ၵူဝ်းရီးယႃးႁွင်ႇ လွၵ်ႇငိူတ်ႈ ထိုင်ၶၵ်ႉႁၢႆႉႁႅင်းယဝ်ႉ

ဝၢႆးသေ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ၽိုၵ်းၽွၼ်ႉသိုၵ်းႁူမ်ႈၵၼ် တၢင်းၵၢင်ႁၢဝ်ၼၼ်ႉ  ၵူဝ်းရီးယႃးႁွင်ႇ ဢွၵ်ႇမႃးလွၵ်ႇငိူတ်ႈ ထိုင်ၶၵ်ႉတွၼ်ႈႁၢႆႉႁႅင်းယဝ်ႉ ၼႆယူႇ။

မိူဝ်ႈဝၼ်းထီႉ 1 February 2023 (လိူၼ်သၢမ်မႂ်ႇ 12 ၶမ်ႈ ပီႊတႆး 2117 ၼီႈ) ႁွင်ႈၵၢၼ်လူင်ၽၢႆႇၵႅတ်ႇၶႄ ၵူဝ်းရီးယႃးၸၢၼ်း လႆႈပိုတ်ႇၼႄႁၢင်ႈ ၵၢၼ်ၽိုၵ်းၽွၼ်ႉသိုၵ်း ႁူမ်ႈၵၼ်တင်း ဢမေႇရိၵၢၼ်ႇ ဢၼ်မီးၽုင်ႁိူဝ်းမိၼ် တင်းၼမ် မီးတင်းႁိူဝ်းမိၼ်ပွႆႇမၢၵ်ႇသႅၼ်းၼၵ်း B-1B ၊ ႁိူဝ်းမိၼ်လိုပ်ႈလမ်း Stealth F-22၊ ႁိူဝ်းမိၼ်လိုပ်ႈလမ်း F-35B, F35A ဢၼ်ပဵၼ်ၶွင်တပ်ႉသိုၵ်းဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း မိၼ်ယူႇၼိူဝ်ၵၢင်ႁၢဝ် ၵူၺ်းဢမ်ႇလႆႈလၢတ်ႈပႃးဝႃႈ ပဵၼ်ၼႂ်းပိုၼ်ႉတီႈလႂ် ၼႆယဝ်ႉ။

ၽၢႆႇတၢင်းၵူဝ်းရီးယႃးၸၢၼ်းၵေႃႈလၢတ်ႈဝႃႈ ၵၢၼ်ၽိုၵ်းၽွၼ်ႉသိုၵ်း ႁူမ်ႈၵၼ်တင်းၵၢင်ႁၢဝ်ပွၵ်ႈၼႆႉ တႃႇၼႄၼမ်ႉၵတ်ႉၶိူင်ႈၵွင်ႈၵၢင်ႇၶွင်ဢမေႇရိၵၢၼ်ႇ ၼႂ်းၵၢၼ်တိူဝ်းၶႂၢၵ်ႈ လွင်ႈႁူမ်ႇလူမ်ႈဢၼ်ၵႅၼ်ႇၶႅင်သေ ယုမ်ႇယမ်လႆႈ တႃႇၵႅတ်ႇၶႄၽေးၼိဝ်းၶလီးယႃး လႄႈ မၢၵ်ႇမိတ်ႉသႆးၶွင်ၵူဝ်းရီးယႃးႁွင်ႇ ဝႃႈၼႆ။

မိူဝ်ႈဝၼ်းထီႉ 2 February 2023 ၼၼ်ႉၵေႃႈ သိုဝ်ႇၶၢဝ်ႇ KCNA ၶွင်ၵူဝ်းရီးယႃးႁွင်ႇ လႆႈဢွၵ်ႇမႃးလၢတ်ႈဝႃႈ ၵၢၼ်ၽိုၵ်းၽွၼ်ႉသိုၵ်း ၵူဝ်းရီးယႃးၸၢၼ်းလႄႈ ဢမေႇရိၵၢၼ်ႇၼၼ်ႉ လႆႈမိပ်ႇဢီးငဝ်းလၢႆး ႁႂ်ႈထိုင်ၶၵ်ႉႁၢႆႉႁႅင်းမႃး လႄႈ ပူၼ်ႉပႅၼ်ၼိူဝ်ပိုၼ်ႉတီႈၵူဝ်းရီးယႃး ဢီးႁႂ်ႈပိုၼ်ႉတီႈၼႆႉ တေပဵၼ် တီႈၵဵပ်းၶိူင်ႈၵွင်ႈၵၢင်ႇ တႃႇပၢင်တိုၵ်းဢၼ်ယႂ်ႇလူင် လႄႈ တိုဝ်ႉတၢင်းတႃႇပဵၼ်ပၢင်တိုၵ်းၼၼ်ႉၵေႃႈ တိူဝ်းၶိုၼ်ႈမႃးတိၵ်းတိၵ်း ဝႃႈၼႆ။

ၽူႈတၢင်လၢတ်ႈၽၢႆႇၼွၵ်ႈမိူင်းၵူဝ်းရီးယႃးႁွင်ႇၵေႃႈ လႆႈလၢတ်ႈမိူၼ်ၵၼ်ဝႃႈ ငဝ်းလၢႆးၵၢၼ်သိုၵ်း လႄႈ ၵၢၼ်မိူင်း ၼႂ်းပွတ်းတွၼ်ႈၵူဝ်းရီးယႃးၼႆႉ ထိုင်ၶၵ်ႉတွၼ်ႈဢၼ်ႁၢႆႉႁႅင်းယဝ်ႉ ၸွမ်းလူၺ်ႈၵၢၼ်ၽိုၵ်းၽွၼ်ႉသိုၵ်းၵၼ် ဢၼ်ဢမ်ႇမီးပၢႆးဝူၼ်ႉ၊ လွင်ႈဢၼ်ဢမေႇရိၵၢၼ်ႇၼၼ်ႉ ပဵၼ်လွင်ႈႁဵတ်းသၢင်ႈဢၼ်သၢၼ်ၶတ်းဝႆႉ ယူႇၼႆယဝ်ႉ။

လိူဝ်သေၼၼ်ႉယင်းလၢတ်ႈထိုင်ပႃး ၵူဝ်းရီးယႃးႁွင်ႇၼၼ်ႉ ဢမ်ႇသူၼ်ၸႂ် တႃႇႁူပ်ႉဢုပ်ႇဢူဝ်းၵၼ်ၼိူဝ်ၽိူၼ် မိူဝ်ႈလႂ်ဢမေႇရိၵၢၼ်ႇယင်းတိုၵ်ႉၸႂ်ႉပိူင်ၵၢၼ် ဢၼ်သၢၼ်ၶတ်းတေႃႇၵူဝ်းရီးယႃးႁွင်ႇယူႇ ဝႃႈၼႆ။

သိုၵ်းဢမေႇရိၵၢၼ်ႇ 28,500 ၵေႃႉ လႆႈပၵ်းသဝ်းဝႆႉယူႇတီႈၵူဝ်းရီးယႃးၸၢၼ်း ဝၢႆးသေပၢင်တိုၵ်းၵူဝ်းရီးယႃး 1950-1953 သုတ်းသဵင်ႈ၊ ပၢင်တိုၵ်းတင်းသွင်ၽၢႆႇၼၼ်ႉ သုတ်းယဝ်ႉၵႂႃႇလူၺ်ႈ ၶေႃႈတုၵ်းလူင်းၵိုတ်းတိုၵ်း ဢမ်ႇၸႂ်ႈ ဢုပ်ႇဢူဝ်းဢဝ်လွင်ႈငမ်းယဵၼ်ၵၼ် ၼႆယဝ်ႉ။

တႆးလွတ်ႈလႅဝ်း