ဢိတ်ႇသရေး သင်ႇၶၢႆႉၵူၼ်းမိူင်းဢွၵ်ႇပိုၼ်ႉတီႈၵႃႇၸႃႉပွတ်းၸၢၼ်း

လွင်ႈဢိတ်ႇသရေး ဢွၵ်ႇၶေႃႈသင်ႇၶၢႆႉၵူၼ်းမိူင်းၼပ်ႉႁူဝ်သႅၼ် ဢွၵ်ႇပိုၼ်ႉတီႈ ၵႃႇၸႃႉပွတ်းၸၢၼ်း လႄႈ ၵူၼ်းမိူင်းၸွမ်းလႅၼ်လိၼ် လေႇပႃႇၼွၼ်ႇ−ဢိတ်ႇသရေး ၵေႃႈ လႆႈပၢႆႈၽေးၼပ်ႉႁူဝ်မိုၼ်ႇ။

ၸွမ်းၼင်ႇသိုဝ်ႇၶၢဝ်ႇ VOA ဢွၵ်ႇဝႆႉ မိူဝ်ႈၼႆႉဝၼ်းထီႉ 3 July 2024 (လိူၼ်ၸဵတ်းလွင်ႈ 12 ၶမ်ႈ ပီႊတႆး 2118 ၼီႈ) ၵဵဝ်ႇလူၺ်ႈလွင်ႈ ၽူႈတၢင်လၢတ်ႈ ၽူႈၼမ်းၼႂ်းၵူႈလွင်ႈ လွင်ႈၸၢတ်ႈၸိုင်ႈလုမ်ႈၾႃႉ လႆႈလၢတ်ႈဝႃႈ ၶေႃႈသင်ႇဢိတ်ႇသရေး ဢၼ်သင်ႇႁႂ်ႈ ၵူၼ်းမိူင်းၶၢႆႉဢွၵ်ႇၼႂ်းပိုၼ်ႉတီႈ ဢၼ်မီးတၢင်းၵႂၢင်ႈ 117 လွၵ်းၵီႇလူဝ်ႇမီႇတိူဝ်ႇပၼ်ႇမူၼ်း (square kilometers) တီႈၼႂ်းဝဵင်း Khan Younis လႄႈ ဝဵင်း Rafah ၼၼ်ႉ တုမ်ႉတိူဝ်ႉတေႃႇၵူၼ်းမိူင်းၼႂ်းပိုၼ်ႉတီႈၵႃႇၸႃႉ 3 ပုၼ်ႈ 1 ပုၼ်ႈ သေ တေလႆႈဝႃႈ ပဵၼ်ၶေႃႈသင်ႇ ၶၢႆႉၵူၼ်းမိူင်းဢွၵ်ႇပိုၼ်ႉတီႈယႂ်ႇတီႈသုတ်း တႄႇၸဵမ်မိူဝ်ႈသင်ႇၶၢႆႉၵူၼ်းမိူင်း ၼႂ်းပိုၼ်ႉတီႈၵႃႇၸႃႉပွတ်းႁွင်ႇၼၼ်ႉမႃး ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉ ယူႇတီႈၸုမ်းၸွႆႈထႅမ်လွင်ႈတုၵ်ႉယၢၵ်ႈ လႄႈ ၸတ်းႁႃၵၢၼ် ၸၢတ်ႈၸိုင်ႈလုမ်ႈၾႃႉ တႃႇၵူၼ်းမိူင်းပႃႇလႅတ်ႉသတၢႆး (UNRWA) လၢတ်ႈဝႃႈ ၼႂ်းပိုၼ်ႉတီႈဢၼ်ဢိတ်ႇသရေး သင်ႇႁႂ်ႈၶၢႆႉဢွၵ်ႇၼၼ်ႉ တေမီးၵူၼ်းမိူင်းယူႇသဝ်း ဝႆႉမွၵ်ႈ 250,000 ၵေႃႉ ဝႃႈၼႆ။

တႄႇၸဵမ်ၸုမ်းသိုၵ်းႁႃးမၢတ်ႉသ် ပိုတ်းယိုဝ်းသႂ်ႇဢိတ်ႇသရေး မိူဝ်ႈဝၼ်းထီႉ 7 October 2023 မီးၵူၼ်းလူႉသဵင်ႈတၢႆမွၵ်ႈ 1,200 ၵေႃႉ၊ ထုၵ်ႇတီႉၺွပ်း 250 ၵေႃႉယဝ်ႉ ၽၢႆႇတၢင်းဢိတ်ႇသရေးၵေႃႈ လႆႈၶဝ်ႈလူမ်ႇတိုၵ်းၼႂ်းပိုၼ်ႉတီႈၵႃႇၸႃႉ တႃႇပဵၼ် ၵၢၼ်တွပ်ႇတႅၼ်းၼႆလႄႈ ႁဵတ်းႁႂ်ႈၵူၼ်းၼႂ်းပိုၼ်ႉတီႈၵႃႇၸႃႉ လူႉသဵင်ႈတၢႆၵႂႃႇယဝ်ႉ ဢမ်ႇယွမ်း 38,000 ၵေႃႉ ဝႃႈၼႆ။

တေႃႈၼင်ႇၼၼ် ဝၢႆးသေၸုမ်း Hezbollah တိုၵ်ႉသူင်ႇတရူၼ်းၵႂႃႇပိုတ်းယိုဝ်းသႂ်ႇ ၼႂ်းမိူင်းဢိတ်ႇသရေးပွတ်းႁွင်ႇသေ မီးၵူၼ်းသိုၵ်းဢိတ်ႇသရေး မၢတ်ႇၸဵပ်း 18 ၵေႃႉ ယဝ်ႉၵူၺ်း မိူဝ်ႈဝၼ်းထီႉ 1 July 2024 ၼၼ်ႉၵေႃႈ မီးမၢၵ်ႇမိတ်ႉသႆးမွၵ်ႈ 20 လုၵ်ႈၼႆႉ လုၵ်ႉၼႂ်းမိူင်းလေႇပႃႇၼွၼ်ႇသေ ပိုတ်းယိုဝ်းၶဝ်ႈၵႂႃႇၼႂ်းမိူင်းဢိတ်ႇသရေးပွတ်းႁွင်ႇ ထႅင်ႈမိူၼ်ၵၼ် လႄႈ လၢမ်းၶၢတ်ႈဝႃႈ ပဵၼ်ႁွႆးမိုဝ်းၸုမ်း Hezbollah ဢၼ်ပဵၼ်ဢူၺ်း လီၵၼ်တင်း ၸုမ်းသိုၵ်းႁႃးမၢတ်ႉသ်ၼၼ်ႉ ၼႆယဝ်ႉ။

ၸိူင်ႉႁိုဝ်ၵေႃႈလီ ယွၼ်ႉၸုမ်းသိုၵ်း Hezbollah လႄႈ ဢိတ်ႇသရေး ပိုတ်းယိုဝ်းတုမ်ႉ တွပ်ႇၵၼ်ၵႂႃႇမႃးၸွမ်းလႅၼ်လိၼ်မိူင်းလေႇပႃႇၼွၼ်ႇ−မိူင်းဢိတ်ႇသရေး ဢမ်ႇထၢတ်ႇဢမ်ႇဝၢႆး ပဵၼ်ၶၢဝ်းတၢင်းၸမ် 9 လိူၼ်ယဝ်ႉလႄႈ ႁဵတ်းႁႂ်ႈၵူၼ်းမိူင်း ဢိတ်ႇသရေး ဢၼ်ယူႇတိတ်းၸပ်းလႅၼ်လိၼ်ၼၼ်ႉ လႆႈၶၢႆႉပၢႆႈၽေး ဢမ်ႇယွမ်း 60,000 ၵေႃႉ၊ ၵူၼ်းမိူင်းၼႂ်းလေႇပႃႇၼွၼ်ႇၵေႃႈ လႆႈၶၢႆႉပၢႆႈၽေးဢမ်ႇယွမ်း 90,000 ၵေႃႉ မိူၼ်ၵၼ်။

တႆးလွတ်ႈလႅဝ်း