ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ယိုဝ်းမၢၵ်ႇမိတ်ႉသႆးတုမ်ႉတွပ်ႇ ဝၢႆးသေ ၵူဝ်းရီးယႃးႁွင်ႇ ၸၢမ်းယိုဝ်းမၢၵ်ႇမိတ်းသႆးထႅင်ႈ

သိုဝ်ႇၶၢဝ်ႇ Reuters လၢႆးငၢၼ်းဝႃႈ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ႁူမ်ႈၵၼ် ယိုဝ်းမၢၵ်ႇမိတ်ႉသႆးတုမ်ႉတွပ်ႇၶိုၼ်း ဝၢႆးသေ ၵူဝ်းရီးယႃးႁွင်ႇ လႆႈယိုဝ်းမၢၵ်ႇမိတ်ႉသႆး ၵႂႃႇတီႈၼႂ်းၼႃႈၾႃႉၵျႃႇပၢၼ်ႇ မိူဝ်ႈဝၼ်းထီႉ 4 October 2022 ပူၼ်ႉမႃးၼႆႉသေ ထႅင်ႈၽၢႆႇၼိုင်ႈၵေႃႈ ဢမေႇရိၵၢၼ်ႇ လႆႈတမ်းပၵ်းသဝ်းႁိူဝ်းတၢင်ႇႁိူဝ်းမိၼ် ႁိမ်းႁွမ်းပွတ်းဝၼ်းဢွၵ်ႇၵူဝ်းရီးယႃးႁွင်ႇထႅင်ႈ ဝႃႈၼႆ။

လွင်ႈတူင်ႉၼိုင် ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်းပွၵ်ႈၼႆႉ တေလႆႈဝႃႈ ပဵၼ် ၵၢၼ်တုမ်ႉတွပ်ႇၶိုၼ်းႁၢႆႉႁႅင်းတီႈသုတ်း ၼႂ်းၵၢၼ်ၸၢမ်းယိုဝ်းမၢၵ်ႇမိတ်ႉသႆး ၶွင်ၵူဝ်းရီးယႃးႁွင်ႇ ၼႂ်းႁွပ်ႈ 5 ပီႊသေ၊ ၽွင်းလူင်ၽၢႆႇၼွၵ်ႈမိူင်း ဢမေႇရိၵၢၼ်ႇ Anthony Blinken ၵေႃႈ လႆႈပၼ်ၾၢင်ႉဝႃႈ လူင်ပွင်ၸိုင်ႈၵူဝ်းရီးယႃးႁွင်ႇ  တေထုၵ်ႇၺႃးလွင်ႈသႄႉၼႄးလႄႈ ယူႇႁင်းၶေႃလိူဝ်သေၵဝ်ႇ သင်ၸိူဝ်ႉ တိုၵ်ႉမီးလွင်ႈသူၼ်းၵဝ်း ဝႃႈၼႆ။

မိူဝ်ႈဝၼ်းထီႉ 4 October 2022 ပူၼ်ႉမႃးၼၼ်ႉ ၵူဝ်းရီးယႃးႁွင်ႇ လႆႈယိုဝ်းမၢၵ်ႇမိတ်ႉသႆးပွႆႇတူဝ် 1 လုၵ်ႈ ၶဝ်ႈၵႂႃႇၼႂ်းၼႃႈၾႃႉၵျႃႇပၢၼ်ႇသေ သူင်ႇၽွၼ်းတုမ်ႉယွၼ်ႈႁႂ်ႈ လူင်ပွင်ၸိုင်ႈၵျႃႇပၢၼ်ႇ လႆႈၸီႉသင်ႇၶၢႆႉၵူၼ်းမိူင်း ၼႂ်းၸႄႈတွၼ်ႈ Hokkaido လႄႈ ၸႄႈတွၼ်ႈ Aomori way ၼင်ႇၶိုၵ်ႉၶၵ်ႉ ဝႃႈၼႆ။

မိူဝ်ႈဝၼ်းထီႉ 5 October 2022 ပူၼ်ႉမႃးၼႆႉၵေႃႈ ၵူဝ်းရီးယႃးၸၢၼ်း လႄႈ ဢမေႇရိၵၢၼ်ႇ လႆႈတုမ်ႉတွပ်ႇၵႂႃႇၶိုၼ်းလူၺ်ႈ ယိုဝ်းမၢၵ်ႇမိတ်ႉသႆးလၢႆလုၵ်ႈ လူင်းၼႂ်းပၢင်ႇလၢႆႇ ၸွမ်းၼင်ႇၶေႃႈသင်ႇ ၽူႈၵုမ်းၸီႉသင်ႇတပ်ႉသိုၵ်းၵူဝ်းရီးယႃး ၸၢၼ်းသေ ဢွၼ်တၢင်းၼႆႉၵေႃႈ ၵူဝ်းရီးယႃးၸၢၼ်း လႄႈ ဢမေႇရိၵၢၼ်ႇ လႆႈၸၢမ်း ပွႆႇမၢၵ်ႇသေဢမ်ႇၵႃး လႆႈသူင်ႇႁိူဝ်းမိၼ်တိုၵ်း ၵႂႃႇတီႈၼႂ်းပၢင်ႇလၢႆႇလိူင်ထႅင်ႈ ဝႃႈၼႆ။

ၼွၵ်ႈလိူဝ်သေၼႆႉယဝ်ႉ ႁိူဝ်းတၢင်ႇႁိူဝ်းမိၼ်ဢမေႇရိၵၢၼ်ႇ Ronald Reagan တေထုၵ်ႇဢဝ်ၵႂႃႇတူင်ႉၼိုင်ၼႂ်းပၢင်ႇလၢႆႇ ဢၼ်မီးၼႂ်းၵႄႈၵၢင် ၵူဝ်းရီးယႃး လႄႈ ၵျႃႇပၢၼ်ႇ ဝၢႆးသေႁိူဝ်းတၢင်ႇႁိူဝ်းမိၼ်လမ်းၼႆႉ ဢွၵ်ႇၶၢဝ်းတၢင်းၵႂႃႇတီႈ ၵူဝ်းရီးယႃးၸၢၼ်း ပွၵ်ႈဢွၼ်တၢင်းသုတ်း ၼႂ်းႁွပ်ႈလၢႆပီႊ မိူဝ်ႈလိူၼ်ပူၼ်ႉမႃးၼႆႉ ဝႃႈၼႆ။

မိူဝ်ႈၼႆႉ ဝၼ်းထီႉ 6 October 2022 သိုဝ်ႇၶၢဝ်ႇၼွၵ်ႈမိူင်းလၢႆးငၢၼ်းဝႃႈ ၽူႈၵွၼ်းသိုၵ်း ၵူဝ်းရီးယႃးၸၢၼ်းလၢႆလၢႆၵေႃႉ ႁူမ်ႈၵၼ်ဢွၵ်ႇမႃးလၢတ်ႈဝႃႈ ထူပ်းႁၼ်ၵူဝ်းရီးယႃး ႁွင်ႇ ယိုဝ်းမၢၵ်ႇမိတ်ႉသႆးသႅၼ်းယိုဝ်းၸမ် 2 လုၵ်ႈ ၵႂႃႇတူၵ်းတီႈၼႂ်းပၢင်ႇလၢႆႇပွတ်း ဝၼ်းဢွၵ်ႇသေ လၢမ်းၶၢတ်ႈဝႃႈ လႆႈလုၵ်ႉတီႈႁိမ်းႁွမ်းလႅၼ်လိၼ် Samseok ဢၼ်မီး ၼႂ်းဝဵင်းလူင် Pyongyang လႄႈ တေႃႇၼိုင်ႈလုၵ်ႈၼၼ်ႉ လႆႈထုၵ်ႇယိုဝ်းႁၢင်ႇၵၼ် 20 မိၼိတ်ႉ ဝႃႈၼႆ။

သိုပ်ႇလၢတ်ႈထႅင်ႈဝႃႈ မိူဝ်ႈဢၼ်ၵူဝ်းရီးယႃးၸၢၼ်း ယင်းတိုၵ်ႉပႂ်ႉတူၺ်းငဝ်းလၢႆးၼင်ႇ ၶိုတ်းၸမ်ၼၼ်ႉ ၵူဝ်းရီးယႃးၸၢၼ်းၵေႃႈ ၽွမ်ႉတူဝ်ႈတၼ်း တွၼ်ႈတႃႇႁူမ်ႈမိုဝ်းၸွမ်း ဢမေႇရိၵၢၼ်ႇၼင်ႇတဵမ်ထူၼ်ႈယူႇ ၼႆယဝ်ႉ။

လွင်ႈဢၼ်ၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆးသႅၼ်းယိုဝ်းၸမ် 2 လုၵ်ႈ ၵႂႃႇတူၵ်းၼႂ်းပၢင်ႇလၢႆႇပွတ်းဝၼ်းဢွၵ်ႇၼၼ်ႉ ႁဵတ်းႁႂ်ႈလွင်ႈၶဵင်ႈၶႅင်ၼႂ်းသမုတ်ႉတရႃႇ ၵူဝ်းရီးယႃးႁၢႆႉႁႅင်းမႃးလႄႈ ဢၼ်ၵူဝ်းရီးယႃးႁွင်ႇလႆႈၸၢမ်းယိုဝ်းၵႂႃႇၼႆႉ ပဵၼ်ဝၢႆးသေ ဢမေႇရိၵၢၼ်ႇ သူင်ႇႁိူဝ်းတိုၵ်းၵႂႃႇတူင်ႉၼိုင် တီႈၽင်ႇပၢင်ႇလၢႆႇၵူဝ်းရီးယႃးလႄႈ လႆႈယိုဝ်းမၢၵ်ႇမိတ်ႉသႆးတုမ်ႉတွပ်ႇၶိုၼ်းၼၼ်ႉ ဝႃႈၼႆ။

ၽွင်းလူင်ၽၢႆႇၼွၵ်ႈမိူင်း ဢမေႇရိၵၢၼ်ႇ Anthony Blinken ၵေႃႈလႆႈလၢတ်ႈၵႂႃႇ မိူဝ်ႈဢၼ်တိုၵ်ႉယူႇၼႂ်းမိူင်း Chile ဝႃႈ ဢမေႇရိၵၢၼ်၊ ၵူဝ်းရီးယႃးၸၢၼ်းလႄႈ ၵျႃႇပၢၼ်ႇ တေႁဵတ်းသၢင်ႈၵၢၼ်ႁူမ်ႈၵၼ်ၼင်ႇၶိုတ်းၸမ် တွၼ်ႈတႃႇၽိူမ်ႉထႅမ်လွင်ႈ ၵႅၼ်ႇၶႅင် ၼႄႁႂ်ႈႁၼ်ထိုင်ၼႂ်းလွင်ႈၵႅတ်ႇၶႄႁႄႉၵင်ႈ လႄႈ ႁႄႉႁၢမ်ႈ သင်ၸိူဝ်ႉ ၵူဝ်းရီးယႃးႁွင်ႇၶဝ်ႈပူၼ်ႉပႅၼ်၊ လၢတ်ႈထႅင်ႈဝႃႈ လူင်ပွင်ၸိုင်ႈၵူဝ်းရီးယႃးႁွင်ႇ ထုၵ်ႇလီဝၢႆႇၼႃႈမႃးဢုပ်ႇဢူဝ်းၵၼ်ၼိူဝ်ၽိူၼ် တႅၼ်းတၢင်တီႈတေၸၢမ်းယိုဝ်း ၶိူင်ႈယိပ်းၵွင်ႈၵၢင်ႇ ၼႆယဝ်ႉ။

ပႅၵ်ႉသမ်ႉဝႃႈ ၶႄႇ တင်းရၢတ်ႉသျႃး ဢမ်ႇႁၼ်လီလွင်ႈတေၸတ်းႁဵတ်းပၢင်ၵုမ် သေတႃႉ ၶွင်ႇသီႇၽၢႆႇႁူမ်ႇလူမ်ႈ ၸၢတ်ႈၸိုင်ႈလုမ်ႈၾႃႉ လႆႈႁွင်ႉပိုတ်ႇပၢင်ၵုမ် ၼႂ်းဝၼ်းသုၵ်း ထီႉ 7 October 2022 တွၼ်ႈတႃႇတေၵႂႃႇဢုပ်ႇဢူဝ်းၵူဝ်းရီးယႃးႁွင်ႇ ၸွမ်းၼင်ႇ ၶေႃႈတုၵ်းယွၼ်း ဢမေႇရိၵၢၼ်ႇ ဝႃႈၼႆ။

ၽွင်းတၢင်သုင်သုတ်းၶွင်ဢမေႇရိၵၢၼ်ႇ ၽၢႆႇတၢင်းဢေးသျႃးပွတ်းဝၼ်းဢွၵ်ႇ Daniel Kritenbrink လႆႈၵၢဝ်ႇၼႄး ၶႄႇ လႄႈ ရၢတ်သျႃးဝႃႈ ဢမ်ႇလႆႈၸႂ်ႉၵၢၼ်ပၼ်တၢမ်ႇ ၵူဝ်းရီးယႃးႁွင်ႇၼင်ႇၵိုင်ႇတၢၼ်ႇလႄႈ ၽူႈမီးပုၼ်ႈၽွၼ်းၵူဝ်းရီးယႃးၸၢၼ်းၵေႃႈ လႆႈလၢတ်ႈဝႃႈ ၵူဝ်းရီးယႃးႁွင်ႇ ထိုင်ၶၵ်ႉတွၼ်ႈၵၢၼ်ႁၢင်ႈႁႅၼ်း လွင်ႈၸၢမ်းယိုဝ်းမၢၵ်ႇ ၼိဝ်းၶလီးယႃးယဝ်ႉ ဝႃႈၼႆ။

သိုဝ်ႇၶၢဝ်ႇ Reuters လၢႆးငၢၼ်းဝႃႈ ၵူဝ်းရီးယႃးၸၢၼ်း ဢွၵ်ႇမႃးယိုၼ်ယၼ်လၢတ်ႈဝႃႈ မၢၵ်ႇမိတ်ႉသႆး Hyunmoo 2C ၶွင်ၵူဝ်းရီးယႃးၸၢၼ်းလုၵ်ႈၼိုင်ႈ လႆႈမီးပၼ်ႁႃ ၼႂ်းၵၢၼ်ၸၢမ်းယိုဝ်း ဝၢႆးသေယိုဝ်းဢွၵ်ႇပိုၼ်ႉတီႈၵႂႃႇဢမ်ႇႁိုင်သင်ၼၼ်ႉ လႆႈတူၵ်းလူင်းၶိုၼ်း ၵူၺ်းၵႃႈ ဢမ်ႇမီးၵူၼ်းလႆႈတၢင်းမၢတ်ႇၸဵပ်းသင်ၼင်ႇၵဝ်ႇ ဝႃႈၼႆ။

မၢၵ်ႇမိတ်ႉသႆး Hyunmoo 2C ၼႆႉ တေလႆႈဝႃႈ ပဵၼ်မၢၵ်ႇမိတ်ႉသႆးၵူဝ်းရီးယႃးၸၢၼ်း ဢၼ်မီးၽူႈၶူၼ်ႉၶႂႃႉၶဝ်လၢတ်ႈဝႃႈ မီးလွင်ႈတိူဝ်ႉယမ်ပဝ်ႉမၢႆလႆႈသုင်လႄႈ လူင်ပွင်ၸိုင်ႈၵူဝ်းရီးယႃးၸၢၼ်းၼၼ်ႉ လူဝ်ႇၼႂ်းၵၢၼ်ၸႂ်ႉတိုဝ်း တွၼ်ႈတႃႇတုမ်ႉတွပ်ႇၶိုၼ်း ၵူဝ်းရီးယႃးႁွင်ႇ သင်ၸိူဝ်ႉပဵၼ်ပၢင်တိုၵ်းၵၼ်မႃး ၼႆယဝ်ႉ။

တႆးလွတ်ႈလႅဝ်း