ၵူဝ်းရီးယႃးႁွင်ႇ ယိုဝ်းမၢၵ်ႇမိတ်ႉသႆး ပၼ်ၾၢင်ႉ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း

ၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆးယိုဝ်းၶၢမ်ႈမိူင်း ႁႂ်ႈပဵၼ်ၵၢၼ်ပၼ်ၾၢင်ႉ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ၼႆယဝ်ႉ။

မိူဝ်ႈဝၼ်းထီႉ 18 February 2023 (ဝၼ်းလိူၼ်သၢမ်လပ်း ပီႊတႆး 2117 ၼီႈ) ၵူဝ်းရီးယႃးႁွင်ႇ လႆႈယိုဝ်းမၢၵ်ႇမိတ်ႉသႆးယိုဝ်းၶၢမ်ႈမိူင်း ICMB သႅၼ်း Hwasong-15  ၸွမ်းၼင်ႇ ၽူႈၼမ်း ၶိမ်း ၵျွင်းဢိုၼ်း ပဵၼ်ၵူၼ်းၸီႉသင်ႇႁႂ်ႈယိုဝ်း ၼင်ႇႁိုဝ် ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ပေႃးတေႁၼ်ၼမ်ႉၵတ်ႉၵၢၼ်တုမ်ႉတွပ်ႇ ၸူးၶိုၼ်းလူၺ်ႈ ၼိဝ်ၶလီးယႃးၶွင်ၵူဝ်းရီးယႃးႁွင်ႇၼၼ်ႉ ၼႆယဝ်ႉ။

ၸွမ်းၼင်ႇသိုဝ်ႇၶၢဝ်ႇၵူဝ်းရီးယႃးႁွင်ႇ KCNA လၢႆးငၢၼ်းၼၼ်ႉတႄႉဝႃႈ ၵၢၼ်ၸၢမ်းယိုဝ်းမၢၵ်ႇမိတ်ႉသႆးၼႆႉ လုၵ်ႉတီႈ တႃႈႁိူဝ်းမိၼ်ၵူႈမိူင်းမိူင်း ၼႂ်းဝဵင်းလူင်ပဵင်းယၢင်(Pyongyang) လႄႈ ယိုဝ်းသုင်လႆႈထိုင် 5,768.5 ၵီႇလူဝ်ႇမီႇတိူဝ်ႇ၊ မိၼ်ၵႂႃႇၵႆလႆႈ 989 ၵီႇလူဝ်ႇမီႇတိူဝ်ႇ ၼႂ်းၶၢဝ်းတၢင်း 4,015 မိၼိတ်ႉသေ ၵႂႃႇတူၵ်းၼႂ်းပိုၼ်ႉတီႈပၢႆးမၢၵ်ႈမီးၵျႃႇပၢၼ်ႇ ဝႃႈၼႆ။

ဢွၼ်တၢင်းၼၼ်ႉၵေႃႈ ၵူဝ်းရီးယႃးႁွင်ႇ လႆႈဢွၵ်ႇမႃးလွၵ်ႇငိူတ်ႈထိုင် ၵၢၼ်ၽိုၵ်းၽွၼ်ႉသိုၵ်း ဢမေႇရိၵၢၼ်ႇ−ၵူဝ်းရီးယႃးၸၢၼ်း ဢၼ်တေၽိုၵ်းၽွၼ်ႉသိုၵ်းႁူမ်ႈၵၼ် ၶၢဝ်းတၢင်းမိူဝ်းၼႃႈၼၼ်ႉ တေဢၢၼ်းတုမ်ႉတွပ်ႇၸူးၶိုၼ်းႁၢဝ်ႈႁႅင်း ၼင်ႇဢၼ်ၶၢတ်ႈလၢမ်းဢမ်ႇလႆႈ ၼႆယူႇယဝ်ႉ။

တႆးလွတ်ႈလႅဝ်း