ဢမေႇရိၵၢၼ်ႇလႄႈ ၾီႇလိပ်ႇပိၼ်ႇ ၽိုၵ်းၽွၼ်ႉသိုၵ်းႁူမ်ႈၵၼ် လူၺ်ႈမၢၵ်ႇၵွင်ႈတေႉ

မိူဝ်ႈဝၼ်းထိႉ 13 October 2022 တပ်ႉသိုၵ်း ဢမေႇရိၵၢၼ်ႇ လႄႈ ၾီႇလိပ်ႇပိၼ်ႇ လႆႈၽိုၵ်းၽွၼ်ႉသိုၵ်းႁူမ်ႈၵၼ် လူၺ်ႈၸႂ်ႉတိုဝ်းမၢၵ်ႇၵွင်ႈဢၼ်တေႉလႄႈ ပဵၼ်ၵၢၼ်ၽိုၵ်းၽွၼ်ႉ သိုၵ်း ပွၵ်ႈဢွၼ်တၢင်းသုတ်း ၽၢႆႇတႂ်ႈၸွမ်ၸိုင်ႈၾီႇလိပ်ႇပိၼ်ႇဢွၼ်ႁူဝ်ဝႆႉ ၼႆယူႇ။

ၾီႇလိပ်ႇပိၼ်ႇ လႄႈ ဢမေႇရိၵၢၼ်ႇ ၼၼ်ႉ လႆႈၽိုၵ်းၽွၼ်ႉသိုၵ်းႁူမ်ႈၵၼ် ႁိမ်းၽင်ႇပၢင်ႇလၢႆႇ ၸွမ်းလွႆ ဢၼ်ယူႇၽၢႆႇႁွင်ႇ ဝဵင်းလူင်မၼီႇလႃႇၼၼ်ႉလႄႈ ၵၢၼ်ၽိုၵ်းၽွၼ်ႉသိုၵ်းပွၵ်ႈၼႆႉ မီးၸိုဝ်ႈဝႃႈ “Kamandag” ဢၼ်မီးတီႈပွင်ႇဝႃႈ “ၵၢၼ်ႁူမ်ႈမိုဝ်းၽူႈႁတ်းငၢၼ်တီႈၼႂ်းပၢင်ႇလၢႆႇၵႂၢင်ႈ” ၼႆသေ ပဵၼ်ၵၢၼ်ၽိုၵ်းၽွၼ်ႉသိုၵ်း ဢၼ်ၸတ်းႁဵတ်းယူႇၵူႈပီႊ လႄႈ တေသုတ်းသဵင်ႈၵႂႃႇ မိူဝ်ႈၼႆႉ ဝၼ်းထီႉ 14 October 2022 ၼႆယဝ်ႉ။

ၵၢၼ်ၽိုၵ်းၽွၼ်ႉသိုၵ်းပွၵ်ႈၼႆႉ မီးသိုၵ်းဢမေႇရိၵၢၼ်ႇ 2,550 ၵေႃႉလႄႈ သိုၵ်းၾီႇလိပ်ႇပိၼ်ႇ 530 ၵေႃႉ ၶဝ်ႈႁူမ်ႈသေ မီးၵၢၼ်ၽိုၵ်းၽွၼ်ႉသိုၵ်းၼိူဝ်လိၼ်၊ ယိုဝ်းမၢၵ်ႇၵွင်ႈတေႉ၊ ၸွႆႈထႅမ်လွင်ႈပူၼ်ႉပႅၼ်သုၼ်ႇလႆႈၵူၼ်း ၸိူဝ်းၼႆႉယဝ်ႉ။ တပ်ႉသိုၵ်းတင်းသွင်ၽၢႆႇၼၼ်ႉၵေႃႈ လႆႈၸၢမ်းယိုဝ်းပဝ်ႉမၢႆ လူၺ်ႈၸႂ်ႉၵွင်ႈလူင် HIMARS ၶိူင်ႈၵွင်ႈၵၢင်ႇၶိုတ်းၵၢပ်ႈ ဢၼ်လႆႈသူင်ႇၵႂႃႇပၼ်တီႈယူႇၶရဵၼ်းၼၼ်ႉပႃး ယူႇယဝ်ႉ။

လၢတ်ႈလႆႈဝႃႈ ပဵၼ်ၵၢၼ်ၽိုၵ်းၽွၼ်ႉသိုၵ်းႁူမ်ႈၵၼ် ဢၼ်ယူႇၽၢႆႇတႂ်ႈ ၸွမ်ၸိုင်ႈၾီႇလိပ်ႇပိၼ်ႇ  Ferdinand Marcos ၼႆႉ လႆႈဝႃႈပဵၼ်ပၢၼ်ဢၼ်ၶဝ်ႈႁႃဢမေႇရိၵၢၼ်ႇ ၼမ်လိူဝ်သေ ၸွမ်ၸိုင်ႈၵေႃႉၵဝ်ႇ  Rodrigo Duterte ၵေႃႉဢၼ်ယၢမ်ႈလၢတ်ႈထိုင် ဢမေႇရိၵၢၼ်ႇဢမ်ႇလီလႄႈ ယၢမ်ႈလွၵ်ႇငိူတ်ႈ တတ်းၶၢတ်ႇလွင်ႈၸမ်ၸႂ်ၵၼ်ပႃးသေ ယင်းၶဵင်ႈၶႅင်တေႃႇၵၢၼ်ၽိုၵ်းၽွၼ်ႉ သိုၵ်းႁူမ်ႈၵၼ် တင်းဢမေႇရိၵၢၼ်ႇ တွၼ်ႈတႃႇတေဢမ်ႇႁဵတ်းႁႂ်ႈ ၶႄႇဢမ်ႇႁၢၼ်ႉၸႂ်ၼၼ်ႉ ၼႆယဝ်ႉ။

တႆးလွတ်ႈလႅဝ်း