ဢမေႇရိၵၢၼ်ႇ ဢဝ်ႁိူဝ်းမိၼ်မႃးႁပ်ႉၶိုၼ်းၵူၼ်းမိူင်းၶဝ် ၸိူဝ်းၵိုတ်းယူႇတီႈမိူင်းႁူမ်ႈတုမ်

မိူဝ်ႈဝႃးဝၼ်းထီႉ 6 April 2020 ၼၼ်ႉ လူင်ပွင်ၸိုင်ႈ ဢမေႇရိၵၢၼ်ႇ သူင်ႇႁိူဝ်းမိၼ် မႃးႁပ်ႉၶိုၼ်း ၵူၼ်းမိူင်းၶဝ် (267) ၵေႃႉ ၸိူဝ်းၵိုတ်းယူႇတီႈမိူင်းႁူမ်ႈတုမ် တီႈတႃႈႁိူဝ်းမိၼ် ဝဵင်းတႃႈၵုင်ႈၼႆယဝ်ႉ။

လွင်ႈဢၼ်သူင်ႇၵူၼ်းမိူင်း ဢမေႇရိၵၢၼ်ႇပွၵ်ႈၶိုၼ်းပွၵ်ႈၵမ်းၼႆႉၵေႃႈ ယူႇတီႈလုမ်းၽွင်းတၢင် မိူင်းဢမေႇရိၵၢၼ်ႇ ဢၼ်မီးတီႈဝဵင်းတႃႈၵုင်ႈ လႆႈၸွႆႈထႅမ်ဝႆႉသေ ယွၼ်းသူးဝႆႉပၼ်ပႃး ၽွင်းယၢမ်းယၢပ်ႇၽိုတ်ႇ လူင်ၸိူင်ႉၼႆၼႆႉ ၵူၼ်းမိူင်းဢမေႇရိၵၢၼ်ႇ ၸိူဝ်းပွၵ်ႈမိူဝ်းႁိူၼ်းတင်းသဵင်ႈ ႁႂ်ႈလႆႈၶီႇၶိူင်ႈမိၼ် လွတ်ႈၽေးၵၼ်ၵူႈၵေႃႉလႄႈ ငိၼ်းၸူမ်းၶွပ်ႈၸႂ်ထိုင် ၽူႈမီးပုၼ်ႈၽွၼ်း ၸဝ်ႈၼႃႈတီႈၼႂ်းမိူင်းႁူမ်ႈတုမ် ဢၼ်ၸွႆႈထႅမ်ပၼ်ပွၵ်ႈၵမ်းၼႆႉယူႇၼႆယဝ်ႉ။

ၸွမ်းၼင်ႇၶႅပ်းႁၢင်ႈဢၼ်လုမ်းၽွင်းတၢင် မိူင်းဢမေႇရိၵၢၼ်ႇတၢင်ႇဝႆႉၼၼ်ႉတႄႉ တေလႆႈႁၼ်ဝႃႈ ၽွင်းတၢင် မိူင်းဢမေႇရိၵၢၼ် သၵွတ်ႉ မႃႇသႄႇလ် (Scot Marciel) လႄႈ ၵူၼ်းႁဵတ်းၵၢၼ်လုမ်း ဢၼ်ယူႇတီႈ လုမ်းၽွင်းတၢင် မိူင်းဢမေႇရိၵၢၼ်ႇ ဢၼ်မီးတီႈဝဵင်းတႃႈၵုင်ႈ ဢွၼ်ၵၼ်ၵႂႃႇသူင်ႇထိုင်တီႈ တႃႈႁိူဝ်းမိၼ်ယူႇ။

လိူဝ်ၼၼ်ႉၵေႃႈ ၼမ်ႉလႄႈ ၶိူင်ႈၵမ်ႉၵႅမ်လွင်ႈမူတ်းသႂ်၊ ၶိူင်ႈၵမ်ႉၵႅမ်တႃႇယူတ်းယႃတၢင်းပဵၼ် COVID-19  လႄႈ လွင်ႈပၼ်ပိုၼ်ႉႁူႉတႃႇႁႄႉၵင်ႈၸိူဝ်ႉမႅင်းတၢင်းပဵၼ် COVID-19 ၸိူဝ်းၼႆႉ ယူႇတီႈၸုမ်း USAID တေၸွႆႈထႅမ် ငိုၼ်း 3.8 လၢၼ်ႉ ငိုၼ်းတေႃႇလႃႇဢမေႇရိၵၢၼ်ႇၼႆ လႆႈပၼ်ၵႂၢမ်းမၼ်ႈၵႅၼ်ႇဝႆႉတီႈ လုမ်းၽွင်းတၢင် မိူင်းဢမေႇရိၵၢၼ်ႇ ဝႃႈၼင်ႇၼႆ။

ပုၼ်ႈတႃႇ မေႃယႃၸိူဝ်းဢၼ်ယူတ်းယႃပၼ်တၢင်းပဵၼ်ယူႇၼၼ်ႉၵေႃႈ ယူႇတီႈၸုမ်းၵုမ်းထိင်းႁႄႉၵင်ႈ ၸိူဝ်ႉမႅင်းတၢင်းပဵၼ် မိူင်းဢမေႇရိၵၢၼ်ႇ (CDC) လႆႈၸွႆႈထႅမ် ၶိူင်ႈၵမ်ႉၵႅမ်ပၢႆးယူႇလီ တႃႇသၢင်ႉငိုၼ်း 176 လၢၼ်ႉ ငိုၼ်းတေႃႇလႃႇဢမေႇရိၵၢၼ်ႇ ဝႆႉယူႇ ၼႆယဝ်ႉ။

တေႃႇထိုင် ၶၢဝ်းယၢမ်းမိူဝ်ႈလဵဝ် တီႈၼႂ်းမိူင်းႁူမ်ႈတုမ် မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 (22) ၵေႃႉ၊ လူႉတၢႆ (1) ၵေႃႉသေ တူဝ်ႈတင်းလုမ်ႈၾႃႉၼႆႉသမ်ႉ မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ဝႆႉ ၼိုင်ႈလၢၼ်ႉပၢႆ၊ ၼႂ်းၼၼ်ႉ မိူင်းဢမေႇရိၵၢၼ်ႇ ပဵၼ်မိူင်းထီႉၼိုင်ႈ ဢၼ်မီးၵူၼ်းတိတ်းၸပ်းၸိူဝ်ႉမႅင်း တၢင်းပဵၼ် ၼမ်လိူဝ်ပိူၼ်ႈ ၼႂ်းလုမ်ႈၾႃႉၼႆႉၼႆယဝ်ႉ။

တႆးလွတ်ႈလႅဝ်း