ဢမေႇရိၵၢၼ်ႇ မီးၽႅၼ်တေတင်ႈမၢၵ်ႇမိတ်ႉသႆး ၼႂ်းမိူင်းၵျႃႇပၢၼ်ႇ

မိူဝ်ႈဝၼ်းထီႉ 4 February 2023 (ဝၼ်းလိူၼ်သၢမ်မူၼ်း ပီႊတႆး 2117 ၼီႈ) သိုဝ်ႇၶၢဝ်ႇ Sankei ၵျႃႇပၢၼ်ႇ လၢႆးငၢၼ်း ၽၢႆႇတၢင်းလူင်ပွင်ၸိုင်ႈဢမေႇရိၵၢၼ်ႇ မီးၽႅၼ်  တေတင်ႈမၢၵ်ႇမိတ်ႉသႆးပၢၼ်ၵၢင် တီႈၼႂ်းမိူင်းၵျႃႇပၢၼ်ႇ တႃႇယုၵ်ႉၸၼ်ႉၵၢၼ်သိုၵ်း တုမ်ႉတွပ်ႇၶိုၼ်းဢႃႇၼႃႇၶႄႇ ၼႂ်းပၢင်ႇလၢႆႇပွတ်းဢွၵ်ႇ လႄႈ ပၢင်ႇလၢႆႇၶႄႇ ပွတ်းၸၢၼ်း ၼႆယဝ်ႉ။

လၢႆးငၢၼ်းၼႆႉ ဢၢင်ႈဢိင်မႃးတီႈ လႅင်ႇၶၢဝ်ႇၵူၼ်းဢၼ်ယူႇၸမ်တင်း ၽၢႆႇလွင်ႈၸမ်ၸႂ် ဢမေႇရိၵၢၼ်ႇ လႄႈ ၵျႃႇပၢၼ်ႇ ၼၼ်ႉဝႃႈ ၵၢၼ်သူင်ႇဢဵၼ်ႁႅင်းသိုၵ်းဢမေႇရိၵၢၼ်ႇ ၶဝ်ႈၵႂႃႇပၵ်းသဝ်းၼႂ်းမိူင်းၵျႃႇပၢၼ်ႇၼၼ်ႉ တေၸၢင်ႈမီးပႃးၶိူင်ႈၵွင်ႈၵၢင်ႇ မၢၵ်ႇမိတ်ႉသႆးဝႆးၽႂ်းလိူဝ်သဵင် သႅၼ်းယိုဝ်းၸမ်လႄႈ မၢၵ်ႇၼူၾႆး ၸိူဝ်းၼႆႉသေ ၽၢႆႇတၢင်းလူင်ပွင်ၸိုင်ႈၵျႃႇပၢၼ်ႇၵေႃႈ ၼႄၽၢင်ႁၢင်ႈ ၽွမ်ႉတူဝ်ႈတၼ်း တႃႇဢုပ်ႇဢူဝ်းလွင်ႈၼႆႉၸွမ်းဢမေႇရိၵၢၼ်ႇၼၼ်ႉ မိူၼ်ၵၼ်  ၼႆယဝ်ႉ။

သမ်ႉဝႃႈသိုဝ်ႇၶၢဝ်ႇၼႆႉ ဢမ်ႇလႆႈလၢတ်ႈၼႄႁူဝ်ယွႆႈမၼ်း လွင်ႈၶိူင်ႈယိပ်းၵွင်ႈၵၢင်ႇ ၼႆႉသေတႃႉ မိူၼ်တင်းၼႄႁႂ်ႈႁၼ်ဝႃႈ ၵျႃႇပၢၼ်ႇၼၼ်ႉၵေႃႈ တေၸၢင်ႈပၼ်ၶႂၢင်ႉ ႁႂ်ႈဢမေႇရိၵၢၼ်ႇ မႃးႁဵတ်းသၢင်ႈၵႂႃႇလႆႈယူႇၼႆ ၼၼ်ႉယဝ်ႉ။

ၵျႃႇပၢၼ်ႇ လႄႈ ဢမေႇရိၵၢၼ်ႇၼၼ်ႉ တင်းသွင်ၽၢႆႇၵေႃႈ ၶႂ်ႈၽိူမ်ႉထႅမ်ၼမ်ႉၵတ်ႉၽၢႆႇၵၢၼ်သိုၵ်း ၼႂ်းပိုၼ်ႉတီႈၸွမ်းၵုၼ်လၢႆလၢႆတီႈ ဢၼ်မိူၼ်ပဵၼ်လႅၼ်လိၼ် ၼႂ်းပၢင်ႇလၢႆႇပွတ်းဝၼ်းဢွၵ်ႇ လႄႈ ပၢင်ႇလၢႆႇပွတ်းဝၼ်းတူၵ်း ၶွင်သမုတ်ႉတြႃႇပႄႇသိၾိၵ်ႇ ဢၼ်ယူႇႁိမ်းၸမ်ထႆႇဝၼ်ႇၼၼ်ႉ ၼႆယဝ်ႉ။

တႆးလွတ်ႈလႅဝ်း