ဢိင်ႇသၼ်ႇတီႈမိူင်းတူႇရၵီႇ လႄႈ မိူင်းသီးရီးယႃး ထႅင်ႈ

တီႈလႅၼ်လိၼ် မိူင်းတူႇရၵီႇ လႄႈ မိူင်းသီးရီးယႃး ပိုၼ်ႉတီႈဢၼ်ဢိင်ႇသၼ်ႇႁၢဝ်ႈႁႅင်း မိူဝ်ႈသွင်ဝူင်ႈပူၼ်ႉမႃးၼၼ်ႉ ၶိုၼ်းမႃးသၼ်ႇဝႆထႅင်ႈပွၵ်ႈၼိုင်ႈ ၼႆယဝ်ႉ။

မိူဝ်ႈဝၼ်းထီႉ 20 February 2023 (လိူၼ်သီႇမႂ်ႇ 2 ၶမ်ႈ ပီႊတႆး 2117 ၼီႈ) ၼႆႉ ၽၢႆႇပၵ်းတႃပႂ်ႉတူၺ်းလွင်ႈဢိင်ႇသၼ်ႇပွတ်းတွၼ်ႈယူးရူပ်ႇ EMSC လၢတ်ႈဝႃႈ  ဢိင်ႇသၼ်ႇပွၵ်ႈၼႆႉ မီးႁႅင်းသၼ်ႇဝႆယူႇတီႈ 6.4 Magnitude ႁႅင်းသၼ်ႇဝႆ တူမ်ႉယွၼ်ႈထိုင် ၼႂ်းမိူင်းတူႇရၵီႇပွတ်းၸၢၼ်း၊ သီးရီးယႃး၊ ဢီႇၵျိပ်ႉ လႄႈ လေႇပႃႇၼွၼ်ႇ ၼႆယဝ်ႉ။

ဢိင်ႇသၼ်ႇပွၵ်ႈၼႆႉၵေႃႈ ႁဵတ်းႁႂ်ႈမီးၵူၼ်းလူႉသဵင်ႈတၢႆထႅင်ႈယဝ်ႉ 3 ၵေႃႉလႄႈ မၢတ်ႇၸဵပ်းဢမ်ႇယွမ်း 200 ၵေႃႉ သေ လၢမ်းၶၢတ်ႈဝႃႈ ယင်းတိုၵ်ႉမီးၵူၼ်းဢၼ်ဢမ်ႇပႆႇထူပ်းႁၼ်ထႅင်ႈယူႇ ၼႆယဝ်ႉ။

ယွၼ်ႉဢိင်ႇသၼ်ႇသွင်ပွၵ်ႈ မိူဝ်ႈသွင်ဝူင်ႈပူၼ်ႉမႃးၼၼ်ႉ ႁဵတ်းႁႂ်ႈၵူၼ်းလူႉသဵင်ႈတၢႆ ၼႂ်းမိူင်းတူႇရၵီႇ ဢမ်ႇယွမ်း 41,000 ၵေႃႉ လႄႈ ၼႂ်းမိူင်းသီးရီးယႃးၼၼ်ႉၵေႃႈ ၸမ်ၸမ် 5,000 ၵေႃႉ လိူဝ်ၼၼ်ႉ တီႈယူႇတၼ်းသဝ်းလင်ႁိူၼ်း၊ ႁိူၼ်းတိူၵ်ႈ လူႉသုမ်းဢမ်ႇယွမ်း 385,000 လင်၊ ယင်းၵိုတ်းထႅင်ႈၵူၼ်းတင်းၼမ် ဢၼ်ႁႃဢမ်ႇပႆႇထူပ်း ၼႆယဝ်ႉ။

တႆးလွတ်ႈလႅဝ်း