“ၵိုင်ႉၵၢင်ႉပဵၼ်လူမ်းတၢႆလိုမ်း” ၽေးၸမ်တူဝ်ဢၼ်ထုၵ်ႇလီၾၢင်ႉ

မေႃယႃၶဝ်ပိုတ်ႇလၢတ်ႈၼႄဝႃႈ လွင်ႈၵိုင်ႉၵၢင်ႉပဵၼ်လူမ်းတၢႆလိုမ်းၵႂႃႇၼႆႉ မၼ်းပဵၼ်ၽၢင်ႁၢင်ႈ ဢၼ်ဢမ်ႇႁူႉၼိူဝ်ႉႁူႉတူဝ် တၢႆလိုမ်းၵႂႃႇၸူဝ်ႈၶၢဝ်း လူၺ်ႈၵိူတ်ႇပဵၼ်ယွၼ်ႉလိူတ်ႈဢၼ် သူင်ႇၵႂႃႇလဵင်ႉဢွၵ်းဢေႃၼၼ်ႉ လူတ်းယွမ်းလူင်း ႁဵတ်းႁႂ်ႈဢွၵ်းဢေႃၶၢတ်ႇ Oxygen သေ ၸၢင်ႈမီးၽွၼ်းတုမ်ႉယွၼ်ႈလႆႈ ၼၼ်ႉယဝ်ႉ။

လွင်ႈၵိုင်ႉၵၢင်ႉပဵၼ်လူမ်းတၢႆလိုမ်းၼႆႉ တေမီးၽၢင်ႁၢင်ႈလၵ်းၶၼႃႇ မဵဝ်းဢၼ်ၵိူတ်ႇပဵၼ် ၶိုၼ်ႈမႃးဝႆးၽႂ်း ပဵၼ်တၢႆလိုမ်းၵႂႃႇၵမ်းလဵဝ်လႄႈ တေပဵၼ်ၼႂ်းၶၢဝ်းယၢမ်းဢၼ်ပွတ်းပွတ်းသေ တေၶိုၼ်ႈတိုၼ်ႇ ႁူႉတူဝ်မႃးႁင်းၵူၺ်း ၵွပ်ႈၼၼ် မၼ်းတေၼႄၽၢင်ႁၢင်ႈဢွၵ်ႇမႃးလၢႆလၢႆမဵဝ်း မိူၼ်ၼင်ႇ−

• ႁွင်ႉယူႇလႄႈ ဢမ်ႇႁူႉတူဝ်
• ၵိုင်ႉၵၢင်ႉလူမ်ႉလူင်းၼိူဝ်ပိုၼ်ႉ
• ဢမ်ႇၵွၼ်းၼမ်ႉၼၵ်းတူဝ်လႆႈ
• တေၸၢင်ႈမီးၽၢင်ႁၢင်ႈတိၼ်ငေႃးမိုဝ်းငေႃး
• တႃလိူၵ်ႇ
• ႁိူဝ်ႇဢွၵ်ႇၸွမ်းၼႃႈ

ၽူႈၵေႃႉပဵၼ်လူမ်းတၢႆလိုမ်းၼၼ်ႉ ၶဝ်တေဢမ်ႇတွင်းလွင်ႈတၢင်းသင်လႆႈ မိူဝ်ႈတိုၵ်ႉပဵၼ်လူမ်း တင်ႈတႄႇ ၼႂ်းၶၢဝ်းယၢမ်း 30 ၸႅၵ်ႉၵၢၼ်ႉ တေႃႇထိုင် 5 မိၼိတ်ႉ ၶိုၼ်ႈယူႇၸွမ်း ပၢႆးယူႇလီ ၵေႃႉပဵၼ်လူမ်း ၼၼ်ႉယဝ်ႉ။

ၼႃႈတေပဵၼ်လူမ်းတၢႆလိုမ်းၵႂႃႇၼၼ်ႉ တေၸၢင်ႈမီးၽၢင်ႁၢင်ႈ မိူၼ်ၼင်ႇ−

• ႁူဝ်ပၼ်ႇႁူဝ်မဝ်း
• တႃလၢႆး
• ပၢႆတိၼ်ပၢႆမိုဝ်းၵတ်း
• တွင်ႉၶူၼ်ႉၶႂ်ႈႁၢၵ်ႈ ၸဵမ်ၸိူဝ်းၼႆႉယဝ်ႉ။

ၽေးႁၢႆႉႁႅင်း လွင်ႈပဵၼ်လူမ်းတၢႆလိုမ်း

သင်ၸိူဝ်ႉဝႃႈမီးၽၢင်ႁၢင်ႈ ႁူဝ်ပၼ်ႇႁူဝ်မဝ်း တႃလၢႆး ပဵၼ်လူမ်းဢမ်ႇႁူႉတူဝ်ၸိူဝ်းၼႆႉ တေလႆႈဝႃႈ ပဵၼ်ၽေးဢၼ်ႁၢႆႉႁႅင်းမဵဝ်းၼိုင်ႈသေ ဢၼ်လွင်ႈယႂ်ႇမၼ်းသမ်ႉ ပဵၼ်ၵူၼ်းၸိူဝ်းဢၼ်ႁဵတ်းၵၢၼ် တီႈသုင် လႄႈ ၵူၼ်းႁေႃႈလူတ်ႉ၊ ပေႃးၵႆႉမီးၽၢင်ႁၢင်ႈ ၵိုင်ႉၵၢင်ႉပဵၼ်လူမ်းတၢႆလိုမ်းၸိူင်ႉၼႆ ထုၵ်ႇလီလႆႈၵႂႃႇ ႁႃမေႃယႃသေ ႁႃငဝ်ႈႁၢၵ်ႈဢၼ်တႅတ်ႈတေႃးမၼ်းၼၼ်ႉယဝ်ႉ။

ငဝ်ႈႁၢၵ်ႈလွင်ႈပဵၼ်လူမ်းတၢႆလိုမ်း

မေႃယႃၶဝ်လၢတ်ႈဝႃႈ ငဝ်ႈႁၢၵ်ႈလွင်ႈတၢင်း ဢၼ်ႁဵတ်းႁႂ်ႈပဵၼ်လူမ်းတၢႆလိုမ်းၼၼ်ႉ မီးယူႇလၢႆလၢႆမဵဝ်း မိူၼ်ၼင်ႇ−

1. ပဵၼ်မႃးလႆႈတီႈႁူဝ်ၸႂ် မိူၼ်ၼင်ႇ ႁူဝ်ၸႂ်တဵၼ်ႈၽိတ်းၶၵ်ႉတွၼ်ႈ၊ သဵၼ်ႈလိူတ်ႈႁူဝ်ၸႂ်ၵႅပ်ႈ၊ ၵၢမ်ႇၼိူဝ်ႉႁူဝ်ၸႂ်ၼႃပူၼ်ႉတီႈ လႄႈ တူဝ်ၶိင်းမီးလွင်ႈၽိတ်းပိူင်ႈ။
2. ၵိူတ်ႇပဵၼ်မႃးလႆႈလူၺ်ႈ ၶူင်ႉသၢင်ႈဢႃႇယူင်ႇ ႁဵတ်းၵၢၼ်ၽိတ်းပိူင်ႈ၊ ၵမ်ႈၼမ်တေၵႆႉထူပ်း ႁၼ် ဝၢႆးသေ ဢၢႆ၊ ၶီႈၸၢမ်၊ ၵၼ်ႈ၊ ၸုၵ်းတီႈၼႂ်းၵႄႈၵူၼ်းၼမ် ဢမ်ႇၼၼ် ဢွင်ႈတီႈမႆႈ ပဵၼ်ၶၢဝ်းယၢမ်းႁိုင် လႄႈ ၵူဝ်ၶဵမ် ၸဵမ်ၸိူဝ်းၼႆႉယဝ်ႉ။
3. ၵိူတ်ႇပဵၼ်လႆႈ ယွၼ်ႉလွင်ႈသုမ်းလိူတ်ႈၼမ် ဢမ်ႇၼၼ် ၶၢတ်ႇၼမ်ႉ မိူၼ်ၼင်ႇ− ပဵၼ်ၶီႈႁေႈတွင်ႉၵႂႃႇႁႅင်းပူၼ်ႉတီႈ ဢမ်ႇၼၼ်ၵေႃႈ လိူတ်ႈဢွၵ်ႇၼႂ်းၶူင်ႉသၢင်ႈ ဢၢင်ႇၵႃႇၽၢႆႇၼႂ်း။
4. ပဵၼ်မႃးလႆႈလူၺ်ႈဢီႈယႃမၢင်ၸိူဝ်း ဢၼ်လွင်ႈယႂ်ႇသမ်ႉ ယႃလူတ်းယွမ်းတၢင်းပဵၼ်လိူတ်ႈ သုင်၊ ယႃယူတ်းယႃမူၼ်ႉလုၵ်ႈ၊ ယႃတေႃႇသူႈၽၢင်ႁၢင်ႈတၢင်းပဵၼ်ၶီငဝ်မွင်ၸႂ်၊ ယႃတၢင်း ပဵၼ်ယဵဝ်ႈဝၢၼ် ၸိူဝ်းၼႆႉယဝ်ႉ။

ပဵၼ်လူမ်းတၢႆလိုမ်းၸိူင်ႉႁိုဝ်လႄႈ ဝႃႈပဵၼ်ၶၵ်ႉႁၢႆႉႁႅင်း

ဢၼ်ထုၵ်ႇလီၾၢင်ႉၵေႃႈ ဝၢႆးပဵၼ်လူမ်းတၢႆလိုမ်းသေ တိုၼ်ႇမႃးၶိုၼ်းၼၼ်ႉ တေၸၢင်ႈမီးလွင်ႈမၢတ်ႇၸဵပ်းလႄႈ လွင်ႈယူတ်းယႃမၼ်းၵေႃႈ ထုၵ်ႇလီယူတ်းယႃၸွမ်း ၽၢင်ႁၢင်ႈဢၼ်ပဵၼ်ယူႇၼၼ်ႉယဝ်ႉ။ ၵူၺ်းၵႃႈ သင်တိုၼ်ႇမႃးၶိုၼ်းသေ မီးၽၢင်ႁၢင်ႈ မိူၼ်ၼင်ႇ− သူပ်းမိတ်း၊ လိၼ်ႉၶႅင်၊ လၢတ်ႈၵႂၢမ်းဢမ်ႇပီႇ လၢတ်ႈထိူင်း ဢမ်ႇၼၼ် တူဝ်ၶိင်းဢူၼ်ႈဢွၼ်ႇၵႂႃႇပဵၼ်ၽၢၵ်ႇ ၸိူဝ်းၼၼ်ႉၸိုင် ပဵၼ်လွင်ႈၽိတ်းပိူင်ႈတၢင်းဢွၵ်းဢေႃ မိူၼ်ၼင်ႇ− သဵၼ်ႈလိူတ်ႈဢွၵ်းဢေႃၵႅပ်ႈ ဢမ်ႇၼၼ် လွတ်ႇလိူတ်ႈဢွၵ်းဢေႃတႅၵ်ႇ ၼႆၼၼ်ႉယဝ်ႉ။

ၵူၼ်းပဵၼ် ဢမ်ႇၼၼ် ၵူၼ်းႁိမ်းႁွမ်း ထုၵ်ႇလီၾၢင်ႉသတိတူၺ်းၸွမ်း လွင်ႈပဵၼ်လူမ်းတၢႆလိုမ်း လႄႈ ထုၵ်ႇလီၵႂႃႇႁႃႇမေႃယႃၵမ်းလဵဝ်သေ ဢမ်ႇထုၵ်ႇလီပွႆႇဝႆႉၸိူင်ႉၼၼ်ၼႆယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.sanook.com/health/35341/