သိုၵ်း TNLA, MNDAA ၸႂ်ႉသိုၵ်းၶၢင် KIA ပိၵ်ႉလုမ်းၵပ်းသၢၼ်

လုမ်းၵပ်းသၢၼ်သိုၵ်းၶၢင် KIA ဢၼ်ပိုတ်ႇဝႆႉတီႈ ဝဵင်းမိူင်းၵူဝ်း လႄႈ တီႈၼမ်ႉၽၵ်းၵႃ ဝဵင်းၵူတ်ႉၶၢႆ ပၢၼ်သိုၵ်းမၢၼ်ႈၵုမ်းၵမ်ၼၼ်ႉ မိူဝ်ႈလဵဝ်ထုၵ်ႇၺႃး ၸုမ်းဢူၺ်းလီၵၼ်ၶိုၼ်း ဢၼ်ပဵၼ်ၸုမ်းသိုၵ်း TNLA, MNDAA ၸီႉသင်ႇႁႂ်ႈပိၵ်ႉဢိုတ်းပႅတ်ႈ ဝႃႈၼႆ။

ၵပ်းၵၢႆႇလူၺ်ႈလွင်ႈၼႆႉ တၢင်းၽၢႆႇၸုမ်းသိုၵ်း TNLA လႆႈသူင်ႇလိၵ်ႈၸူးထႅင်ႈတီႈ ၽူႈမီးပုၼ်ႈၽွၼ်း KIA တီႈဝၢၼ်ႈၼမ်ႉဢုမ် ဝဵင်းမူႇၸေႊၼၼ်ႉဝႃႈ ႁႂ်ႈလႆႈၶၢႆႉၵူၼ်းသိုၵ်းဢွၵ်ႇ ပိုၼ်ႉတီႈၼၼ်ႉသဵင်ႈသဵင်ႈ ၼႂ်းဝၼ်းထီႉ 25 April 2024 ဝႃႈၼႆသေတႃႉ ထိုင်မိူဝ်ႈၼႆႉဝၼ်းထီႉ 26 April 2024 ၸွင်ႇသိုၵ်းၶၢင် KIA ပႃႈၶၢႆႉဢွၵ်ႇပၼ် ၸွမ်းၼင်ႇ TNLA တုၵ်းယွၼ်းၼႆၼၼ်ႉတႄႉ ဢမ်ႇပႆႇလႆႈႁူႉၸွမ်း။

မိူဝ်ႈဝႃးဝၼ်းထီႉ 25 April 2024 လူၺ်းယေႇဢူး ၸုမ်းၽူႈၶၢၼ်ပၢၵ်ႇ သိုၵ်း TNLA လၢတ်ႈတီႈ သိုဝ်ႇၶၢဝ်ႇ Irrawaddy ဝႃႈ လွင်ႈဢၼ်ၵိူတ်ႇၶိုၼ်ႈထႅင်ႈ တီႈဝၢၼ်ႈၼမ်ႉဢုမ် ၸႄႈဝဵင်းမူႇၸေႊၼၼ်ႉ ဢမ်ႇလႆႈႁပ်ႉႁူႉၸွမ်းသင်၊ လွင်ႈၽၢႆႇသိုၵ်း TNLA ယၢမ်ႈႁႄႉႁၢမ်ႈဢမ်ႇပၼ်ႁႂ်ႈသိုၵ်းၶၢင် KIA ပိုတ်ႇလုမ်းၵပ်းသၢၼ် တီႈၼမ်ႉၽၵ်းၵႃ လႄႈ ဢမ်ႇပၼ်သိုၵ်း MNDAA တမ်းဝၢင်းၵၢၼ်ဢုပ်ႉပိူင်ႇ ဝဵင်းၵူတ်ႉၶၢႆၼၼ်ႉ ၽူႈမီးပုၼ်ႈၽွၼ်း သၢမ်ၽၢႆႇသၢမ်ၸုမ်း လႆႈဢုပ်ႇဢူဝ်းၵၼ်သေ ၵႄႈလိတ်ႈပၼ်ႁႃၵၼ်ယဝ်ႉ၊ ႁဝ်းသၢမ်ၸုမ်းၼႆႉ ပဵၼ်ဢူၺ်းလီၵၼ်ၵူၺ်း ဝႃႈၼႆ။

ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇသိုၵ်းၶၢင် KIA ၵေႃႈလၢတ်ႈဝႃႈ လွင်ႈပၼ်ႁႃၼၼ်ႉ ၽူႈမီးပုၼ်ႈၽွၼ်းလၢႆလၢႆၽၢႆႇဢုပ်ႇၵၼ်သေ သူင်ႇၶၢဝ်ႇမႃး ၵေႃႈမီးယူႇ၊ လွင်ႈၼႆႉတႄႉ လႅပ်ႈတေဢမ်ႇၸႂ်ႈတီႈ ၵေႃႇမတီႇငဝ်ႈငုၼ်း TNLA ၸီႉသင်ႇႁႂ်ႈႁဵတ်းၼၼ်ၼင်ႇၵဝ်ႇ မၼ်းတေပဵၼ်ၸိူဝ်းၸၼ်ႉၽၢႆႇတႂ်ႈမၼ်း ႁဵတ်းသၢင်ႈၵူၺ်း၊ ယူႇတီႈတပ်ႉသိုၵ်းၶၢင်တႄႉ ဢမ်ႇၶႂ်ႈမီးဢမ်ႇၶႂ်ႈပဵၼ် ပၼ်ႁႃၼႂ်းၵႄႈၵၢင်ႁဝ်းႁႃးၼင်ႇၵၼ် လႄႈ မီးသင်မႃးၵေႃႈႁဝ်းႁႃးဢုပ်ႇၵၼ်လႆႈယူႇ ဝႃႈၼႆ။

မိူဝ်ႈဝၼ်းထီႉ 24 April 2024 ၽူႈမီးပုၼ်ႈၽွၼ်း KIA ဢၼ်မီးတီႈ ဝၢၼ်ႈၼမ်ႉဢုမ် လၢတ်ႈတီႈသိုဝ်ႇၶၢဝ်ႇၶၢင် Kachin News Agency ဝႃႈ ၸွမ်းၼင်ႇၶေႃႈၸီႉသင်ႇ ပႃႈၼိူဝ်သေ ႁဝ်းလႆႈၶဝ်ႈပၢင်တိုၵ်းသိမ်းပႅတ်ႈပိုၼ်ႉတီႈၼႆႉ လႄႈ လႆႈပၵ်းတပ်ႉဝႆႉယူႇဢွင်ႈတီႈၼႆႉ ဝႃႈၼႆ။

ၸုမ်းသိုၵ်းၶၢင် KIA ၼႆႉသမ်ႉ ပိုတ်းယိုဝ်းၵၼ်တင်းသိုၵ်းမၢၼ်ႈ ၵႄႈၵၢင် မူႇၸေႊ−ၵူတ်ႉၶၢႆသေ သိမ်းလႆႈပိုၼ်ႉတီႈ ဝၢၼ်ႈၼမ်ႉဢုမ်၊ ဝၢၼ်ႈၶူဝ်မုင်း၊ ဝၢၼ်ႈၼမ်ႉၽၵ်းၵႃ၊ ဝၢၼ်ႈတီးမႃး ၸိူဝ်းၼႆႉ လႄႈ ပိုၼ်ႉတီႈၸိူဝ်းၼႆႉသမ်ႉ ပဵၼ်သဵၼ်ႈတၢင်းပၢႆးမၢၵ်ႈမီးဢၼ်ၼိုင်ႈယူႇယဝ်ႉ။

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ မိူဝ်ႈဝၼ်းထီႉ 23 April 2024 ၸုမ်းသိုၵ်းၵူဝ်းၵၢင်ႉ MNDAA ဢၼ် ၶုၼ်သိုၵ်းယၢၼ်ႇႁူႇ လႄႈ ၶုၼ်သိုၵ်းလၢဝ်ႉတွင်း  ဢွၼ်ႁူဝ်ၼၼ်ႉ ၵႂႃႇႁႄႉႁၢမ်ႈ ဢမ်ႇပၼ်သိုၵ်းၶၢင် KIA  ပၵ်းလုမ်းၵပ်းသၼ်တီႈဝဵင်းမိူင်းၵူဝ်း ၼႆယဝ်ႉ။

လုမ်းၵပ်းသၢၼ်သိုၵ်းၶၢင် KIA တီႈဝဵင်းၵူတ်ႉၶၢႆၼၼ်ႉ လႆႈပိုတ်ႇၽုၺ်ႇမႃး မိူဝ်ႈပီႊ 1995 သေ သိုၵ်းမၢၼ်ႈတင်းသိုၵ်းၶၢင် ၶိုၼ်းပဵၼ်ပၢင်တိုၵ်းၵၼ်ၼႂ်းပိုၼ်ႉတီႈႁၢဝ်ႈႁႅင်း လႄႈ ၶိုၼ်းပိၵ်ႉဢိုတ်းလုမ်းၵႂႃႇ မိူဝ်ႈပီႊ 2005 ၵမ်းၼၼ်ႉ ၸုမ်းၵေႃလိၵ်ႈလၢႆးၶၢင် ၵူတ်ႉၶၢႆ ၶိုၼ်းၶဝ်ႈပၵ်းတႅၼ်းတီႈယူႇ လႄႈ ဝၢႆးသေ သိုၵ်း TNLA သိမ်းဝဵင်းၵူတ်ႉၶၢႆလႆႈယဝ်ႉၼၼ်ႉ ၸုမ်းသိုၵ်းၶၢင် KIA ၶိုၼ်းၵႂႃႇပၵ်းလုမ်းဢဝ်တီႈယူႇ လႄႈ ႁဵတ်းႁႂ်ႈသိုၵ်း TNLA ဢမ်ႇႁၢၼ်ႉၸႂ်ဝႃႈၼႆ။

ၸုမ်းသိုၵ်းၶၢင် KIA ၊ သိုၵ်းပလွင်ႈ TNLA လႄႈ သိုၵ်းၵူဝ်းၵၢင်ႉ MNDAA ပဵၼ်ၸုမ်းဢူၺ်းလီၵၼ်လႄႈ မိူဝ်ႈပၢင်တိုၵ်းၽႅၼ်ၵၢၼ်သိုၵ်း 1027 ၼၼ်ႉ ၸုမ်းသိုၵ်းၶၢင် KIA ဢမ်ႇၶဝ်ႈႁူမ်ႈတိုၵ်းၸွမ်း TNLA , MNDAA သေတႃႉ ၵူၺ်းၼႃႈ တိုၵ်းၽႂ်တိုၵ်းမၼ်း ယူႇယဝ်ႉ။

တႆးလွတ်ႈလႅဝ်း