သွင်ၵေႃႉၽူဝ်မေး ၺႃးသိုၵ်းမၢၼ်ႈယိုဝ်းတၢႆ

ၵူၼ်းမိူင်း ၼႂ်းၼႃႈႁိူၼ်းလင်ၼိုင်ႈ ပၢႆႈၽေးပၢင်တိုၵ်းသေ ႁႃတီႈလွတ်ႈၽေးလႄႈ ႁဵတ်းႁႆႈႁႃၵိၼ်လဵင်ႉတွင်ႉ တီႈၽၢႆႇတူၵ်း ဝဵင်းၽၢႆၶုၼ်ႇၼၼ်ႉ ထုၵ်ႇသိုၵ်းမၢၼ်ႈ ၵႂႃႇႁူပ်ႉၺႃးသေ ၼိၵ်ႈၸၢၵ်ႈယိုဝ်းတၢႆပႅတ်ႈဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မိူဝ်ႈဝၼ်းထီႉ 23 April 2024 ၽွင်းဢူးမဵဝ်း+မသျႃႉ ဢၼ်ႁဵတ်းႁႆႈႁဵတ်းသူၼ် ၽၢႆႇတူၵ်းဝဵင်းၽၢႆၶုၼ်ႇၼၼ်ႉ သိုၵ်းမၢၼ်ႈသမ်ႉထူဝ်းသိုၵ်းၵႂႃႇလႄႈ ၵႂႃႇႁူပ်ႉၺႃးၶႃသွင်ၵေႃႉပူႇဢွၵ်ႇသေ ၶိုၼ်းတီႉၺွပ်းၼိၵ်ႈၸၢၵ်ႈယဝ်ႉ ဢဝ်ၵွင်ႈယိုဝ်းတၢႆပႅတ်ႈ တင်းၽူဝ်တင်းမေး၊ မိူဝ်ႈလဵဝ်တႄႉၵိုတ်းလုၵ်ႈဢွၼ်ႇၶဝ် 3 ၵေႃႉပီႈၼွင်ႉၵူၺ်းယဝ်ႉ ဝႃႈၼႆ။

မိူဝ်ႈဝၼ်းထီႉ 21 April 2024 ၼၼ်ႉၵေႃႈ ၸုမ်းသိုၵ်းမၢၼ်ႈ တီႉၺွပ်းလႆႈ ၵူၼ်းမိူင်း 2 မုင်ႉႁေႃႁိူၼ်း ဢၼ်တိုၵ်ႉႁဵတ်းႁႆႈႁဵတ်းသူၼ် တီႈၽၢႆႇတူၵ်းဝဵင်းၽၢႆၶုၼ်ႇမိူၼ်ၵၼ် လႄႈ ၶိုၼ်းၼိၵ်ႈၸၢၵ်ႈသေယိုဝ်းတၢႆပႅတ်ႈ ၵူၼ်းၸၢႆး 2 ၵေႃႉ ၼၢင်းယိင်း 1 ၵေႃႉ ၼႆယဝ်ႉ။

တီႈၽၢႆႇတူၵ်းဝဵင်းၽၢႆၶုၼ်ႇၼႆႉ ၸုမ်းသိုၵ်းမၢၼ်ႈ တင်း ၸုမ်းသိုၵ်း PDF ၵႆႉပဵၼ်ပၢင်တိုၵ်းၵၼ် ၽၢႆႇသိုၵ်းမၢၼ်ႈၵေႃႈ ထူဝ်းသိုၵ်းၵႂႃႇပွတ်းတွၼ်ႈၼၼ်ႉ ၼမ်တႄႉတႄႉ ယူႇယဝ်ႉ။

တႆးလွတ်ႈလႅဝ်း