သၢႆသိုၵ်းၸုမ်းသိုၵ်းမၢၼ်ႈ တပ်ႉမ 33 ႁႅင်းသိုၵ်း 100 ဢဝ်ၾႆးၸုတ်ႇၽဝ်တူဝ်လိပ်း ၵူၼ်းဝၢၼ်ႈ 5 ၵေႃႉ ဢိၵ်ႇတင်း လင်ႁိူၼ်းထႅင်ႈမွၵ်ႈ 500 လင်

မိူဝ်ႈဝၼ်းထီႉ 7 April 2022 (လိူၼ်ႁႃႈမႂ်ႇ 7 ၶမ်ႈ ပီႊတႆး 2116 ၼီႈ) သၢႆသိုၵ်းၸုမ်းသိုၵ်းမၢၼ်ႈ တပ်ႉမ 33 ႁႅင်းသိုၵ်း 100 ပၢႆ ၶဝ်ႈၼႂ်းဝၢၼ်ႈယႂႃႇၼၼ်း ၸႄႈဝဵင်းဝႅတ်ႉလႅတ်ႉ တိူင်းၸႄႈၵႅင်းသေ ဢဝ်ၾႆးၸုတ်ႇၽဝ် တူဝ်လိပ်းၵူၼ်းဝၢၼ်ႈ 5 ၵေႃႉ ၼႂ်းၼၼ်ႉပႃး ၵူၼ်းထဝ်ႈဢႃႇယုယႂ်ႇ 1 ၵေႃႉ ၊ ၸုတ်ႇၽဝ်ပႃးႁိူၼ်း ၵူၼ်းဝၢၼ်ႈထႅင်ႈမွၵ်ႈ 500 လင် ၼႆယဝ်ႉ။

သၢႆသိုၵ်းၸုမ်းသိုၵ်းမၢၼ်ႈ တပ်ႉမ 33 ၼႆႉ လုၵ်ႉတၢင်းဝၢၼ်ႈၺွင်ႇငူၵ်ႉသေ တႄႇထူဝ်းသိုၵ်းမႃးမိူဝ်ႈယၢမ်း ၵၢင်ၼႂ်ၸဝ်ႉ 2:30 မူင်း ပိုတ်းယိုဝ်းၵွင်ႈလူင် ၵွင်ႈဢွၼ်ႇယဝ်ႉ ၶဝ်ႈၼႂ်းဝၢၼ်ႈယႂႃႇၼၼ်းလႄႈ တႄႇၸုတ်ႇ ၽဝ်ႁိူၼ်းၵူၼ်းဝၢၼ်ႈ မိူဝ်ႈယၢမ်းၵၢင်ၼႂ်ၸဝ်ႉ 4:00 မူင်း ဝႃႈၼႆ။

ၵူၼ်းဝၢၼ်ႈၼႂ်းပိုၼ်ႉတီႈ ၵေႃႉၼိုင်ႈလၢတ်ႈတီႈသိုဝ်ႇၶၢဝ်ႇဝႃႈ “ဢမ်ႇမီးပၢင်တိုၵ်းသင်သေ ၸုမ်းသိုၵ်းမၢၼ်ႈ ပိုတ်းယိုဝ်းၵွင်ႈလူင်ယဝ်ႉ ၶဝ်ႈၼႂ်းဝၢၼ်ႈမႃးလႄႈ ၵူၼ်းဝၢၼ်ႈၵေႃႈဢွၼ်ၵၼ်ဢွၵ်ႇပၢႆႈ။ ၵွပ်ႈသင်လႄႈ ၶဝ်ႁဵတ်းၸိူင်ႉၼႆဢမ်ႇႁူႉ ၶဝ်ၶဝ်ႈမႃးၼႂ်းဝၢၼ်ႈသေၸုတ်ႇၽဝ် ႁိူၼ်းယေးလႄႈ မိူဝ်းၽွင်းႁဝ်းၶႃႈ တိုၵ်ႉလႅၼ်ႈပၢႆႈယူႇၼၼ်ႉၵေႃႈ ႁၼ်ၵႂၼ်းၾႆးဢွၵ်ႇတင်းၼမ် ယွၼ်ႉဢမ်ႇမီးၽႂ်ၶႄၾႆးလႄႈ ၾႆးၸင်ႇလၢမ်းၵႂႃႇမူတ်း” ဝႃႈၼႆ။

ဝၢၼ်ႈယႂႃႇၼၼ်းၼႆႉ လင်ႁိူၼ်းမီးယူႇမွၵ်ႈ 600 လင်သေ လင်ႁိူၼ်းဢၼ်လႆႈထုၵ်ႇ ၸုမ်းသိုၵ်းမၢၼ်ႈ ၸုတ်ႇၽဝ်မီးယူႇမွၵ်ႈ 500 လင် ၊ ၸုတ်ႇၽဝ်ပႃး တူဝ်လိပ်းၵူၼ်းဝၢၼ်ႈထႅင်ႈ 5 ၵေႃႉ။ ဢၼ်လႆႈထုၵ်ႇတင်း ၸုမ်းသိုၵ်းမၢၼ်ႈၸုတ်ႇၽဝ်ၼႆႉပဵၼ် ၵူၼ်းထဝ်ႈဢႃႇယုယႂ်ႇ 1 ၵေႃႉ၊ ၼၢင်းယိင်း 2 ၵေႃႉလႄႈ ၵူၼ်းၸၢႆး 2 ၵေႃႉ ၊ တူဝ်သတ်းလဵင်ႉၵူၼ်းမိူင်း မိူၼ်ၼင်ႇ ပႄႉ 37 တူဝ်၊ ဝူဝ်း 29 တူဝ်၊ မူ 16 တူဝ် လႄႈ ႁူင်းလဵင်ႉၵႆႇ ၸိူဝ်းၼႆႉၵေႃႈ လႆႈထုၵ်ႇၾႆးမႆႈပႃးထႅင်ႈ ဝႃႈၼႆ။

တႆးလွတ်ႈလႅဝ်း