ဢမေႇရိၵၢၼ်ႇ ယုၵ်ႉၸၼ်ႉၼမ်ႉၵတ်ႉတပ်ႉသိုၵ်း ၼႂ်းမိူင်းၵျႃႇပၢၼ်ႇ

တႃႇယုၵ်ႉၸၼ်ႉၼမ်ႉၵတ်ႉတပ်ႉသိုၵ်းဢမေႇရိၵၢၼ်ႇ ဢၼ်ပၵ်းတပ်ႉယူႇ ၼႂ်းမိူင်းၵျႃႇပၢၼ်ႇၼၼ်ႉၼႆသေ ၽၢႆႇတၢင်းဢမေႇရိၵၢၼ်ႇ တေသူင်ႇႁိူဝ်းမိၼ်တိုၵ်းသႅၼ်းမႂ်ႇလၢႆသိပ်းလမ်း ႁူမ်ႈၵႃႈၶၼ်သၢင်ႉငိုၼ်းမွၵ်ႈ 10,000 လၢၼ်ႉတေႃႇလႃႇ ၶဝ်ႈၵႂႃႇၼႂ်းမိူင်းၵျႃႇပၢၼ်ႇ ၼႆယဝ်ႉ။

သိုဝ်ႇၶၢဝ်ႇ TNN World ဢွၵ်ႇဝႆႉ မိူဝ်ႈဝႃးဝၼ်းထီႉ 5 July 2024 (လိူၼ်ပႅတ်ႇမႂ်ႇ 1 ၶမ်ႈ ပီႊတႆး 2118 ၼီႈ) ၵဵဝ်ႇလူၺ်ႈလွင်ႈႁွင်ႈၵၢၼ်လူင်ၽၢႆႇၵႅတ်ႇၶႄဢမေႇရိၵၢၼ်ႇ သပ်းၸႅင်ႈၶၢဝ်ႇဝႃႈ ၽႅၼ်ၵၢၼ်ယုၵ်ႉၸၼ်ႉတပ်ႉသိုၵ်းဢမေႇရိၵၢၼ်ႇ ၼႂ်းမိူင်းၵျႃႇ ပၢၼ်ႇၼၼ်ႉ တေပဵၼ်ၶူင်းၵၢၼ်လၢႆပီႊတၢင်းၼႃႈၼႆႉသေ တေသူင်ႇႁိူဝ်းမိၼ်တိုၵ်း F-35A တင်းမူတ်း 48 လမ်း ၵႂႃႇတႅၼ်းတီႈ F-16 တႃႇ 36 လမ်း တီႈၼႂ်းတပ်ႉၵၢင်ႁၢဝ် Misawa မိူင်းၵျႃႇပၢၼ်ႇပွတ်းႁွင်ႇ ယဝ်ႉဢမ်ႇၵႃး ယင်းတေသူင်ႇႁိူဝ်းမိၼ်သႅၼ်းမႂ်ႇ F-15EX တႃႇ 36 လမ်း ၵႂႃႇတီႈတပ်ႉၵၢင်ႁၢဝ် Kadena တီႈၵုၼ် Okinawa မိူင်းၵျႃႇပၢၼ်ႇ ပွတ်းၸၢၼ်း တႃႇၵႂႃႇတႅၼ်းတီႈ F-15C/D 48 လမ်း ဢၼ်လႆႈထွၼ်ဢွၵ်ႇၼႂ်းပွတ်း တွၼ်ႈၼႆႉ မိူဝ်ႈပီႊ 2023 ၼၼ်ႉ ၼႆယဝ်ႉ။

တေႃႈၼင်ႇၼၼ် ႁိူဝ်းမိၼ်တိုၵ်း F-35B ဢၼ်မီးတီႈတပ်ႉၵၢင်ႁၢဝ် Iwakuni ၼႂ်းၵုၼ် Hiroshima မိူင်းၵျႃႇပၢၼ်ႇၼၼ်ႉၵေႃႈ တေမႄးၵုပ်းလုမ်းလႃးထႅင်ႈ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽူႈတၢင်လၢတ်ႈလူင်ပွင်ၸိုင်ႈၵျႃႇပၢၼ်ႇ လႆႈလၢတ်ႈဝႃႈ လွင်ႈဢဝ်ႁိူဝ်းမိၼ်သႅၼ်းမႂ်ႇ ၶဝ်ႈမႃးတူင်ႉၼိုင်ၼႂ်းမိူင်းၵျႃႇပၢၼ်ႇၼႆႉ တေပဵၼ်ၵၢၼ် ယုၵ်ႉၸၼ်ႉၼမ်ႉၵတ်ႉတပ်ႉသိုၵ်းဢမေႇရိၵၢၼ်ႇ ၼႂ်းၽွင်းယၢမ်းဢၼ်မီးလွင်ႈသုၵ်ႉ ယုင်ႈၽၢႆႇလွင်ႈမၼ်ႈၼိမ်သဝ်း တႄႇၸဵမ်မိူဝ်ႈသိုၵ်းလုမ်ႈၾႃႉပွၵ်ႈၵမ်း 2 လႄႈ လွင်ႈမိူင်းႁိမ်းႁွမ်းတိူဝ်းၵၢၼ်တူင်ႉၼိုင်ၽၢႆႇၵၢၼ်သိုၵ်း ၵွပ်ႈၼၼ် လွင်ႈၼႆႉတေပဵၼ် ၵၢၼ်ယုၵ်ႉၸၼ်ႉလွင်ႈၵႅတ်ႇႁႄႉ လႄႈ ၼမ်ႉၵတ်ႉၵၢၼ်တုမ်ႉတွပ်ႇ ဢမေႇရိၵၢၼ်ႇ တင်းၵျႃႇပၢၼ်ႇ ဝႃႈၼႆ။

ၼႂ်းၽွင်းယၢမ်းဢၼ်ၶႄႇ၊ ရၢတ်ႉသျႃး လႄႈ ၵူဝ်းရီးယႃးႁွင်ႇ မီးၽၢင်ႁၢင်ႈပဵၼ်ၽေး တေႃႇၵျႃႇပၢၼ်ႇတိူဝ်းၼမ်ၶိုၼ်ႈမႃးၼၼ်ႉ ၼိုင်ႈၶႅၼ်းႁဵတ်းႁႂ်ႈဢမေႇရိၵၢၼ်ႇ ဝႆႉၼမ်ႉ ၼၵ်းၵျႃႇပၢၼ်ႇ ဢၼ်ပဵၼ်မိူင်းဢူၺ်းလီၼႂ်းပွတ်းတွၼ်ႈၼႆႉ တိူဝ်းၼမ်ၶိုၼ်ႈမႃး မိူၼ်ၵၼ် ၼႆယဝ်ႉ။

ၵျႃႇပၢၼ်ႇၼႆႉ မီးလွင်ႈထဵင်မေႃးၸွမ်းရၢတ်ႉသျႃး ၵဵဝ်ႇလူၺ်ႈလွင်ႈလႅၼ်လိၼ် တီႈမိူင်းရၢတ်ႉသျႃးပွတ်းႁွင်ႇ၊ ၽၢႆႇတၢင်းၶႄႇ သမ်ႉတေပဵၼ်တီႈၼႂ်းပၢင်ႇလၢႆႇၶႄႇ ပွတ်းဢွၵ်ႇသေ သမ်ႉပဵၼ်ၽွင်းဢၼ်ၵူဝ်းရီးယႃးႁွင်ႇ တိူဝ်းၸၢမ်းမၢၵ်ႇမိတ်ႉသႆး ဢမ်ႇထၢတ်ႇဢမ်ႇဝၢႆးၼၼ်ႉ ဝႃႈၼႆ။

တႆးလွတ်ႈလႅဝ်း