ဢမေႇရိၵၢၼ်ႇ−သိင်ႇၵပူဝ်ႇ−ထႆး ၽိုၵ်းၽွၼ်ႉသိုၵ်းႁူမ်ႈၵၼ် ၼႂ်းပၢင်ႇလၢႆႇထႆး

တႃႇသၢင်ႈလွင်ႈမၼ်ႈၼိမ်သဝ်းၼႂ်းပၢင်ႇလၢႆႇၼႆသေ တပ်ႉၼမ်ႉဢမေႇရိၵၢၼ်ႇ၊ သိင်ႇၵပူဝ်ႇ လႄႈ ထႆး လႆႈၽိုၵ်းၽွၼ်ႉသိုၵ်းႁူမ်ႈၵၼ် ၼႂ်းၼႃႈၼမ်ႉပၢင်ႇလၢႆႇထႆး ဝႃႈၼႆ။

မိူဝ်ႈဝႃးဝၼ်းထီႉ 18 July 2024 (လိူၼ်ပႅတ်ႇမႂ်ႇ 13 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းတပ်ႉၼမ်ႉ ဢမေႇရိၵၢၼ်ႇ၊ သိင်ႇၵပူဝ်ႇ လႄႈ ထႆး လႆႈတႄႇၽိုၵ်းၽွၼ်ႉ သိုၵ်းႁူမ်ႈၵၼ် ဢၼ်မီးၸိုဝ်ႈဝႃႈ MULTILATERAL CARAT 2024 သေ တေၽိုၵ်းၽွၼ်ႉ ၵႂႃႇတေႃႇထိုင် ၼႂ်းဝၼ်းထီႉ 25 July 2024 လႄႈ လႆႈၽိုၵ်းၽွၼ်ႉတီႈတႃႈႁိူဝ်း ၼႂ်းပိုၼ်ႉ တီႈၸႄႈဝဵင်းသတ်ႉတႃႇႁိပ်ႇ ၸႄႈတွၼ်ႈၶျူၼ်းပူးရီး ဢိၵ်ႇတင်း တီႈႁိမ်းပၢင်ႇလၢႆႇ ဢၢဝ်ႇထႆးပွတ်းၼိူဝ်သေ လႆႈမီးႁိူဝ်း၊ ႁိူဝ်းမိၼ်၊ တရူၼ်း ဢိၵ်ႇတင်း ႁႅင်းၵူၼ်းသိုၵ်း တင်း 3 ၸိုင်ႈမိူင်း ႁူမ်ႈ 1,100 ၵေႃႉ လႆႈၶဝ်ႈႁူမ်ႈၽိုၵ်းၽွၼ်ႉၵႂႃႇ ၼႆယဝ်ႉ။

ယိူင်းဢၢၼ်းဢၼ်လႆႈၽိုၵ်းၽွၼ်ႉသိုၵ်းႁူမ်ႈၵၼ်ပွၵ်ႈၼႆႉ ပိူဝ်ႈတႃႇသၢင်ႈလွင်ႈမိုတ်ႈ ၵိုဝ်းၸမ်ၸႂ်ၵၼ် လႄႈ ႁူမ်ႈၵၼ်ပူၵ်းပွင်ၼမ်ႉၵတ်ႉၵူၼ်းသိုၵ်းတင်း 3 ၸိုင်ႈမိူင်း ၼႂ်းၵၢၼ်တူင်ႉၼိုင် ၼႂ်းပၢင်ႇလၢႆႇႁူမ်ႈၵၼ် ဢိၵ်ႇတင်း ပိၼ်ႇပၢႆႇလႅၵ်ႈလၢႆႈတၢင်းႁူႉ လႄႈ ပွင်ႇၸႂ်ၼႂ်းၵၢၼ်တူင်ႉၼိုင် တေႃႇပေႃးထိုင် ၵၢၼ်ယုၵ်ႉၸၼ်ႉငဝ်းလၢႆး ၼႂ်းပၢင်ႇလၢႆႇ ႁႂ်ႈမၼ်းၵွင်ႉၵဵဝ်ႇၵၼ်တင်း ငဝ်းလၢႆးလုမ်ႈၾႃႉယၢမ်းၽွင်းတေႃႈလဵဝ် ဝႃႈၼႆ။

တႆးလွတ်ႈလႅဝ်း