ၵူဝ်းရီးယႃးႁွင်ႇသူင်ႇမၢၵ်ႇပွင်းလူမ်းယုၵ်းယၵ်း ၶဝ်ႈၼႂ်းၵူဝ်းရီးယႃးၸၢၼ်း ၸမ် 500 လုၵ်ႈ

ဝၢႆးသေၶေႃႈတူၵ်းလူင်းၽၢႆႇၵၢၼ်သိုၵ်းတင်းမူတ်း ဢၼ်မီးႁူမ်ႈၵၼ် ၵိုတ်းလိုဝ်ႈၵႂႃႇယဝ်ႉၼၼ်ႉ ၵူဝ်းရီးယႃးတင်းသွင်ၸိုင်ႈမိူင်းၵေႃႈ လႆႈမီးလွင်ႈ ပွႆႇမၢၵ်ႇပွင်းလူမ်းတုမ်ႉတွပ်ႇၵၼ်ၵႂႃႇမႃး ယူႇတႃႇသေႇလႄႈ မိူဝ်ႈဝႃးၼၼ်ႉၵူၺ်း ႁဵတ်းႁႂ်ႈၾႆးမႆႈႁိူၼ်းလင်ၼိုင်ႈ တီႈၼႂ်းမိူင်းၵူဝ်းရီးယႃးၸၢၼ်း ၼႆယဝ်ႉ။

မိူဝ်ႈဝၼ်းထီႉ 25 July 2024 (လိူၼ်ပႅတ်ႇလွင်ႈ 5 ၶမ်ႈ ပီႊတႆး 2118 ၼီႈ) ၸဝ်ႈၼႃႈတီႈၵူဝ်းရီးယႃးႁွင်ႇ ပိုတ်ႇလၢတ်ႈၼႄဝႃႈ ၼႂ်းၶၢဝ်းတၢင်း 24 ၸူဝ်ႈမူင်းပူၼ်ႉမႃးၼၼ်ႉ ၵူဝ်းရီးယႃးႁွင်ႇ သူင်ႇမၢၵ်ႇပွင်းလူမ်းလူင် ႁူမ်ႈပႃးယုၵ်းယၵ်း ပွႆႇသႂ်ႇၼႂ်းၼႃႈၾႃႉၵူဝ်းရီးယႃးၸၢၼ်းၼၼ်ႉ မီးယူႇမွၵ်ႈ 480 လုၵ်ႈၼႆႉ ၼႆယဝ်ႉ။

မၢၵ်ႇပွင်းလူမ်းဢၼ်ၵူဝ်းရီးယႃးႁွင်ႇ တေႃႉယုၵ်းယၵ်းသေ သူင်ႇၵႂႃႇၼႂ်းၵူဝ်းရီးယႃးၸၢၼ်းၼၼ်ႉ ႁဵတ်းႁႂ်ႈတုမ်ႉတိူဝ်ႉတေႃႇသၢႆၵၢၼ်မိၼ် ၵၢၼ်ဢွၵ်ႇၶၢဝ်းတၢင်း သမ်ႉပေႃးလႆႈၵိုတ်းယင်ႉၵႂႃႇပဵၼ် 2 ၸူဝ်ႈမူင်း ယူႇယဝ်ႉ။

လိူဝ်သေၼၼ်ႉ ယင်းႁဵတ်းႁႂ်ႈၾႆးမႆႈထႅင်ႈ တီႈၼိူဝ်ႁိူၼ်းတိူၵ်ႈလင်ၼိုင်ႈ ၼႂ်းၸႄႈတွၼ်ႈ Gyeonggi တီႈဢၼ်ဢမ်ႇပေႃးၵႆ ဝဵင်းလူင်သူဝ်း ၼၼ်ႉလႄႈ ၽၢႆႇတၢင်းတပ်ႉသိုၵ်းၵူဝ်းရီးယႃးၸၢၼ်းၵေႃႈဝႃႈ မၢၵ်ႇပွင်းလူမ်းယုၵ်းယၵ်းၼၼ်ႉ မႃးၸွမ်းၵၼ်တင်း ၶဵမ်တမ်းၶၢဝ်းယၢမ်းဝႆႉလႄႈ ပဵၼ်လွင်ႈတၢင်းႁဵတ်းႁႂ်ႈၾႆးမႆႈလႆႈ ဝႃႈၼႆ။

တႄႇဢဝ်မိူဝ်ႈဝၼ်းထီႉ 28 May 2024 မႃးၼၼ်ႉ ၵူဝ်းရီးယႃးၸၢၼ်းၵေႃႈ လႆႈပွႆႇမၢၵ်ႇပွင်းလူမ်းလူင် ၶဝ်ႈၼႂ်းမိူင်းၵူဝ်းရီးယႃးႁွင်ႇမႃးတႃႇသေႇလႄႈ၊ မိူဝ်ႈၼႂ်းဝၼ်းထီႉ 24 July 2024 ၼၼ်ႉၵေႃႈ မီးလၢႆးငၢၼ်းဢွၵ်ႇမႃးဝႃႈ မၢၵ်ႇပွင်းလူမ်းလူင်ၵူဝ်းရီးယႃးႁွင်ႇၵမ်ႈၽွင်ႈ တူၵ်းလူင်းၵႂႃႇတီႈႁိမ်းႁိူၼ်းၸွမ်ၸိုင်ႈ ၼႂ်းဝဵင်းလူင်သူဝ်း တီႈဢၼ်မီးလွင်ႈႁူမ်ႇလူမ်ႈၼႅၼ်ႈၼႃၼၼ်ႉ ၼႆယဝ်ႉ။

ၸွမ်းၼင်ႇသိုဝ်ႇၶၢဝ်ႇ Reuters လၢႆးငၢၼ်း လွင်ႈဢၼ်ၵူဝ်းရီးယႃးႁွင်ႇ သူင်ႇမၢၵ်ႇပွင်းလူမ်း တေႃႉတၢင်ႇယုၵ်းယၵ်း ၶၢမ်ႈလႅၼ်လိၼ်ၵႂႃႇပွႆႇပႅတ်ႈသႂ်ႇၼႂ်းမိူင်းၵူဝ်းရီးယႃးၸၢၼ်းၼၼ်ႉၵေႃႈ တွၼ်ႈတႃႇတုမ်ႉတွပ်ႇၶိုၼ်း လွင်ႈၵူၼ်းမိူင်းၵူဝ်းရီးယႃးႁွင်ႇ ပၢႆႈၵႂႃႇမီးၼႂ်းမိူင်းၵူဝ်းရီးယႃးၸၢၼ်း ဢိၵ်ႇတင်း ၸုမ်းတူင်ႉၼိုင်ၵၢၼ်မိူင်း ဢၼ်ၵႆႉၵႆႉပွႆႇမၢၵ်ႇပွင်းလူမ်းတေႃႉသူင်ႇၶူဝ်းၶွင် ဢမ်ႇဝႃႈပဵၼ်ဝႂ်ပိဝ်သၢၼ်ၶတ်းၵူဝ်းရီးယႃးႁွင်ႇ၊ ယႃႈယႃ၊ ငိုၼ်း၊ Flash Drive ဢၼ်သႂ်ႇဝႆႉၽဵင်းၵႂၢမ်း လႄႈ ၸိူင်း ၵူဝ်းရီးယႃးၸၢၼ်း ၸိူဝ်းၼႆႉဝႃႈၼႆ။

တႆးလွတ်ႈလႅဝ်း