ၸွမ်ၸိုင်ႈ သျီႇၵျိၼ်းၽိင်ႇ ဢွၵ်ႇၼႄတူဝ်တီႈၵူၼ်းတင်းၼမ် ပွၵ်ႈဢွၼ်တၢင်းသုတ်း ဝၢႆးသေလုၵ်ႉတီႈ Uzbekistan ပွၵ်ႈမႃးၶိုၼ်းတီႈမိူင်းၶႄႇယဝ်ႉ ဢမ်ႇမီးၵၢၼ်တူင်ႉၼိုင် သင်လႄႈ လႆႈမီးၶၢဝ်ႇလိုဝ်းဢွၵ်ႇမႃးဝႃႈ တပ်ႉသိုၵ်းၶႄႇ တီႉၺွပ်းၵုမ်းၵမ် ၸွမ်ၸိုင်ႈ သျီႇၵျိၼ်းၽိင်ႇသေ ယိုတ်းဢၢမ်းၼၢတ်ႈၸိုင်ႈမိူင်းၶႄႇ ၼႆယဝ်ႉ။
သိုဝ်ႇၶၢဝ်ႇ Channel News Asia လၢႆးငၢၼ်းဝႃႈ သျီႇၵျိၼ်းၽိင်ႇ ၸွမ်ၸိုင်ႈမိူင်းၶႄႇ လႆႈဢွၵ်ႇၼႄတူဝ်တၢင်းသိုဝ်ႇၶၢဝ်ႇ မိူဝ်ႈဝၼ်းထီႉ 27 September 2022 ဝၢႆးသေ လႆႈတဵတ်ႇယဵၼ်ၵႂႃႇလၢႆဝၼ်း ထိုင်တီႈႁဵတ်းႁႂ်ႈ မီးၶၢဝ်ႇလိုဝ်းဢွၵ်ႇမႃးတင်းၼမ် ၵဵဝ်ႇလူၺ်ႈဢၼႃႇၵၢတ်ႇၵၢၼ်မိူင်း သျီႇၵျိၼ်းၽိင်ႇ ဝႃႈၼႆ။
ၵဵဝ်ႇလူၺ်ႈလွင်ႈၼႆႉသေ သိုဝ်ႇၶၢဝ်ႇမိူင်းၶႄႇၵေႃႈ လႆႈဢွၵ်ႇမႃးပိုၼ်ၽႄႈ Clip Video ႁႂ်ႈႁၼ်ဝႃႈ ၸွမ်ၸိုင်ႈ သျီႇၵျိၼ်းၽိင်ႇ ၵႂႃႇၶဝ်ႈႁူမ်ႈပွႆး Beijing Exhibition Hall သေ မီးၸွမ်ၽွင်းလူင်မိူင်းၶႄႇ Li Keqiang လႄႈ ၽူႈမီးၸၼ်ႉသုင်ထႅင်ႈလၢႆလၢႆၵေႃႉ ၶဝ်ႈႁူမ်ႈၸွမ်း ဝႃႈၼႆ။
တေလႆႈဝႃႈပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်ၸွမ်ၸိုင်ႈ သျီႇၵျိၼ်းၽိင်ႇ ဢွၵ်ႇၼႄတူဝ်တၢင်းသိုဝ်ႇၶၢဝ်ႇ ဝၢႆးသေ ပၢင်ၵုမ်ၶိုၵ်ႉတွၼ်း တီႈ Uzbekistan မိူဝ်ႈဝူင်ႈပူၼ်ႉမႃးၼႆႉလႄႈ လွင်ႈဢၼ် သျီႇၵျိၼ်းၽိင်ႇ တဵတ်ႇယဵၼ်ၵႂႃႇၼႆႉ ပဵၼ်ဢွၼ်ၼႃႈ တေၸတ်းႁဵတ်း ပၢင်ၵုမ်လူင်ၶွမ်ႇမိဝ်ႇၼိတ်ႉၶႄႇ ဢၼ်ၸတ်း ႁဵတ်း 5 ပီႊၼိုင်ႈပွၵ်ႈ ၼႂ်းၵၢင်လိူၼ် October သေ ဢွၼ်ၵၼ်လၢမ်းၶၢတ်ႈဝႃႈ သျီႇၵျိၼ်းၽိင်ႇ တေလႆႈႁပ်ႉလွင်ႈယုၵ်ႉယွင်ႈ တႃႇသိုပ်ႇၶိုၼ်ႈပဵၼ်ၸွမ်ၸိုင်ႈထႅင်ႈ ပဵၼ်ပွၵ်ႈၵမ်း 3 ဢၼ်ဢမ်ႇယၢမ်ႈပဵၼ်မႃးဢွၼ်တၢင်းၼၼ်ႉ ဝႃႈၼႆ။
ၵဵဝ်ႇလူၺ်ႈလွင်ႈၸိူဝ်းၼႆႉ ႁဵတ်းႁႂ်ႈမီးၶၢဝ်ႇလိုဝ်းဢွၵ်ႇမႃးတီႈၼိူဝ် Online တင်းၼမ် ယွၼ်ႉဢွၼ်ၵၼ်လၢမ်းၶၢတ်ႇဝႃႈ မီးၵၢၼ်ယိုတ်းဢၢမ်းၼၢတ်ႈတၢင်းၵၢၼ်မိူင်းလႄႈ ၵၢၼ်သိုၵ်း ႁူမ်ႈပႃး ယိုတ်းဢၢမ်းၼၢတ်ႈတီႈ ၸွမ်ၸိုင်ႈ သျီႇၵျိၼ်းၽိင်ႇ၊ ၸိူဝ်ႉႁိုဝ်ၵေႃႈ လီ ဢမ်ႇမီးလၵ်းထၢၼ်သၢၵ်ႈသေႇ တွၼ်ႈတႃႇတေယွမ်းႁပ်ႉၶၢဝ်ႇလိုဝ်းၸိူဝ်းၼႆႉ လႄႈ ငဝ်ႈႁၢၵ်ႈလွင်ႈတၢင်းဢၼ် ၸွမ်ၸိုင်ႈသျီႇၵျိၼ်းၽိင်ႇ ဢမ်ႇဢွၵ်ႇၼႄတူဝ် ၼၼ်ႉ တေၸၢင်ႈပဵၼ်ယွၼ်ႉလႆႈၵၵ်းတူဝ်း(ၵဵပ်းတူဝ်) ၶၢဝ်းတၢင်း 1 ဝူင်ႈ ၸွမ်းၼင်ႇ ပိူင်ႁႄႉၵင်ႈၸိူဝ်ႉမႅင်းတၢင်းပဵၼ် COVID-19 ၵႃႈၼၼ်ႉၵူၺ်း ဝႃႈၼႆ။
ၽူႈလူင်ႉလႅၼ်ႇၽၢႆႇၵၢၼ်မိူင်းၶႄႇ Carrie Brown ၵေႃႈ ဢမ်ႇယုမ်ႇဝႃႈ မီးလွင်ႈယိုတ်း ဢၢမ်းၼၢတ်ႈၼႂ်းမိူင်းၶႄႇသေ လၢတ်ႈဝႃႈ သင်ၸိူဝ်ႉဝႃႈ ၽူႈမီးဢၢမ်းၼၢတ်ႈၶဝ် မီးလွင်ႈဢမ်ႇပဵင်းပေႃးၸႂ် ၼႂ်းၵၢၼ်ဢွၼ်ႁူဝ်ၶွင် သျီႇၵျိၼ်းၽိင်ႇ ၸိုင် ႁဝ်းတေလႆႈႁၼ်သၢၵ်ႈသေႇမၼ်းယူႇ၊ ၵူၺ်းၵႃႈ ႁဝ်းဢမ်ႇလႆႈႁၼ်လၵ်းထၢၼ် သၢၵ်ႈသေႇသင်သေလွင်ႈ ဝႃႈၼႆ။
တႆးလွတ်ႈလႅဝ်း