သိုၵ်း TNLA လႄႈ SSPP ဢုပ်ႇဢူဝ်းၵႄႈပၼ်ႁႃၵၼ် တီႈပၢင်သၢင်း

ၸွမ်းၼင်ႇ သိုၵ်း TNLA လႄႈ SSPP တုၵ်းယွၼ်းႁႂ်ႈၸုမ်းသိုၵ်း ဝ UWSA ၸွႆႈၵႄႈလိတ်ႈပၼ် ပၼ်ႁႃၵၢၼ်သိုၵ်း ဢၼ်ပဵၼ်တီႈၼႂ်းၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉၼႆလႄႈ မိူဝ်ႈလဵဝ်လႆႈႁူႉဝႃႈ သွင်ၽၢႆႇဢုပ်ႇဢူဝ်းၵၼ်သေ ပဵၼ်ဢၼ်ၶႅပ်ႉလႅပ်ႈဢွင်ႇမၢၼ်ၵႂႃႇယဝ်ႉ ဝႃႈၼႆ။

မိူဝ်ႈဝၼ်းထီႉ 13 July 2024 (လိူၼ်ပႅတ်ႇမႂ်ႇ 8 ၶမ်ႈ ပီႊတႆး 2118 ၼီႈ) ၸွမ်သိုၵ်း တႃးဢၢႆႈၽူင်း ၵေႃႉပဵၼ်ႁူဝ်ပဝ်ႈ ၸုမ်းသိုၵ်း TNLA လႆႈဢွၼ်ဢဝ်လုၵ်ႈၼွင်ႉ ထႅင်ႈလၢႆလၢႆၵေႃႉ လႄႈ တၢင်းၽၢႆႇၸုမ်းသိုၵ်း SSPP ပဵၼ် ၸွမ်သိုၵ်း ၶုၼ်သႅင် ဢွၼ်ႁူဝ်လုၵ်ႈၸုမ်းသေ ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းပၢင်သၢင်း ၼႂ်းၼႃႈလိၼ်ၵုမ်းၵမ်သိုၵ်း ဝ UWSA ၼႆယဝ်ႉ။

လူၺ်းယေႇဢူး ၵေႃႉပဵၼ်ၽူႈၶၢၼ်ပၢၵ်ႇ ၸုမ်း TNLA လၢတ်ႈတီႈသိုဝ်ႇၶၢဝ်ႇ Burma VJ ၵႂႃႇဝႃႈ ၽွင်းၸုမ်းသိုၵ်းသွင်ၽၢႆႇ TNLA လႄႈ SSPP   ၶဵင်ႈၶႅင်ၵၢၼ်သိုၵ်းၵၼ် ၼႂ်းပိုၼ်ႉတီႈယူႇၼၼ်ႉ ၶွမ်ႇမတီႇဢုပ်ႇဢူဝ်းငူပ်ႉငီႉၵၢၼ်မိူင်း မိူင်းႁူမ်ႈတုမ် FPNCC ဢၼ်မီးသိုၵ်း ဝ UWSA ပဵၼ်ႁူဝ်ပဝ်ႈဝႆႉၼၼ်ႉ ၸတ်းႁဵတ်းပၼ်လွင်ႈႁူပ်ႉထူပ်းၵၼ် လႄႈ ၼႂ်းပၢင်ႁူပ်ႉထူပ်းၼၼ်ႉၵေႃႈ ၽူႈၼမ်းသွင်ၽၢႆႇလႆႈဢုပ်ႇဢူဝ်းၵၼ်သေ ပဵၼ်ဢၼ်ဢွင်ႇမၢၼ်ၶႅပ်ႉလႅပ်ႈၵႂႃႇယဝ်ႉ၊ မိူဝ်းၼႃႈမႃး ၼင်ႇႁိုဝ်ၵူၼ်းသိုၵ်းသွင်ၽၢႆႇ ပေႃးတေဢမ်ႇမီးပၼ်ႁႃၵၼ် ၸိူင်ႉၼႆထႅင်ႈၼၼ်ႉၵေႃႈ သွင်ၽၢႆႇလႆႈတူၵ်းလူင်းၵၼ် ဝႆႉယဝ်ႉ ဝႃႈၼႆ။

ၵဵဝ်ႇလူၺ်ႈလွင်ႈသိုၵ်းသွင်ၽၢႆႇ ႁူပ်ႉထူပ်းဢုပ်ႇဢူဝ်းၵၼ်ၼႆႉ ဢမ်ႇပႆလႆႈႁၼ် တၢင်းၽၢႆႇ SSPP တွပ်ႇလၢတ်ႈတီႈသိုဝ်ႇၶၢဝ်ႇလႄႈ လွင်ႈသွင်ၽၢႆႇဢုပ်ႇသင်ၵၼ်လၢႆလၢႆၼႆၼၼ်ႉၵေႃႈ ဢမ်ႇလႆႈႁူႉၸွမ်း။

မိူဝ်ႈဝၼ်းထီႉ 5 July 2024 ၼၼ်ႉ ၸုမ်းသိုၵ်း SSPP လႄႈ TNLA  ပဵၼ်ပၢင်တိုၵ်းၵၼ် တီႈၼႂ်းၸႄႈဝဵင်းသီႇပေႃႉ ၵျွၵ်ႉမႄးသေ သိုၵ်းသွင်ၽၢႆႇၵုမ်ႇၼႄးတၢင်းၽိတ်းၵၼ် ၵႂႃႇၵႂႃႇမႃးမႃး ထိုင်တီႈၽူႈယႂ်ႇၵူၼ်းလူင် 2 ၸုမ်းလႆႈတႅမ်ႈလိၵ်ႈတၢင်ႇယွၼ်းထိုင်ၵႂႃႇ တီႈ ၸုမ်း UWSA ဢၼ်ပဵၼ်ဝႆႉႁူဝ်ပဝ်ႈ FPNCC ႁႂ်ႈၸွႆႈၵႄႈလိတ်ႈပၼ် ပၼ်ႁႃၵၢၼ်သိုၵ်းသွင်ၸုမ်း ၼႆယဝ်ႉ။

ၶွမ်ႇမတီႇဢုပ်ႇဢူဝ်းငူပ်ႉငီႉၵၢၼ်မိူင်း မိူင်းႁူမ်ႈတုမ် FPNCC ၼႆႉ ၸုမ်းသိုၵ်း KIA, MNDAA, AA, TNLA, SSPP, NDAA, UWSA ပဵၼ်ၽူႈၶဝ်ႈၸုမ်းဝႆႉသေ ၸုမ်းသိုၵ်း ဝ UWSA ပဵၼ်ႁူဝ်ပဝ်ႈဝႆႉၼႆယူႇယဝ်ႉ။

တႆးလွတ်ႈလႅဝ်း