ဢိတ်ႉသရေး ပိုတ်းယိုဝ်းၸုမ်းယိပ်းၵွင်ႈၵၢင်ႇႁႃးမၢတ်ႉသ်

မိူဝ်ႈဝၼ်းထီႉ 7 April 2023 (လိူၼ်ႁႃႈလွင်ႈ 3 ၶမ်ႈ ပီႊတႆး 2117 ၼီႈ) သိုဝ်ႇၶၢဝ်ႇၼွၵ်ႈ မိူင်းလၢႆးငၢၼ်းဝႃႈ တပ်ႉသိုၵ်းဢိတ်ႉသရေး လႆႈပိုတ်းယိုဝ်းမၢၵ်ႇလူင်ၶဝ်ႈၵႂႃႇၼႂ်းမိူင်း လေႇပႃႇၼွၼ်ႇလႄႈ ၼႂ်းပိုၼ်ႉတီႈၵႃႇသႃႉ ဢၼ်ယုမ်ႇဝႃႈ မီးလွင်ႈၵဵဝ်ႇၶွင်ႈၸုမ်းယိပ်း ၵွင်ႈၵၢင်ႇႁႃးမၢတ်ႉသ် ၶွင်ပႃႇလႅတ်ႉသ်တၢႆး ဝႃႈၼႆ။

မိူဝ်ႈဝၼ်းထီႉ 6 April 2023 ၼၼ်ႉ မီးမၢၵ်ႇမိတ်ႉသႆး လုၵ်ႈတီႈမိူင်းလေႇပႃႇၼွၼ်ႇ ပိုတ်းယိုဝ်းၵႂႃႇတီႈမိူင်းဢိတ်ႉသရေးပွတ်းႁွင်ႇ 34 လုၵ်ႈလႄႈ ၽၢႆႇတၢင်းဢိတ်ႉသရေး လႆႈၵၢဝ်ႇၼႄးဝႃႈ ပဵၼ်ႁွႆးမိုဝ်းၸုမ်းယိင်းၵွင်ႈၵၢင်ႇႁႃးမၢတ်ႉ သေဢမ်ႇၵႃး ဝၢႆးသေ ၼၼ်ႉၵေႃႈ ၸုမ်းယိပ်းၵွင်ႈဢၼ်မီးၼႂ်းၵႃႇသႃႉ လႆႈပိုတ်းယိုဝ်းမၢၵ်ႇမိတ်ႉသႆးသႂ်ႇ ဢိတ်ႉသရေး တီႈဢေႇသုတ်း 44 လုၵ်ႈ ၵူၺ်းၵႃႈ ထုၵ်ႇၶူင်ႉသၢင်ႈႁႄႉၵင်ႈၽေးတၢင်း ၵၢင်ႁၢဝ်ဢိတ်ႉသရေးယိုဝ်းၵႅတ်ႇလႆႈ ဝႃႈၼႆ။

တႄႇၸဵမ်မိူဝ်ႈ ပလိၵ်ႈဢိတ်ႉသရေး ၶဝ်ႈၵႂႃႇယႃႉၵဝ်းၼႂ်းၵျွင်းမုတ်ႇသလိမ်ႇ တီႈဝဵင်းလူင်ယေႇလူႇသလႅမ်ႇ (Jerusalem) မိူင်းဢိတ်ႉသရေးပွတ်းဝၼ်းဢွၵ်ႇ မိူဝ်ႈဝူင်ႈပူၼ်ႉမႃးသေ ႁဵတ်းႁႂ်ႈမီးလွင်ႈၶဵင်ႈၶႅင်ၸွမ်းၵူၼ်းၶိူဝ်းပႃႇလႅတ်ႉသ်တၢႆး ၼႂ်းၵျွင်းမုတ်ႇသလိမ်ႇ  ဢၼ်ပဵၼ်ဢွင်ႈတီႈထွၼ်ႈမျၢတ်ႈၶွင် သႃႇသၼႃႇ ဢိတ်ႇသလၢမ်ႇလႄႈ ႁဵတ်းႁႂ်ႈၸိုင်ႈမိူင်းၸိူဝ်းၵိူဝ်းယမ်သႃႇသၼႃႇဢိတ်ႇသလၢမ်ႇ ၼႂ်းပွတ်းတွၼ်ႈၼၼ်ႉဢမ်ႇမီးလွင်ႈပဵင်းပေႃးၸႂ်သေ လွင်ႈၶဵင်ႈၶႅင်ၼႂ်းၵႄႈၵၢင် ဢိတ်ႉသရေး တင်း ပႃႇလႅတ်ႉသ်တၢႆးၵေႃႈ လႆႈႁၢႆႉႁႅင်းၶိုၼ်ႈမႃးထႅင်ႈၵမ်းၼိုင်ႈ ဝႃႈၼႆ။

ၵဵဝ်ႇလူၺ်ႈလွင်ႈၼႆႉၵေႃႈ ၽၢႆႇတၢင်းၸုမ်းႁႃးမၢတ်ႉသ် ဢၼ်ပဵၼ်ၽူႈဢွၼ်ႁူဝ်ၸၢဝ်း ၶိူဝ်းပႃႇလႅတ်ႉသ်တၢႆး ၼႂ်းပိုၼ်ႉတီႈၵႃႇသႃႉၼၼ်ႉ ဢမ်ႇလႆႈဢွၵ်ႇမႃးယိုၼ်ယၼ်ဝႃႈ ပဵၼ်ၸုမ်းၶဝ်ၵေႃႉလုၵ်ႉတီႈမိူင်းလေႇပႃႇၼွၼ်ႇသေ ပိုတ်းယိုဝ်းမၢၵ်ႇမိတ်ႉသႆး သေတႃႉ ၽၢႆႇတၢင်းႁူဝ်ၼႃႈၸုမ်းယိပ်းၵွင်ႈၵၢင်ႇရႃးမၢတ်ႉသ် လႆႈဢွၵ်ႇမႃးလၢတ်ႈဝႃႈ ၵူၼ်းၶိူဝ်းပႃႇလႅတ်ႉသ်တၢႆး တေဢမ်ႇၼင်ႈယူႇလၢႆလၢႆ ၼႂ်းၵၢၼ်တေႃႇၼႃႈ လွင်ႈပူၼ်ႉပႅၼ်ၶွင်ဢိတ်ႉသရေးၼၼ်ႉ ဝႃႈၼႆ။

ၼႂ်းၵႄႈၵၢင်လွင်ႈပိုတ်းယိုဝ်းဢိတ်ႉသရေး လႄႈ ၸုမ်းႁႃးမၢတ်ႉသ် ပွၵ်ႈၵမ်းၼႆႉ မီးလၢႆးငၢၼ်း ၵူၼ်းလူႉတၢႆ 2 ၵေႃႉ၊ ပဵၼ်လုၵ်ႈဢွၼ်ႇလႄႈ မီးၵူၼ်းမၢတ်ႇၸဵပ်း ထႅင်ႈတင်းၼမ် ဝႃႈၼႆ။

တႆးလွတ်ႈလႅဝ်း