ဢီႇရၢၼ်ႇ−သေႃႇတီႇဢႃႇရေးပီးယႃး ဢုပ်ႇဢူဝ်းၵၼ် တီႈမိူင်းၶႄႇ တႃႇမႄးသၢင်ႈလွင်ႈၸမ်ၸႂ်ၶိုၼ်း

မိူဝ်ႈဝၼ်းထီႉ 6 April 2023 (လိူၼ်ႁႃႈလွင်ႈ 2 ၶမ်ႈ ပီႊတႆး 2117 ၼီႈ) ၶႄႇပဵၼ်ၸဝ်ႈ ႁိူၼ်း ၵဵဝ်ႇလူၺ်ႈပၢင်ၵုမ် ၽွင်းလူင်ၽၢႆႇၼွၵ်ႈမိူင်း မိူင်းဢီႇရၢၼ်ႇ လႄႈ မိူင်းသေႃႇတီႇ ဢႃႇရေးပီးယႃး ၼႂ်းၶၢဝ်းယၢမ်းဢၼ်တင်းသွင်ၸိုင်ႈမိူင်းၼႆႉ ယင်းတိုၵ်ႉႁႃသဵၼ်ႈ တၢင်းမႄးသၢင်ႈလွင်ႈၸမ်ၸႂ်ၵၼ် ဢၼ်လႆႈၶၢတ်ႇႁၢႆၵႂႃႇၶၢဝ်းတၢင်း 7 ပီႊၼၼ်ႉ ဝႃႈၼႆ။

ႁွင်ႈၵၢၼ်လူင်ၽၢႆႇၼွၵ်ႈမိူင်း မိူင်းဢီႇရၢၼ်ႇ ပိုတ်ႇလၢတ်ႈဝႃႈ ၽွင်းလူင်ၽၢႆႇၼွၵ်ႈမိူင်း ဢီႇရၢၼ်ႇ လႄႈ သေႃႇတီႇဢႃႇရေးပီးယႃး လႆႈဢုပ်ႇဢူဝ်းၶၵ်ႉတွၼ်ႈ တႃႇၶိုၼ်းမႃး ပိုတ်ႇလုမ်းၽွင်းတၢင် တင်းသွင်ပႃႈသွင်ၽၢႆႇထႅင်ႈပွၵ်ႈၼိုင်ႈလႄႈ လွင်ႈတင်းသွင် ၸိုင်ႈမိူင်းမႄးဝၢႆႇၼႃႈၶဝ်ႈႁႃၵၼ်သၢင်ႈလွင်ႈၸမ်ၸႂ်ၵၼ်ၶိုၼ်းၼႆႉ ပဵၼ်မႃးဝၢႆးသေ ယွမ်းႁပ်ႉၶေႃႈတူၵ်းလူင်း လွင်ႈၶႄႇတေယူႇၵၢင်သေ ၶဝ်ႈလၢတ်ႈၸိမ်ၸွမ်းၼၼ်ႉ ဝႃႈၼႆ။

ၽၢႆႇတၢင်းသေႃႇတီႇဢႃႇရေးပီးယႃး လႆႈတတ်းၶၢတ်ႇလွင်ႈၸမ်ၸႂ် ၽၢႆႇတၢင်းၽွင်း တၢင်တေႃႇဢီႇရၢၼ်ႇ မိူဝ်ႈပီႊ 2016 ဝၢႆးသေၵူၼ်းၼႄၵၢင်ၸႂ်ၸၢဝ်းၶိူဝ်းဢီႇရၢၼ်ႇ ၶဝ်ႈၵႂႃႇၼႂ်းလုမ်းၽွင်းတၢင်သေႃႇတီႇဢႃႇရေးပီးယႃး ၼႂ်းဝဵင်းလူင်တေႇႁႃႇရၢၼ်ႇ Tehran မိူင်ႈဢီႇရၢၼ်ႇ ယွၼ်ႉပိူဝ်ႈသေႃႇတီႇဢႃႇရေးပီးယႃး သင်ႇပၼ်တၢမ်ႇတၢႆ ၶူးသွၼ်သႃႇသၼႃႇဢိတ်ႇသလၢမ်ႇၼၼ်ႉ ဝႃႈၼႆ။

ၼွၵ်ႈလိူဝ်သေၼႆႉ ၽၢႆႇတၢင်းဢီႇရၢၼ်ႇ လႄႈ သေႃႇတီႇဢႃႇရေးပီးယႃး ယင်းတိုၵ်ႉ ၸုၵ်းမၼ်ႈယူႇၵေႃႉၽၢႆႇၽၢႆႇ ၼႂ်းလွင်ႈၶဵင်ႈၶႅင်တီႈမိူင်းယေႇမႅၼ်ႇသေ ၽၢႆႇတၢင်းဢီႇ ရၢၼ်ႇသမ်ႉ ၵမ်ႉၸွႆႈထႅမ်ၽၢႆႇတၢင်းၸုမ်းလုၵ်ႉၽိုၼ်ႉ ၵူၺ်းၵႃႈ ၽၢႆႇတၢင်းသေႃႇတီႇ ဢႃႇရေးပီးယႃး သမ်ႉဢွၼ်ဢဝ်ဢူၺ်းလီၽၢႆႇၵၢၼ်သိုၵ်းသေ ၵမ်ႉထႅမ်လူင်ပွင်ၸိုင်ႈ ယေႇမႅၼ်ႇ ဢၼ်လႆႈႁပ်ႉလွင်ႈယွမ်းႁပ်ႉတီႈၸၢတ်ႈၸိုင်ႈလုမ်ႈၾႃႉၼၼ်ႉ ဝႃႈၼႆ။

တႆးလွတ်ႈလႅဝ်း