ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် COVID-19 ၼႂ်းမိူင်းႁူမ်ႈတုမ် ဝၼ်းလဵဝ် တၢႆ (2) ၵေႃႉ

ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် COVID-19 ၵေႃႉထီႉ (16) လႄႈ (17) လႆႈလူႉတၢႆၵႂႃႇတီႈႁူင်းယႃ မိူဝ်ႈၼႆႉ ဝၼ်းထီႉ 8 April 2020 (လိူၼ်ႁႃႈလွင်ႈ 1 ၶမ်ႈ ပီႊတႆး 2114 ၼီႈ) ဝၼ်းလဵဝ်ၵူၺ်း မီးၵူၼ်းလူႉတၢႆ (2) ၵေႃႉဝႃႈၼႆ။

ၵူၼ်းတိတ်းၸပ်း COVID-19 ၵေႃႉထီႉ (16) ပဵၼ်ၽူႈယိင်း ဢႃႇယု (63) ပီႊ ဢၼ်ယူတ်းယႃတူဝ်ယူႇတီႈ ႁူင်းယႃလူင် ဝေႇပႃႇၵီႇ ဝဵင်းတႃႈၵုင်ႈၼၼ်ႉသမ်ႉ လႆႈလူႉတၢႆၵႂႃႇ မိူဝ်ႈၼႆႉယၢမ်းၵၢင်ၼႂ် 10 မူင်းသေ ၵူတ်ႇထတ်း ထူပ်းႁၼ်ဝႃႈ တိတ်းၸပ်းၸိူဝ်ႉမႅင်းမိူဝ်ႈဝၼ်းထီႉ 1 April 2020 (လိူၼ်ႁႃႈမႂ်ႇ 9 ၶမ်ႈ ပီႊတႆး 2114 ၼီႈ) ၼၼ်ႉသေ မၼ်းၼၢင်းယၢမ်ႈၵႂႃႇႁပ်ႉလုၵ်ႈၸၢႆး ဢၼ်လုၵ်ႉတီႈမိူင်းတူႇပၢႆး တီႈတႃႈႁိူဝ်းမိၼ်ဝဵင်းတႃႈၵုင်ႈယဝ်ႉ မီးၾၢင်ႁၢင်ႈႁိူဝ်ႉဢူၼ်ႈ မီးလူမ်းၼၢဝ်ပႃးလႄႈ ၸင်ႇလႆႈၶဝ်ႈယူတ်းယႃတူဝ်တီႈႁူင်းယႃၼႂ်းဝၼ်းထီႉ 31 March 2020 လိူၼ်ႁႃႈမႂ်ႇ 8 ၶမ်ႈ ပီႊတႆး 2114 ၼီႈ ဝႃႈၼႆ။

ၵူၺ်းၵႃႈ ယွၼ်ႉမၼ်းတၢင်း မီးတၢင်းပဵၼ်ၸပ်းတူဝ် မိူၼ်ၼင်ႇ လိူတ်ႈၶိုၼ်ႈ၊ ယဵဝ်ႈဝၢၼ်ၸိူဝ်းၼၼ်ႉသေ သမ်ႉတိတ်းၸပ်း ၸိူဝ်ႉမႅင်းတၢင်းပဵၼ် COVID-19 ထႅင်ႈလႄႈ ၸင်ႇလႆႈလူႉတၢႆၵႂႃႇၼႆယဝ်ႉ။

ၵူၼ်းတိတ်းၸပ်း COVID-19 ၵေႃႉထီႉ (17) ပဵၼ်ၽူႈၸၢႆး ဢႃႇယု (47) ပီႊ ဢၼ်ယူတ်းယႃတူဝ်ယူႇတီႈ ႁူင်းယႃလူင်ပျီႇ တိူင်းပႃႇၵိူဝ်ၼၼ်ႉ လႆႈလူႉတၢႆၵႂႃႇ မိူဝ်ႈၼႆႉ ဝၼ်းထီႉ 8 April 2020 (လိူၼ်ႁႃႈလွင်ႈ 1 ၶမ်ႈ ပီႊတႆး 2114 ၼီႈ) ယၢမ်းၵၢင်ၼႂ်ၸဝ်ႉ 3:40 မူင်းၼႆ ႁွင်ႈၵၢၼ်ၽၢႆႇပၢႆးယူႇလီ တိူင်းပႃႇၵိူဝ် လႆႈယိုၼ်ယၼ်လၢတ်ႈတီႈ သိုဝ်ႇၶၢဝ်ႇဝႆႉၼင်ႇၼႆ။

ၵူၼ်းပဵၼ် ၵေႃႉထီႉ (17) ဢၼ်လူႉတၢႆၵႂႃႇ ယွၼ်ႉတိတ်းၸပ်း ၸိူဝ်ႉမႅင်းတၢင်းပဵၼ် COVID-19 ၼႆႉ ပဵၼ်ၵႅမ်ၽူႈၵွၼ်းၽၢႆႇဢုပ်ႉပိူင်ႇ ၸႄႈဝဵင်းပွၵ်ႉၶွင်း တိူင်းပႃႇၵိူဝ်သေ ၵူတ်ႇထတ်းထူပ်းႁၼ်ဝႃႈ တိတ်းၸပ်း ၸိူဝ်ႉမႅင်းတၢင်းပဵၼ် COVID-19 မိူဝ်ႈဝၼ်းထီႉ 2 April 2020 (လိူၼ်ႁႃႈမႂ်ႇ 10 ၶမ်ႈ ပီႊတႆး 2114 ၼီႈ) တိတ်းၸပ်းမႃးတီႈ ၵေႃႉပဵၼ်မေးၼၢင်း ၵူၼ်းတိတ်းၸပ်းၸိူဝ်ႉမႅင်း COVID-19 ၵေႃႉထီႉ (15) ၼၼ်ႉသေ လုၵ်ႈယိင်း ဢႃႇယု 8 ၶူပ်ႇ၊ လုၵ်ႈၸၢႆး ဢႃႇယု 10 ၶူပ်ႇလႄႈ လၢၼ်ယိင်း ဢႃႇယု 18 ပီႊၵေႃႈ တိတ်းၸပ်းၸွမ်းမိူၼ်ၵၼ်ၼႆယဝ်ႉ။

ယူႇတီႈမေႃယႃၸႄႈဝဵင်းၶဝ်လၢတ်ႈဝႃႈ− ၵူၼ်းပဵၼ်လူႉတၢႆၵႂႃႇၼႆႉ လႆႈႁူႉဝႃႈပဵၼ်ယွၼ်ႉတိတ်းၸပ်း ၸိူဝ်ႉမႅင်းတၢင်းပဵၼ် COVID-19 သေ ပွတ်ႇတင်းႁူဝ်ၸႂ်ၼႂ်းတူဝ် ဢမ်ႇႁဵတ်းၵၢၼ်လႄႈ ၸင်ႇလႆႈလူႉတၢႆၵႂႃႇ၊ မိူဝ်ႈပူၼ်ႉမႃး သွင်သၢမ်ဝၼ်းၼၼ်ႉၵေႃႈ ၵူၼ်းပဵၼ်ၵေႃႉၼႆႉ ထူၺ်ႈၸႂ်ၵပ်ႉႁႅင်းယူႇ၊  ၶူးမေႃယႃလူင် Professor တီႈတႃႈၵုင်ႈၵေႃႈ မႃးယူတ်းယႃၸွႆႈ 3 ၵေႃႉ၊ ဝၢႆးၼၼ်ႉ ပဵၼ်ပဵၼ်ႁၢႆႁၢႆသေ မိူဝ်ႈၼႆႉယၢမ်းၵၢင်ၼႂ်ၸဝ်ႉ 1 မူင်း ၼၼ်ႉ ၸင်ႇၶိုၼ်းပဵၼ်ႁႅင်းထႅင်ႈၵမ်းၼိုင်ႈ ၼႆယဝ်ႉ။

လုၵ်ႈဢွၼ်ႇ ၸိူဝ်းတိတ်းၸပ်းၸိူဝ်ႉမႅင်းတၢင်းပဵၼ် COVID-19 ၼၼ်ႉတႄႉ ဢမ်ႇပေႃးလီလႆႈမႆႈၸႂ်သင်သေ ယူတ်းယႃတူဝ်ဝႆႉယူႇတီႈ ႁူင်းယႃလူင်ပျီႇ တိူင်းပႃႇၵိူဝ်မိူၼ်ၵၼ်၊ ၵေႃႉပဵၼ်မေးၼၢင်း ၵူၼ်းပဵၼ်ၵေႃႉထီႉ (15) ၼၼ်ႉတႄႉ ယွၼ်ႉလီလႆႈမႆႈၸႂ်ႁႅင်းလႄႈ လႆႈယူတ်းယႃတူဝ်ဝႆႉယူႇတီႈ ႁူင်းယႃလူင် ဝေႇပႃႇၵီႇ တိူင်းတႃႈၵုင်ႈၼႆ ႁွင်ႈၵၢၼ်လူင်ၽၢႆႇပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဝႆႉၼင်ႇၼႆ။

ထိုင်မႃးဝၼ်းထီႉ 8 April 2020 ၼႆႉ ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 တီႈၼႂ်းမိူင်းႁူမ်ႈတုမ် မီး (22) ၵေႃႉ၊ ၵူၼ်းဢၼ်လူႉသဵင်ႈတၢႆသမ်ႉ မီး (3) ၵေႃႉ ၼႆယဝ်ႉ။

တႆးလွတ်ႈလႅဝ်း