂ်းၼႃႈတီႈၵုမ်းၵမ် ၸႄႈဝဵင်းမၢႆ 4 မိူၼ်ၼင်ႇ ဢိူင်ႇႁၢႆးပႃ၊ ဢိူင်ႇမူၺ်ႇတေႃႉၼွင်ၼိဝ်ႉ၊ ဢိူင်ႇဝဵင်းၵဝ်ႇ၊ ဢိူင်ႇတူယႃး၊ ဢိူင်ႇဝၢၼ်ႈလူၺ် ဝၢၼ်ႈသေႃႉ၊ ဢိူင်ႇၽႃယ၊ ဢိူင်ႇလွႆတင်ႈ တေႃႇထိုင် ဝၢၼ်ႈဝ ၸႄႈဝဵင်းၵႄးသီး ၸိူဝ်းၼႆႉ ယွၼ်ႉၸဝ်ႈၸႄႈဝဵင်းမၢႆ 4 ဢၼ်ၶိင်းမွင်ႇထုၼ်း ဢွၼ်ႁူဝ်ၼၼ်ႉ ႁွင်ႉဢဝ်ပူႇၵႄႇပူႇၵၢင်ႉသေ လၵ်ႉသွတ်ႉသႅတ်ႉႁဵတ်းပၢင်ၵုမ် တႃႇၵဵပ်းသိုၵ်းမႂ်ႇလႄႈ ၵူၼ်းဝၢၼ်ႈၵူၼ်းမိူင်း ဢွၼ်ၵၼ်ပၢႆႈၶဝ်ႈမိူင်းထႆးတင်းၼမ် ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈ လၢတ်ႈဝႃႈ ၸဝ်ႈၸႄႈဝဵင်းမၢႆ 4 ဢၼ်ၶိင်းမွင်ႇထုၼ်း ဢွၼ်ႁူဝ်ၼၼ်ႉ ႁွင်ႉဢဝ်ပူႇၵႄႇပူႇၵၢင်ႉသေ လၵ်ႉသွတ်ႉသႅတ်ႉ ႁဵတ်းပၢင်ၵုမ် တႃႇၵဵပ်းသိုၵ်းမႂ်ႇထႅင်ႈလႄႈ ၶဝ်ယင်းပၢႆလၢတ်ႈဝႃႈ ဢၼ်မီးလုၵ်ႈသွင်ၵေႃႉၼၼ်ႉ ပေႃးပိူၼ်ႈတူၵ်းမႃးၼႆ ႁႂ်ႈႁူႉတူဝ်သေၵႂႃႇပၼ်ၵူႈႁိူၼ်း ယႃႇႁႂ်ႈလႆႈၶဝ်ႈတီႉၺွပ်းဢဝ်ႁင်းၵူၺ်း မၼ်းဢမ်ႇႁၢင်ႈလီ ဝႃႈၼႆဢေႃႈ။

ယင်းသိုပ်ႇလၢတ်ႈထႅင်ႈဝႃႈ ၵူၼ်းမိူင်းတေႉ ယွၼ်ႉမီးလွင်ႈယၢပ်ႇၸႂ်လၢႆပႃႈလၢႆၽၢႆႇ လႄႈ ဢွၼ်ၵၼ်ပၢႆႈသွင်ႉၶဝ်ႈမိူင်းထႆး ၶႂ်ႈဝႃႈၵူႈဝၼ်းယဝ်ႉၶႃႈ လိူဝ်ၼၼ်ႉ ၵၢၼ်သႂ်ႇ ၵၢၼ်ထၢမ်းၵေႃႈၵျၢမ်း တီႈလႂ်ဝၢၼ်ႈလႂ်ၵေႃႈ ၶႂ်ႈဝႃႈပဵၼ်ဝၢၼ်ႈႁၢမ်း ဢိၵ်ႇ တိူၵ်ႇႁႆႈလွၵ်းၼႃးၵေႃႈ ယွၼ်ႉဢမ်ႇမီးၵူၼ်းႁဵတ်းယဝ်ႉလႄႈ ၶႂ်ႈဝႃႈႁၢမ်းၵႂႃႇမူတ်းယဝ်ႉ ပေႃးပဵၼ်ၽူႈၵေႃႉၵွၼ်းၼႃႈႁိူၼ်းၵေႃႉလဵဝ် တေႃႇတူဝ်တႄႉ ၵုမ်ႇလႆႈႁဵတ်းပၼ်ၵၢၼ် ၶဝ်ၵူၺ်း ၸိူဝ်းပဵၼ်လုၵ်ႈလၢင်းပႆႇၵေႃႉယႂ်ႇ ၵမ်ႈၽွင်ႈၵေႃႈ လၵ်ႉၵႂႃႇမီးဝႆႉတီႈၵႆသေ ဢၼ်ပဵၼ်ပေႃႈထဝ်ႈၶဝ် လႆႈၵႂႃႇႁဵတ်းသိုၵ်းၼမ်ႉၸႂ် (သိုၵ်းၵူၼ်းမိူင်း) ပႂ်ႉထႃႈၵေႃႈ ၼမ်ၼႃႇယဝ်ႉ ဝႃႈၼႆ။

ၸူဝ်းၶၢဝ်းယၢမ်း ဢၼ်ၸုမ်းသိုၵ်းလေႃးလႄး SSPP ဢွၼ်ႁူဝ်ၼၼ်ႉ လိုပ်ႈလမ်းတိုၵ်း တပ်ႉသိုၵ်းၸိုင်ႈတႆး RCSS/SSA လၢႆလၢႆပိုၼ်ႉတီႈယဝ်ႉၼႆႉ ႁၼ်ၶဝ်ႁွတ်ႈၽႅဝ် တီႈလႂ်ၵေႃႈ ဢထမ်ႇမ တဵၵ်းယွၼ်းၶဝ်ႈယွၼ်းငိုၼ်း တီႈပေႃႈမႄႈၵူၼ်းမိူင်း ၸီႉသင်ႇ တဵၵ်းႁွင်ႉ ပူႇၵႄႇပူႇၵၢင်ႉ ႁဵတ်းပၢင်ၵုမ် တႃႇၵဵပ်းသိုၵ်းမႂ်ႇၸိူဝ်းၼႆႉ ႁဵတ်းႁႂ်ႈပေႃႈမႄႈ ၵူၼ်းမိူင်းၶဝ် ယူႇယၢပ်ႇၵိၼ်းၶၢၼ်ၸႂ်ဝႆႉတေႉတေႉ ၼႆယဝ်ႉ။

တႆးလွတ်ႈလႅဝ်း