ၵူၼ်းမိူင်းတၢႆ 1 ၵေႃႉ မၢတ်ႇၸဵပ်း 3 ၵေႃႉ တီႈၵျွၵ်ႉမႄး

ၸုမ်းသိုၵ်းမၢၼ်ႈ တင်း ၸုမ်းသိုၵ်းပလွင်ႈ TNLA ပဵၼ်ပၢင်တိုၵ်းၵၼ်ထႅင်ႈ တီႈဝဵင်းၵျွၵ်းမႄးသေ မီးမၢၵ်ႇလူင်တူၵ်းသႂ်ႇၵူၼ်းမိူင်း လႆႈမၢတ်ႇၸဵပ်းလူႉတၢႆ ၼႆယဝ်ႉ။

မိူဝ်ႈဝႃးဝၼ်းထီႉ 15 July 2024 (လိူၼ်ပႅတ်ႇမႂ်ႇ 10 ၶမ်ႈ ပီႊတႆး 2118 ၼီႈ) ၸုမ်းသိုၵ်းသွင်ၽၢႆႇပိုတ်းယိုဝ်းၵၼ် ၸွမ်းၼႂ်းပိုၼ်ႉတီႈဝဵင်းၵျွၵ်းမႄးသေ ၸႂ်ႉမၢၵ်ႇလူင်ယိုဝ်းၸူးၵၼ်တင်းၼမ်၊ ၵမ်းၼၼ်ႉ မီးမၢၵ်ႇလူင်ၵႂႃႇတူၵ်းတႅၵ်ႇ တီႈၼႂ်းပွၵ်ႉ 9 လႄႈ မီးၵူၼ်းမိူင်းလႆႈမၢတ်ႇၸဵပ်း 3 ၵေႃႉ ၼႂ်းၼၼ်ႉမီး 2 ၵေႃႉ လႆႈတၢင်းၸဵပ်းမၢတ်ႇႁၢဝ်ႈႁႅင်း ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မိူဝ်ႈယၢမ်းဝၢႆးဝၼ်း 15:00 မူင်းပၢႆၼၼ်ႉ သိုၵ်းသွင်ၸုမ်းပိုတ်းယိုဝ်းၵၼ်လႄႈ မၢၵ်ႇၵႂႃႇတူၵ်းတီႈၼမ်ႉႁူးတွင်း (ဝၢၼ်ႈၼိူဝ်) သေ ၸၢၵ်ႇမၢၵ်ႇတိူဝ်ႉၸပ်းၺႃးမႄႈထဝ်ႈၵေႃႉၼိုင်ႈ လႆႈတၢႆၵႂႃႇၶႃႈဢေႃႈ၊ တီႈပွၵ်ႉ 9 ၼၼ်ႉၵေႃႈ မီးၵူၼ်းမၢတ်ႇၸဵပ်း 3 ၵေႃႉ ဝႃႈၼႆ။

ပၢင်တိုၵ်းဢၼ်ပဵၼ်တီႈဝဵင်းၵျွၵ်ႉမႄးၼၼ်ႉ လႆႈႁူႉဝႃႈ သိုၵ်းမၢၼ်ႈပဵၼ်မၢႆတပ်ႉ ၶမယ 501 လႄႈ ၶမယ 502 သေ တေႃႇသူႈၵၼ်တင်းသိုၵ်းပလွင်ႈ TNLA ဝႆႉယူႇၼႆယဝ်ႉ။

ထႅင်ႈလွင်ႈၼိုင်ႈၵေႃႈ ယွၼ်ႉပၢင်တိုၵ်းၼႂ်းပိုၼ်ႉတီႈ လႄႈ မီးၵူၼ်းမိူင်းၼႂ်းဝဵင်း/ၸွမ်းသၢပ်ႇဝဵင်းၵျွၵ်ႉမႄး လႆႈပၢႆႈၽေးပၢင်တိုၵ်းမီးယူႇ 10,000 ပၢႆ ၼႆ လႆႈႁူႉၸွမ်းၶၢဝ်ႇမီးၼင်ႇၼႆ။

တႆးလွတ်ႈလႅဝ်း