သိုၵ်း SSPP ဢဝ်ၶေႃႈဢၢင်ႈယႃႈမဝ်ႈၵမ်သေ တီႉၺွပ်းၵူၼ်းမိူင်း ယွၼ်းၵႃႈထုတ်ႇတူဝ်

ၵူၼ်းမိူင်း ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ လႆႈထုၵ်ႇတၢင်းၸုမ်းသိုၵ်း SSPP ၶဝ် ဢဝ်ၶေႃႈဢၢင်ႈယႃႈမဝ်းၵမ်သေ လမ်းတီႉၺွပ်းဢဝ်ၵူၼ်းမိူင်းၶင်ၶွၵ်ႈလႄႈ ယွၼ်းႁႂ်ႈတူဝ်ပေႃႈမႄႈပီႈၼွင်ႉ မႃးထုတ်ႇဢဝ်ၶိုၼ်း ဝႃႈၼႆ။

မိူဝ်ႈၼႂ်းဝၼ်းထီႉ 4 September 2022 (လိူၼ်သိပ်းမႂ်ႇ 9 ၶမ်ႈ ပီႊတႆး 2116 ၼီႈ) ၵူၼ်းမိူင်းတၢင်ႉယၢၼ်းၵေႃႉၼိုင်ႈပွင်ႇၶၢဝ်ႇမႃးဝႃႈ ၸုမ်းသိုၵ်း SSPP ဢၼ်ၵုမ်းၵမ် ၼႂ်းၸႄႈဝဵင်းမၢႆ (11) ၼႆႉ ဢဝ်ၶေႃႈဢၢင်ႈဝႃႈ ၵဵဝ်ႇၶွင်ႈယႃႈမဝ်းၵမ်ၼႆသေ တီႉၺွပ်းဢဝ်ၵူၼ်းမိူင်း ဝၢၼ်ႈပၢင်ၼိမ်၊ ၼႃးငူၺ်း၊ ဝၢၼ်ႈၵၢတ်ႇ ပွၵ်ႉၸၢၼ်း ပွၵ်ႉဢွၵ်ႇ၊ ဝၢၼ်ႈၵွင်း ၼႂ်းဢိူင်ႇမိူင်းပၢတ်ႇ ၸႄႈဝဵင်းတၢင်ႉယၢၼ်း ၵႂႃႇသႂ်ႇဝႆႉၼႂ်းၶွၵ်ႈ ၶင် ဢၼ်မီးၽၢႆႇတူၵ်းဝၢၼ်ႈၵေႃႇလႅင် ဢၼ်ၽူႈၵုမ်းၶွၵ်ႈၶင်ပဵၼ် ၸဝ်ႈယူင်း ၼၼ်ႉ ဝႃႈၼႆ။

“မိူဝ်ႈဝၼ်းထီႉ 3 September 2022 ၼၼ်ႉၵေႃႈ SSPP ၶဝ် တီႉၺွပ်းၸႅတ်ႈယဵဝ်ႈ ၵူၼ်းၼႃးငူၺ်း၊ ၵၢတ်ႇၶႅၵ်ႉသေ ၵႃႈၸႅတ်ႈမၼ်းၼိုင်ႈၵေႃႉၼႆႉ လႆႈသဵင်ႈယူႇ 5,000 ပျႃးဢေႃႈ။ ဢမ်ႇဝႃႈယိင်းႁိုဝ်ၸၢႆး ၶဝ်ႁၼ်တီႈလႂ်ၵေႃႈ ၺွပ်းၸႅတ်ႈမူတ်းယဝ်ႉၶႃႈ။ ၶၢဝ်းၼႆႉသမ်ႉ ပဵၼ်ၶၢဝ်းၵၢၼ်ၶၢဝ်းငၢၼ်းလႄႈ ယၢပ်ႇၽိုတ်ႇဝႆႉဢေႃႈ၊ မိူဝ်ႈဢွၼ်တၢင်း တႄႉ ႁဝ်းၶႃႈၵူၼ်းမိူင်းၼႆႉ ႁၢင်ႈဢမ်ႇမီးၸႂ်ပႅင်းၸင်း SSPP ၶဝ်ၼင်ႇၵဝ်ႇ၊ ၵူၺ်းမိူဝ်ႈလဵဝ်တႄႉ ယွၼ်ႉၶဝ်တဵၵ်းတဵင်ပေႉၵိၼ်ၵူၼ်းမိူင်းၼႃႇလႄႈ လီဢိမ်ႇမိူဝ်ႇၼႃႈၶဝ်ၼႃႇယဝ်ႉၶႃႈ” လၢတ်ႈၼင်ႇၼႆ။

သိုပ်ႇလၢတ်ႈထႅင်ႈဝႃႈ “ဢၼ်ၶဝ်ၺွပ်းၵႂႃႇသေ လႆႈဢဝ်ငိုၼ်းၵႂႃႇထုတ်ႇဢဝ်ၼႆႉတႄႉ ပဵၼ်မိူဝ်ႈၼႂ်းလိူၼ်ထူၼ်ႈပႅတ်ႇ August 2022 ၶႃႈဢေႃႈ။ ၶဝ်ၺွပ်းဢဝ်တူဝ် ၸၢႆးထုၼ်းၸိင်ႇ ဝၢၼ်ႈၼႃးငူၺ်း၊ ၸၢႆးဢုင်းၵျေႃႇ ပၢင်ၼိမ်သေ ဢၼ်ပဵၼ်ပေႃႈမႄႈပီႈၼွင်ႉ လႆႈဢဝ်ငိုၼ်းၵႂႃႇထုတ်ႇဢဝ်တူဝ်ၶိုၼ်း ၼိုင်ႈၵေႃႉလႂ် 500,000 ပျႃး လိူဝ်သေၼႆႉယဝ်ႉ ဢၼ်ဢမ်ႇလႆႈႁူႉၸိုဝ်ႈၵေႃႈ မီးထႅင်ႈတင်းၼမ်ယူႇ။ ၼႂ်းဝၼ်းထီႉ 2 September 2022 ၼႆႉၵေႃႈ ၸုမ်းသိုၵ်း SSPP ၶဝ် မိူဝ်းႁွင်ႉဢဝ်ၵူၼ်းမိူင်း ၵႂႃႇႁဵတ်းပၼ်တပ်ႉၶဝ်။ ၽူႈဢွၼ်ႁူဝ်ၶဝ် ဢၼ်မႃးႁွင်ႉၵႂႃႇၼၼ်ႉ ၸိုဝ်ႈႁွင်ႉၸၢႆးၵေႃး ယူႇၽၢႆႇတႂ်ႈၸဝ်ႈထုၼ်းႁတ်း တူၼ်ႈႁုင်းၶႃႈ။ ယႃႈမႃႉ၊ ယႃႈၾိၼ်ႇၸိူဝ်းၼၼ်ႉၵေႃႈ လုၵ်ႉတီႈတူၼ်ႈႁုင်းၼၼ်ႉမႃးလၢႆလၢႆယဝ်ႉၶႃႈ ငဝ်ႈမၼ်းတႄႉႁဵတ်း ပၢႆမၼ်းတႄႉၶိုၼ်းဢဝ်ၶေႃႈဢၢင်ႈယႃႈမဝ်းၵမ်သေ မၢပ်ႇမႂ်ၵိၼ်ငိုၼ်းပိူၼ်ႈ ႁူဝ်သိပ်းႁူဝ်သၢဝ်းမၼ်း” လၢတ်ႈၼႄၼင်ႇၼႆ။

ၼႂ်းၸိုင်ႈတႆးပွတ်းႁွင်ႇၼႆႉ ဝၢႆးသေ RCSS/SSA ထွႆသိုၵ်းဢွၵ်ႇမႃးယဝ်ႉၼၼ်ႉ ယႃႈမဝ်းၵမ်ၵေႃႈလိူင်ႇၽႄႈၼမ်မႃးတေႉတေႉသေ ၸုမ်းသိုၵ်းယိပ်းၵွင်ႈၵၢင်ႇ လၢႆလၢႆၸုမ်းၵေႃႈ ဢဝ်ၶေႃႈဢၢင်ႈယႃႈမဝ်းၵမ်သေ ၵႆႉလႄႇတီႉၺွပ်းဢဝ်ၵူၼ်းမိူင်း ယွၼ်းငိုၼ်းၵႃႈထုတ်ႇတူဝ် ႁဵတ်းပဵၼ်လၢႆးႁႃၵိၼ်ၶဝ်ဝႆႉ ၼႆယဝ်ႉ။

တႆးလွတ်ႈလႅဝ်း