ၵူဝ်းရီးယႃးႁွင်ႇ ၸၢမ်းယိုဝ်းမၢၵ်ႇမိတ်ႉသႆးသႅၼ်းယိုဝ်းၸမ် ဢွၼ်တၢင်း Kamala Harris တေၵႂႃႇတီႈၵူဝ်းရီးယႃးၸၢၼ်း

ၵူဝ်းရီးယႃးၸၢၼ်းလႆႈပိုတ်ႇလၢတ်ႈဝႃႈ ၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆး သႅၼ်းယိုဝ်းၸမ် 2 လုၵ်ႈ ၶဝ်ႈၵႂႃႇတီႈၼႂ်းပၢင်ႇလၢႆႇၵျႃႇပၢၼ်ႇ ဢွၼ်တၢင်း ၵႅမ်ၸွမ်ၸိုင်ႈ ဢမေႇရိၵၢၼ်ႇ Kamala Harris တေဢွၵ်ႇၶၢဝ်းတၢင်းၵႂႃႇတီႈ ၵူဝ်းရီးယႃးၸၢၼ်း ၼိုင်ႈဝၼ်း ဝႃႈၼႆ။

ၽူႈၵွၼ်းသိုၵ်းၵူဝ်းရီးယႃးၸၢၼ်းလၢႆလၢႆၵေႃႉႁူမ်ႈၵၼ် လၢတ်ႈၵႂႃႇတီႈၼႂ်းပၢင်သပ်း ၸႅင်ႈၶၢဝ်ႇဝႃႈ မိူဝ်ႈဝၼ်းထီႉ 28 September 2022 ၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇ မိတ်ႉသႆးသႅၼ်းယိုဝ်းၸမ် 2 လုၵ်ႈ ၵႂႃႇတၢင်းဝၼ်းဢွၵ်ႇ ႁိုဝ် ပၢင်ႇလၢႆႇၵျႃႇပၢၼ်ႇ ဢွၼ်တၢင်း Kamala Harris  ဢၼ်ပဵၼ်ၵႅမ်ၸွမ်ၸိုင်ႈ ဢမေႇရိၵၢၼ်ႇ တေဢွၵ်ႇၶၢဝ်း တၢင်းၵႂႃႇတီႈၵူဝ်းရီးယႃးၸၢၼ်းၼိုင်ႈဝၼ်းသေ မီးလၢႆးငၢၼ်းဝႃႈ Kamala Harris  မီး ၽႅၼ်တေဢွၵ်ႇၶၢဝ်းတၢင်းၵႂႃႇတီႈ လႅၼ်ၶႅၼ်ႈၼႃႈလိၼ် မိူင်းၵူဝ်းရီးယႃးႁွင်ႇ လႄႈ ၵူဝ်းရီးယႃးၸၢၼ်း မိူဝ်ႈၼႆႉ ဝၼ်းထီႉ 29 September 2022 ဝႃႈၼႆ။

ၽၢႆႇတၢင်းၵျႃႇပၢၼ်ၵေႃႈ လႆႈဢွၵ်ႇမႃးယိုၼ်ယၼ်လၢတ်ႈဝႃႈ တေၸၢင်ႈပဵၼ်ၵႂႃႇလႆႈ ယူႇ လွင်ႈမီးၵၢၼ်ယိုဝ်းမၢၵ်ႇမိတ်ႉသႆးၶဝ်ႈၵႂႃႇတီႈၼႂ်းပၢင်ႇလၢႆႇၵျႃႇပၢၼ်ႇသေ ယင်း လႆႈပိုၼ်ၽၢဝ်ႇပၼ်ၾၢင်ႉ ႁိူဝ်းၸိူဝ်းဢၼ်လႅၼ်ႈၵႂႃႇမႃး ၼႂ်းပၢင်ႇလၢႆႇၼၼ်ႉမိူၼ်ၵၼ် ဝႃႈၼႆ။

လွင်ႈၸၢမ်းယိုဝ်းမၢၵ်ႇမိတ်ႉသႆးလူၺ်ႈ ဢမ်ႇမီးၽႂ်လၢမ်းၶၢတ်ႈပွၵ်ႈၼႆႉ လႆႈပဵၼ်ၵႂႃႇ မိူဝ်ႈၼႂ်းၶၢဝ်းယၢမ်းဢၼ် သိုဝ်ႇၶၢဝ်ႇတပ်ႉသိုၵ်း ၵူဝ်းရီးယႃးၸၢၼ်း လႆႈဢွၵ်ႇမႃး ပိုၼ်ၽၢဝ်ႇပၼ်ၾၢင်ႉဝႃႈ ၵူဝ်းရီးယႃးႁွင်ႇ ၸမ်တေမီးလွင်ႈၸၢမ်းယိုဝ်းမၢၵ်ႇၼိဝ်းၶ လီးယႃးမႂ်ႇထႅင်ႈလႄႈ သမ်ႉပဵၼ်မိူဝ်ႈဢၼ် ဢမေႇရိၵၢၼ်ႇတင်း ၵူဝ်းရီးယႃးၸၢၼ်း ႁူမ်ႈၵၼ်ၽိုၵ်းၽွၼ်ႉၵၢၼ်သိုၵ်း သေဢမ်ႇၵႃး ပဵၼ်မိူဝ်ႈဢၼ်လႆႈႁၢင်ႈႁႅၼ်း ဢဵၼ်ႁႅင်းသိုၵ်းမွၵ်ႈ 28,500 ၵေႃႉ တူင်ႉၼိုင်ယူႇတီႈၼႂ်းတပ်ႉသိုၵ်း ၵူဝ်းရီးယႃးၸၢၼ်း တွၼ်ႈတႃႇႁႄႉၵင်ႈလွင်ႈပူၼ်ႉပႅၼ်တီႈ ၵူဝ်းရီးယႃးႁွင်ႉၼၼ်ႉ ဝႃႈၼႆ။

တႆးလွတ်ႈလႅဝ်း