ၵူဝ်းရီးယႃးႁွင်ႇ ၸၢမ်းယိုဝ်းမၢၵ်ႇမိတ်ႉသႆးသႅၼ်းယိုဝ်းၵႆ 2 လုၵ်ႈ

ၶိမ်းၵျွင်းဢိုၼ်း ၽူႈဢွၼ်ႁူဝ်ၵူဝ်းရီးယႃးႁွင်ႇ ပဵၼ်ၵေႃႉၸီႉသင်ႇ ၼႂ်းၵၢၼ် ၸၢမ်းယိုဝ်းမၢၵ်ႇမိတ်ႉသႆးသႅၼ်းယိုဝ်းၵႆ 2 လုၵ်ႈ ဢၼ်သႂ်ႇႁူဝ်ၼိဝ်းၶလီးယႃးလႆႈ ပဵၼ် ပွၵ်ႈဢွၼ်တၢင်းသုတ်း ၼႂ်းႁွပ်ႈ 1 ပီႊ တွၼ်ႈတႃႇပၼ်ၾၢင်ႉၽူႈၶဵၼ်လႄႈ လၢတ်ႈဝႃႈ ၵူဝ်းရီးယႃးႁွင်ႇ တေမႄႇၶႂၢၵ်ႈဢဵၼ်ႁႅင်းမၢၵ်ႇၼိဝ်းၶလီးယႃးၵႂႃႇထႅင်ႈ ဝႃႈၼႆ။

မိူဝ်ႈဝၼ်းထီႉ 12 October 2022 (လိူၼ်သိပ်းဢဵတ်းလွင်ႈ 3 ၶမ်ႈ ပီႊတႆး 2116 ၼီႈ) သိုဝ်ႇၶၢဝ်ႇ Reuters လႆႈဢၢင်ႈဢိင် ၶေႃႈမုၼ်းတီႈ သိုဝ်ႇၶၢဝ်ႇၵူဝ်းရီးယႃးႁွင်ႇ KCNA သေ လၢႆးငၢၼ်းဝႃႈ ၵူဝ်းရီးယႃးႁွင်ႇ လႆႈၸၢမ်းယိုဝ်း မၢၵ်ႇမိတ်ႉသႆးသႅၼ်းယိုဝ်းၵႆ 2 လုၵ်ႈလႄႈ မၢၵ်ႇမိတ်ႉသႆး 2 လုၵ်ႈၼႆႉ ယူႇၼိူဝ်ၵၢင်ႁၢဝ် ၶၢဝ်းတၢင်းႁိုင် 10,234 ၸႅၵ်ႉၵၢၼ်ႉ သေဢမ်ႇၵႃး ယိုဝ်းတိူဝ်ႉပဝ်ႉမၢႆ ဢၼ်မီးတၢင်းၵႆ 2,000 kilometers ၼၼ်ႉ ၼင်ႇမႅၼ်ႈယမ် ဝႃႈၼႆ။

သိုဝ်ႇၶၢဝ်ႇ KCNA လႆႈသိုပ်ႇလၢႆးငၢၼ်းဝႃႈ ၶိမ်းၵျွင်းဢိုၼ်း ၽူႈဢွၼ်ႁူဝ်ၵူဝ်းရီးယႃးႁွင်ႇ ပဵၼ်ၵေႃႉၵုမ်းၸီႉသင်ႇ ၼႂ်းၵၢၼ်ၸၢမ်းယိုဝ်းမၢၵ်ႇမိတ်ႉသႆးပွၵ်ႈၼႆႉ လူၺ်ႈတူဝ်ၵဝ်ႇ သေဢမ်ႇၵႃး ယင်းလႆႈလၢတ်ႈဝႃႈ ၵၢၼ်ၸၢမ်းယိုဝ်းမၢၵ်ႇမိတ်ႉသႆးပွၵ်ႈၼႆႉ ပဵၼ်ၵၢၼ် ပၼ်ၾၢင်ႉၽူႈၶဵၼ် ၼင်ႇၸႅင်ႈလႅင်း ၼႆယဝ်ႉ။

သိုပ်ႇလၢတ်ႈထႅင်ႈဝႃႈ ၵူဝ်းရီးယႃးႁွင်ႇ ထုၵ်ႇလီႁဵတ်းသၢင်ႈမႄႇၶႂၢၵ်ႈဢဵၼ်ႁႅင်း မၢၵ်ႇၼိဝ်းၶလီးယႃး ၽၢႆႇတၢင်းၵၢၼ်သိုၵ်းၵႂႃႇထႅင်ႈလႄႈ တွၼ်ႈတႃႇငဝ်းလၢႆးၶိုၵ်ႉၶၵ်ႉ ၽၢႆႇသိုၵ်းလႄႈ ပၢင်တိုၵ်းဢၼ်လွင်ႈယႂ်ႇ ဢမ်ႇဝႃႈၶၢဝ်းယၢမ်းလႂ်ၵေႃႈယဝ်ႉ ၵူဝ်းရီးယႃး ႁွင်ႇ တေပဵၼ်ၵေႃႉတႄႇႁဵတ်းသၢင်ႈၽၢႆႇၼႆႉဢွၼ်တၢင်း ၼင်ႇတဵမ်ထူၼ်ႈ ဝႃႈၼႆ။

လွင်ႈၸၢမ်းယိုဝ်းမၢၵ်ႇမိတ်ႉသႆးသႅၼ်းယိုဝ်းၵႆၵူဝ်းရီးယႃးႁွင်ႇပွၵ်ႈၼႆႉ တေလႆႈဝႃႈ ပဵၼ်ၵၢၼ်ၸၢမ်းယိုဝ်းမၢၵ်ႇမိတ်ႉသႆး ၽၢႆႇၵၢၼ်ပၢႆးတိုၵ်းပွၵ်ႈဢွၼ်တၢင်းသုတ်း ၼႂ်းႁွပ်ႈ 1 ပီႊ လႄႈ ဢၼ်လႆႈယိုဝ်းၵႂႃႇၵမ်းလိုၼ်းသုတ်းၼၼ်ႉ ပဵၼ်မိူဝ်ႈၼႂ်းလိူၼ် September 2021 သေ မီးၽူႈလူင်ႉလႅၼ်ႇၶဝ် လၢမ်းၶၢတ်ႈဝႃႈ မၢၵ်ႇမိတ်ႉသႆး ဢၼ်ၸၢမ်းယိုဝ်းၵႂႃႇၼၼ်ႉ လႅပ်ႈတေပဵၼ်မၢၵ်ႇမိတ်ႉသႆးၶွင်ၵူဝ်းရီးယႃးႁွင်ႇ လုၵ်ႈဢွၼ်တၢင်းသုတ်း ဢၼ်မီးႁႅင်းမၢၵ်ႇၼိဝ်းၶလီးယႃးလႄႈ  ၵၢၼ်ၸၢမ်းယိုဝ်း မၢၵ်ႇမိတ်ႉသႆးၵူဝ်းရီးယႃးႁွင်ႇ ၼႂ်းဝၼ်းမိူဝ်ႈဝႃးၼႆႉ ပဵၼ်ၵၢၼ်ယိုၼ်ယၼ်ဝႃႈ မၢၵ်ႇမိတ်ႉသႆးၸိူဝ်းၼၼ်ႉ ၸႂ်ႉတိုဝ်းလႆႈယဝ်ႉလႄႈ ၵူဝ်းရီးယႃးႁွင်ႇ ယင်းလၢတ်ႈဝႃႈ မၢၵ်ႇမိတ်ႉသႆးၼၼ်ႉ သႂ်ႇပႃးႁူဝ်မၢၵ်ႇၼိဝ်းၶလီးယႃး လႆႈထႅင်ႈၵွၼ်ႇ ဝႃႈၼႆ။

Glide missile ၼႆႉ ပဵၼ်ၼိုင်ႈၼႂ်းၶိူင်ႈယိပ်းဢၼ်လဵၵ်ႉလူင်းၵႂႃႇ ဢၼ်ၵူဝ်းရီးယႃးႁွင်ႇ လႆႈပူၵ်းပွင်ၶိုၼ်ႈမႃး မိူဝ်ႈဢမ်ႇႁိုင်သင်ၼႆႉ တွၼ်ႈတႃႇႁႂ်ႈမၼ်းမိၼ်လႆႈတႅမ်ႇ ႁဵတ်းႁႂ်ႈပူၼ်ႉလွတ်ႈၶူင်ႉသၢင်ႈႁႄႉၵင်ႈမၢၵ်ႇမိတ်ႉသႆးလႆႈလီလိူဝ်သေၵဝ်ႇလႄႈ ဢမ်ႇ ယုမ်ႇၸႂ်ဝႃႈ ၽၢႆႇတၢင်းၵူဝ်းရီးယႃးၸၢၼ်း၊ ၵျႃႇပၢၼ် လႄႈ ဢမေႇရိၵၢၼ်ႇ ဢၼ် ပၵ်းတႃပႂ်ႉတူၺ်းလွင်ႈၸၢမ်းယိုဝ်းမၢၵ်ႇမိတ်ႉသႆး ၵူဝ်ရီးယႃးႁွင်ႇယူႇတႃႇသေႇ ၸွင်ႇ ၵူတ်ႇၸႅတ်ႈထူပ်းႁၼ်လွင်ႈၸၢမ်းယိုဝ်းမၢၵ်ႇမိတ်ႉသႆး ၵူဝ်းရီးယႃးႁွင်ႇ မိူဝ်ႈဝႃႈၼႆႉယူႇ ႁိုဝ်ဢၼ်ဝႃႈၼၼ်ႉယူႇ။

ၸိူဝ်ႉႁိုဝ်ၵေႃႈလီ Glide missile ၵူဝ်းရီးယႃးႁွင်ႇၼႆႉ လႆႈႁပ်ႉလွင်ႈသူၼ်ၸႂ်ဢေႇလိူဝ် သေ မၢၵ်ႇမိတ်ႉသႆးပွႆႇတူဝ် ယွၼ်ႉပိူဝ်ႈၵူဝ်းရီးယႃးႁွင်ႇဢမ်ႇလႆႈထုၵ်ႇႁၢမ်ႈ လွင်ႈၸႂ်ႉ တိုဝ်း Glide missile မိူၼ်ၵၼ်တင်း မၢၵ်ႇမိတ်ႉသႆးပွႆႇတူဝ် ဢၼ်ယူႇၽၢႆႇတႂ်ႈ ၸုမ်းလွင်ႈမၼ်ႈၼိမ်သဝ်းၸၢတ်ႈၸိုင်ႈလုမ်ႈၾႃႉၼၼ်ႉ ဝႃႈၼႆ။

KCNA လၢတ်ႈဝႃႈ ယိူင်းဢၢၼ်းဢၼ်လႆႈၸၢမ်းယိုဝ်း Glide missile မိူဝ်ႈဝႃးၼႆႉ တွၼ်ႈတႃႇယုၵ်ႉၼမ်ႉၵတ်ႉလႄႈ ႁႅင်းမၢၵ်ႇမိတ်ႉသႆး ဢၼ်ၸႂ်ႉတိုဝ်းဝႆႉယူႇတီႈၼႂ်း တပ်ႉသိုၵ်းၵူဝ်းရီးယႃးႁွင်ႇ ပဵၼ်ၵၢၼ်ႁဵတ်းသၢင်ႈမၢၵ်ႇၼိဝ်းၶလီးယႃး ၽၢႆႇၵၢၼ်သိုၵ်း သေဢမ်ႇၵႃး တႃႇႁႂ်ႈယိုၼ်ယၼ်ၼမ်ႉၵတ်ႉ ၼႂ်းၵၢၼ်ၸႂ်ႉတိုဝ်းၶိူင်ႈယိပ်း ဢၼ်မီးႁႅင်း ၼိဝ်းၶလီးယႃး တီႈဢၼ်ၵူဝ်းရီးယႃးႁွင်ႇလႆႈၸႂ်ႉတိုဝ်းဝႆႉယူႇ ၼႂ်းတပ်ႉၵူဝ်းရီးယႃးႁွင်ႇ ၼၼ်ႉ ဝႃႈၼႆ။

တႆးလွတ်ႈလႅဝ်း