သၢႆသိုၵ်း သိုၵ်းမၢၼ်ႈထုၵ်ႇတိုၵ်းယိုဝ်းတီႈဝဵင်းတီႇ​ပႄးယိၼ်း​လႄႈ ၽၢႆႇသိုၵ်းမၢၼ်ႈလူႉတၢႆတင်းၼမ်

မိူဝ်ႈဝၼ်းထီႉ  7 July 2022 (လိူၼ်ပႅတ်ႇမႂ်ႇ 10 ၶမ်ႈပီႊတႆး 2116ၼီႈ) ယၢမ်းတၢမ်းၶမ်ႈ 18:30 မူင်း သၢႆသိုၵ်းၶွင်ႇသီႇသိုၵ်းမၢၼ်ႈ ဢဵၼ်ႁႅင်းမွၵ်ႈ 40 ​ၵေႃႉၼႆႉ တပ်ႉၵႅတ်ႇ​ၶႄၵူၼ်းမိူင်း ၸႂ်ႉလၢႆးသိုၵ်းမုတ်း​သေ ပႂ်ႉတိုၵ်း​ၼႂ်း​ၵႄႈၵၢင်ဝၢၼ်ႈ​မႄး​တႄး ​လႄႈဝၢၼ်ႈဝပႃ ယၢၼ်ၵႆ ၽၢႆႇတူၵ်းဝဵင်းတီႇ​ပႄးယိၼ်း 2 လၵ်း  ၽၢႆႇသိုၵ်းမၢၼ်ႈ လုတၢႆမွၵ်ႈ 12 ​ၵေႃႉၼႆႉဝႃႈၼႆ။

ၽူႈမီးပုၼ်ႈၽွၼ်းၼႂ်းၸုမ်း DRPA ​ၵေႃႉၼိုင်ႈလၢတ်ႈ​ၼေဝႃႈ “ သၢႆသိုၵ်းသိုၵ်းမၢၼ်ႈၼႆႉ ဢဵၼ်ႁႅင်းၶဝ်​တေမီးမွၵ်ႈ 40 ​ၵေႃႉၼႆႉၶႃႈ​ဢေႃႈ ၊ ႁဝ်းၶႃႈလႆႈငိၼ်းၶၢဝ်ႇဝႃႈ သၢႆသိုၵ်းၶဝ်လုၵ်ႉတၢင်းဝဵင်းတီႇ​ပႄးယိၼ်း​သေဢွၵ်ႇမႃးၼႆ​လႄႈ ႁဝ်းၶႃႈၸင်ႇပႂ်ႉမူၵ်း​တိုၵ်း ၼႂ်း​ၵႄႈၵၢင်ဝၢၼ်ႈ ​မႄး​တႄး ​လႄႈ ဝပႃ ​သေ ၽၢႆႇသိုၵ်းမၢၼ်ႈ လုတၢႆမွၵ်ႈ 12 ​ၵေႃႉၼႆႉယူႇ ၊ တူဝ်တၢႆၵူၼ်းသိုၵ်းၶဝ်​တႄႉ ​တေႃႇထိုင်မိူဝ်ႈလဵဝ် ဢမ်ႇႁၼ်မႃးၵဵပ်းၶႃႈ ၼႂ်းဢဵၼ်ႁႅင်းၶဝ် 40 ​ၵေႃႉၼႆႉ ​တေလုတၢႆ မွၵ်ႈ12 ​ၵေႃႉ ၊ ဢၼ်လႆႈတၢင်း မၢတ်ႇၸဵပ်းႁၢဝ်ႈႁႅင်း​တႄႉ တေမီး 5 ​ၵေႃႉ ၽၢႆႇၼႃႈ​ၵေႃႈဢမ်ႇႁတ်းၵႂႃႇ၊ တၢင်းလင်​ၵေႃႈဢမ်ႇႁတ်းထွႆ ၸိူဝ်းၶဝ်ပဵၼ်ဝႆႉၸိူင်ႉၼၼ်​ဢေႃႈ ´´ လၢတ်ႈ​ၼႄၼင်ႇၼႆ။

ၼႂ်းဢၼ်ၸုမ်းၵႅတ်ႇ​ၶႄၵူၼ်းမိူင်း လႆႈႁူမ်ႈႁွမ်းၵၼ်​သေ ပႂ်ႉမူၵ်းတိုၵ်းသိုၵ်းမၢၼ်ႈၼႆႉ ​တေမီးမိူၼ်ၼင်ႇ ၸုမ်းDRPA ၊ ၸုမ်း ပူဝ်ႇမူၵ်ႉသဵၵ်ႉ​လႄႈ တပ်ႉFRF ‌‌ၸႄႈတွၼ်ႈသူၺ်ႇပူဝ်ႇတပ်ႉၵွင် (24) လႄႈတပ်ႉၵွင် (12)  ၊ ၸုမ်း Galaxy Force ပၵၽတီႇပႄးယိၼ်း ၸိူဝ်းၼႆႉႁူမ်ႈၵၼ်​သေ တိုၵ်းယိုဝ်းဝႃႈၼႆ။

တႆးလွတ်ႈလႅဝ်း