သူႁူႉလွင်ႈ ဝီႇတႃႇမိၼ်ႇ−ၸီႇ (Vitamin-C) မွၵ်ႈၵႃႈႁိုဝ်?

သူႁူႉလွင်ႈ ဝီႇတႃႇမိၼ်ႇ−ၸီႇ (Vitamin-C) မွၵ်ႈၵႃႈႁိုဝ်?

ၽွင်းၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းၸွတ်ႈတူဝ်ႈၵႂႃႇ ၵူႈမိူင်းမိူင်းၼႂ်းလုမ်ႈၾႃႉယူႇၼႆႉ ႁဝ်းၵူႈၵေႃႉၵေႃႈ လႆႈၵူဝ်တိတ်းၸပ်းၸိူဝ်ႉမႅင်းတၢင်းပဵၼ် မိူၼ်ၵၼ်၊ ၵူၺ်းၵႃႈ ၸွမ်းၼင်ႇၶူးမေႃယႃလူင် Professor ၼွၵ်ႈမိူင်းလႄႈ မိူင်းၶႄႇ ဢၼ်ယူတ်းယႃပၼ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် COVID-19 ၼၼ်ႉ လၢတ်ႈဝႃႈ လႆႈၸႂ်ႉယႃႈယႃ ဢၼ်မီးထၢတ်ႈ ဝီႇတႃႇမိၼ်ႇ−ၸီႇ (Vitamin-C) သေ ယူတ်းယႃတင်း ၼမ်လႄႈ ယင်းတိုၵ်းသူၼ်းလၢတ်ႈဝႃႈ ႁႂ်ႈၵိၼ်ပၼ်တၢင်းၵိၼ်ဢၼ်မီးထၢတ်ႈ ဝီႇတႃႇမိၼ်ႇ−ၸီႇ၊ ၵႆႉသုၵ်ႈလၢင်ႉ သီမိုဝ်း လႄႈ ပေႃးဢွၵ်ႇတၢင်းၼွၵ်ႈႁႂ်ႈသႂ်ႇၽႃႈတူမ်းသူပ်း ဢိၵ်ႇ သင်ပဵၼ်လႆႈ ယႃႇၵႂႃႇဢွင်ႈတီႈ ၵူၼ်းၶွၼ်ႈ ၵိုၼ်းၼမ်ၼႆယူႇ၊ ၵူၺ်းၵႃႈ ၶေႃႈၵႂၢမ်း ႁႂ်ႈၵိၼ်ပၼ်တၢင်းၵိၼ်ဢၼ်မီးထၢတ်ႈ ဝီႇတႃႇမိၼ်ႇ−ၸီႇ ဢၼ်ဝႃႈၼၼ်ႉ သူၶဝ်ႁဝ်းႁႃး ပွင်ႇၸႂ်ႁူႉလီမွၵ်ႈၵႃႈႁိုဝ်ယဝ်ႉ?

ၼႂ်းၵၢပ်ႈပၢၼ်မိူဝ်ႈလဵဝ်ၼႆႉ လုၵ်ႈဢွၼ်ႇယိင်းၸၢႆးတႆးႁဝ်းၵေႃႈ ပဵၼ်ၵူၼ်းၶိုတ်းၵၢပ်ႈ မေႃၵႂၢမ်းဢင်းၵိတ်း၊ ၶိုၼ်ႈႁဵၼ်းၸၼ်ႉသုင်ၵေႃႈ ၼမ်မႃးယဝ်ႉလႄႈ ၶေႃႈၵႂၢမ်းဝႃႈ ဝီႇတႃႇမိၼ်ႇ−ၸီႇ ဢၼ်ဝႃႈၼၼ်ႉ တေႁူႉပွင်ႇၸႂ် ၵၼ်ယူႇ၊ မၢင်ၵေႃႉၵေႃႈတေဝႃႈ ပေႃးႁဵတ်းၵၢၼ် ႁိူဝ်ႉဢူၼ်ႈၼူၼ်း၊ ၼၵ်းၸႂ်မႃးယဝ်ႉၼႆ လူဝ်ႇၵိၼ်ပၼ် ထၢတ်ႈ ဝီႇတႃႇမိၼ်ႇ−ၸီႇၸိူဝ်းၼႆႉ၊ ၵၢပ်ႈပၢၼ်မိူဝ်ႈလဵဝ်ၼႆႉ ပေႃးၶႂ်ႈႁႂ်ႈၼိူဝ်ႉၶၢဝ်သႂ်ၼႆၵေႃႈ သမ်းယႃႈယႃ ဝီႇတႃႇမိၼ်ႇ−ၸီႇ ၼႆႉၼႆယဝ်ႉ၊ ယွၼ်ႉၼၼ် ၵဵဝ်ႇလူၺ်ႈလွင်ႈ ထၢတ်ႈဝီႇတႃႇမိၼ်ႇ−ၸီႇသေ သူၶဝ်ႁဝ်းႁႃး ႁူႉပွင်ႇၸႂ်မွၵ်ႈၵႃႈႁိုဝ်၊ ၽွၼ်းလီၽွၼ်းၸႃႉ မီးၸိူင်ႉႁိုဝ်ၼႆၼၼ်ႉ ႁဝ်းၶႃႈမႃးသိုပ်ႇတူၺ်းၵႂႃႇၸွမ်းၵၼ်။

ဝီႇတႃႇမိၼ်ႇ−ၸီႇ (Vitamin-C)  ပဵၼ်ဢီႈသင်?

ဝီႇတႃႇမိၼ်ႇ−ၸီႇဢၼ်ဝႃႈၼႆႉ ပေႃးဢဝ်တီႈပွင်ႇငၢႆႈငၢႆႈဝႃႈၵေႃႈ ပဵၼ်ထၢတ်ႈဝီႇတႃႇမိၼ်ႇ ဢၼ်ၶူၼ်းၶဝ်ႈ လေႃးၵၼ်ၼႂ်းၼမ်ႉလႆႈ (Ascorbic Acid) ဝႃႈၼႆ၊ ၵမ်ႉပႃႈၼမ်တႄႉ ထၢတ်ႈဢၼ်ၼႆႉ လႆႈမႃးတီႈ မၢၵ်ႇၶဝ်ႈတဝ်ႈၼမ်ႉ ဢၼ်မီးထၢတ်ႈသူမ်ႈၼၼ်ႉယဝ်ႉ၊ တူဝ်ယၢင်ႇၸမ်ၸမ်ႁိမ်းႁဝ်း မိူၼ်ၼင်ႇ မၢၵ်ႇၽႃႈ၊ မၢၵ်ႇၸွၵ်း၊ မၢၵ်ႇႁူႈ၊ မၢၵ်ႇၶိူဝ်သူမ်ႈ၊ မၢၵ်ႇသတေႃႇပႄႇရီႇလႄႈ မၢၵ်ႇၽိတ်ႉယူၵ်ႇ ၸႃႉၵႂႃႇၸိူဝ်းၼႆႉ၊ ၵူၺ်းၵႃႈ ဢမ်ႇၸႂ်ႈဝႃႈ တၢင်းၵိၼ်ဢၼ်မီးထၢတ်ႈသူမ်ႈၼၼ်ႉၵူၺ်း တေမီးထၢတ်ႈဝီႇတႃႇမိၼ်ႇ−ၸီႇ၊ တၢင်ႇမဵဝ်းဢၼ်ဢမ်ႇမီးထၢတ်ႈသူမ်ႈၼၼ်ႉၵေႃႈ မီးထၢတ်ႈဝီႇတႃႇမိၼ်ႇ−ၸီႇယူႇ မိူၼ်ၼင်ႇ ႁူဝ်မၼ်း၊ ၽၵ်းၵၢတ်ႇလုင်း၊ ၽၵ်းၵၢတ်ႇမွၵ်ႇသီၶဵဝ် (Broccoli) ၸႃႉၵႂႃႇၸိူဝ်းၼႆႉ။ ယွၼ်ႉဝႃႈၼႂ်းတူဝ်ႁဝ်းၼႆႉ လူဝ်ႇထၢတ်ႈ ဝီႇတႃႇမိၼ်ႇ−ၸီႇ ယူႇၵူႈဝၼ်းလႄႈ ၼိုင်ႈဝၼ်းၼႆႉ ပုၼ်ႈတႃႇၵူၼ်းလူင်ၼိုင်ႈၵေႃႉ တေလႆႈၵိၼ်ပၼ် ဝီႇတႃႇမိၼ်ႇ−ၸီႇ ၽူႈယိင်း 75 mg လႄႈ ၽူႈၸၢႆး 90 mg ၼႆယဝ်ႉ။

မိူဝ်ႈၽုၵ်ႈပႂ်ႉသိုပ်ႇတူၺ်းထႅင်ႈတွၼ်ႈ ၽွၼ်းလီၽွၼ်းၸႃႉ ဝီႇတႃႇမိၼ်ႇ−ၸီႇ

တႆးလွတ်ႈလႅဝ်း