ၵူဝ်းရီးယႃးႁွင်ႇ ပၼ်ၾၢင်ႉဢမေႇရိၵၢၼ်ႇ လွင်ႈတေမီးလွင်ႈၶဵင်ႈၶႅင်ၸွမ်းၶႄႇ

ယုမ်ႉၶိူဝ်း − 08 October 2026

မိူဝ်ႈဝၼ်းထီႉ 7 October 2026 (လိူၼ်သိပ်းလွင်ႈ 11 ၶမ်ႈ ပီႊတႆး 2120 ၼီႈ) Kim Myong-chol ၽူႈထတ်းသၢင် လွင်ႈတူင်ႉၼိုင်ၼႂ်းၵႄႈၵၢင်မိူင်းတေႃႇမိူင်း ၶွင်ၵူဝ်းရီးယႃးႁွင်ႇ လႆႈလၢတ်ႈဝႃႈ ပိူင်ႁဵတ်းသၢင်ႈဢမေႇရိၵၢၼ်ႇ ဢၼ်မီးတေႃႇ ထႆႇဝၼ်ႇၼၼ်ႉ မၼ်းႁဵတ်းႁၢႆႉလွင်ႈၵတ်းယဵၼ်ၼိမ်သဝ်းၼႂ်းပွတ်းတွၼ်ႈသေ သႄႉသွမ်းလွင်ႈဢမေႇရိၵၢၼ်ႇ ၶၢႆႁိူဝ်းမိၼ်လိုပ်ႈလမ်းပၼ်ထႆႇဝၼ်ႇ ၼႆယဝ်ႉ။

ဢမေႇရိၵၢၼ်ႇ ထုၵ်ႇလီၼပ်ႉသွၼ်ႇႁႂ်ႈလီလီဝႃႈ ၸွင်ႇၽွမ်ႉတႃႇမီးလွင်ႈၶဵင်ႈၶႅင်ၸွမ်း ၶႄႇၵမ်းသိုဝ်ႈ တူၺ်းပိူဝ်ႈတႃႇလွင်ႈမၼ်ႈၼိမ်သဝ်းထႆႇဝၼ်ႇၵူၺ်းသေ ၸွင်ႇသမ်ႉတေၽွမ်ႉႁပ်ႉမိုဝ်း ၽွၼ်းတုမ်ႉယွၼ်ႈ ဢၼ်တေၸွမ်းမႃးလႆႈယူႇႁႃႉၼႆ ၽူႈထတ်းသၢင်ၵူဝ်းရီးယႃးႁွင်ႇ သိုပ်ႇလၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈဢၼ်ၵူဝ်းရီးယႃးႁွင်ႇ ဢွၵ်ႇမႃးလၢတ်ႈၼင်ႇၼႆၼႆႉ ၼႄႁႂ်ႈႁၼ်ဝႃႈ လွင်ႈထႆႇဝၼ်ႇၼၼ်ႉ ၵူဝ်းရီးယႃးႁွင်ႇ ၸုၵ်းယူႇၽၢႆႇၶႄႇ။ လွင်ႈထႆႇဝၼ်ႇၼႆႉ ပဵၼ်ဢၼ်ၶႄႇဝႆႉၼမ်ႉၼၵ်းႁႅင်းသေပိူၼ်ႈလွင်ႈၼိုင်ႈ လႄႈ ၽၢႆႇတၢင်းၶႄႇၵေႃႈ လၢတ်ႈမႃးယူႇတႃႇသေႇဝႃႈ ထႆႇဝၼ်ႇ ပဵၼ်ပွတ်းဢွၼ်ႇတွၼ်ႈၼိုင်ႈၶွင်မိူင်းၶႄႇ ၵူၺ်းၼႆသေတႃႉ ၽၢႆႇထႆႇဝၼ်ႇသမ်ႉ ဢမ်ႇယွမ်းႁပ်ႉလႆႈ ဢွၵ်ႇပၢၵ်ႈပႅတ်ႈလွင်ႈၼႆႉယူႇသေသေၼၼ်ႉယဝ်ႉ။

လွင်ႈၼႆႉလႆႈမီးမႃး ဝၢႆးသေထႆႇဝၼ်ႇလႆႈႁပ်ႉႁိူဝ်းမိၼ်လိုပ်ႈလမ်း  F-16V Block 70 ၸုပ်ႈဢွၼ်တၢင်းတႃႇ 2 လမ်း မိူဝ်ႈဝူင်ႈပူၼ်ႉမႃးလႄႈ တင်းမူတ်းဢၼ်သင်ႇသိုဝ်ႉဝႆႉ မိူဝ်ႈပီႊ 2019 တႃႇ 66 လမ်း ဝႃႈၼႆ။

မိူဝ်ႈၼႂ်းလိူၼ် June 2026 ၼၼ်ႉ ၶိမ်း ၵျွင်းဢိုၼ်း ၽူႈၼမ်းသုင်သုတ်း ၵူဝ်းရီးယႃးႁွင်ႇ လၢတ်ႈတီႈ သျီႇ ၵျိၼ်းၽိင်ႇ ၸွမ်ၸိုင်ႈၶႄႇဝႃႈ ၵူဝ်းရီးယႃးႁွင်ႇ ၵမ်ႉထႅမ်လၵ်းၵၢၼ် လွင်ႈဝႃႈ မိူင်းၶႄႇမီးၸိုင်ႈလဵဝ် သေဢမ်ႇၵႃး ၵူဝ်းရီးယႃးႁွင်ႇ လႄႈ ၶႄႇ ယင်းႁူမ်ႈမိုဝ်းၵၼ် ၽၢႆႇၵၢၼ်သိုၵ်း၊ ပိၼ်ႇပၢႆႇလႅၵ်ႈလၢႆႈၶေႃႈမုၼ်း ၽၢႆႇၽွင်းတၢင်၊ လွင်ႈပၵ်းပိူင်မၢႆမီႈ ၸႃႉၵႂႃႇထႅင်ႈလၢႆလၢႆလွင်ႈ ၼႆယဝ်ႉ။

ၸိူင်ႉႁိုဝ်ၵေႃႈလီ ၶၢဝ်းတၢင်းလၢႆပီႊပူၼ်ႉမႃးၼႆႉ ၵူဝ်းရီးယႃးႁွင်ႇ လႆႈတိူဝ်းလွင်ႈမိုတ်ႈၵိုဝ်းၸမ်ၸႂ် ၶႄႇ လႄႈ ရၢတ်ႉသျႃး ၼမ်မႃးလိူဝ်သေၵဝ်ႇ ႁဵတ်းႁႂ်ႈဢမေႇရိၵၢၼ်ႇ တင်း ဢူၺ်းလီဢမေႇရိၵၢၼ်ႇ ၼႂ်းဢေးသျႃး ဢိၵ်ႇတင်း ပွတ်းဝၼ်းဢွၵ်ႇၵၢင် မီးလွင်ႈမႆႈၸႂ် ၽၢႆႇလွင်ႈမၼ်ႈၼိမ်သဝ်း ဝႃႈၼႆ။

တႆးလွတ်ႈလႅဝ်း