ၵူၼ်းမိူင်းလႆႈတၢႆ 13 ၵေႃႉ မၢတ်ႇၸဵပ်း 24 ယွၼ်ႉႁိူဝ်းမိၼ်တိုၵ်းသိုၵ်းမၢၼ်ႈ တုမ်ႉတွပ်ႇသိုၵ်းၵူဝ်းၵၢင်ႉ

ဢမ်ႇမီးပၢင်တိုၵ်းသင်သေ သိုၵ်းမၢၼ်ႈဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ ၼႂ်းဝဵင်းသႅၼ်ဝီ ပိူဝ်ႈပဵၼ်ၵၢၼ်တုမ်ႉတွပ်ႇ ၸုမ်းသိုၵ်းၵူဝ်းၵၢင်ႉ MNDAA ၼႆသေ ၵူၼ်းမိူင်းၸိူဝ်းဢမ်ႇမီးတၢင်းၽိတ်းသင်ၼၼ်ႉ လႆႈလူႉတၢႆ 13 ၵေႃႉ၊ မၢတ်ႇၸဵပ်း 24 ၵေႃႉ လႄႈႁိူၼ်းယေးၵူၼ်းမိူင်းလူႉၵွႆ 40 လင်ပၢႆ ပႃးၸဵမ်ႁူင်းႁဵၼ်း ၼႆယဝ်ႉ။

မိူဝ်ႉဝၼ်းထီႉ 6 August 2024 (လိူၼ်ၵဝ်ႈမႂ်ႇ 2 ၶမ်ႈ ပီႊတႆး 2118 ၼီႈ) ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (Shan Humam Rights foundation − SHRF) ဢွၵ်ႇလိၵ်ႈၽိုၼ်တၢမ်းငဝ်းလၢႆး လွင်ႈၵူၼ်းမိူင်းမၢတ်ႇၸဵပ်းလူႉတၢႆ လႄႈလွင်ႈႁိူၼ်းယေးၵူၼ်းမိူင်းလူႉၵွႆ ယွၼ်ႉသိုၵ်းမၢၼ်ႈဢဝ်ႁိူဝ်းမိၼ် ၵႂႃႇပွႆႇမၢၵ်ႇသႂ်ႇတီႈသႅၼ်ဝီ တုမ်ႉတွပ်ႇသိုၵ်းၵူဝ်းၵၢင်ႉ မိူဝ်ႈၼႂ်းလိူၼ် July 2024 ပူၼ်ႉမႃးၼၼ်ႉ ၼႆယဝ်ႉ။

ၼႂ်းၽိုၼ်လိၵ်ႈၼၼ်ႉ တႅမ်ႈပႃးဝႆႉဝႃႈ “ၼႂ်းလိူၼ် July 2024 ပူၼ်ႉမႃးၼႆႉ သိုၵ်းမၢၼ်ႈဢဝ်ႁိူဝ်းမိၼ်တိုၵ်းပွႆႇမၢၵ်ႇတီႈဝဵင်းသႅၼ်ဝီ ပိူဝ်ႈပဵၼ်လွင်ႈတုမ်ႉတွပ်ႇၶိုၼ်းသိုၵ်းၵူဝ်းၵၢင်ႉ ဢၼ်ၶဝ်ႈလေႃႇတိုၵ်းသိုၵ်းမၢၼ်ႈ တီႈလႃႈသဵဝ်ႈ။ လွင်ႈသိုၵ်းမၢၼ်ႈဢဝ်ႁိူဝ်းမိၼ်တိုၵ်းပွႆႇမၢၵ်ႇၼၼ်ႉ တိူဝ်ႉၺႃးၵူၼ်းမိူင်းလူႉတၢႆ 13 ၵေႃႉ၊ မၢတ်ႇၸဵပ်း 24 လႄႈတိူဝ်ႉၺႃး ႁိူၼ်းယေး ၵူၼ်းမိူင်း လူႉၵွႆ 40 လင်ပၢႆ ပႃးၸဵမ် ႁူင်းႁဵၼ်း 3 လင်” ၼႆယဝ်ႉ။

သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇတီႈဝဵင်းသႅၼ်ဝီၼႆႉ တႄႇဢဝ်ၼႂ်းဝၼ်းထီႉ 3 July 2024 ပဵၼ်ဝၼ်းလဵဝ်ၵၼ်တင်း သိုၵ်းၵူဝ်းၵၢင်ႉ MNDAA လႄႈၸုမ်းဢူၺ်းလီမၼ်း ၶဝ်ႈလေႃႇတိုၵ်းသိုၵ်းမၢၼ်ႈ တီႈလႃႈသဵဝ်ႈလႄႈ ၼႂ်းဝၼ်းၼၼ်ႉ သိုၵ်းမၢၼ်ႈၸင်ႇဢဝ်ႁိူဝ်းမိၼ်ပွႆႇမၢၵ်ႇလူင် ဢၼ်မီးၼမ်ႉၼၵ်း 500 ပွင်ႇ 3 လုၵ်ႈ တီႈႁိမ်းႁူင်းပလိၵ်ႈ ၼႂ်းဝဵင်းသႅၼ်ဝီလႄႈ တိူဝ်ႉၺႃးႁိူၼ်းယေးၵူၼ်းမိူင်း လူႉၵွႆ 10 လင် ၼႆယဝ်ႉ။

တႄႇဢဝ်ၼႂ်းဝၼ်းထီႉ 3 July 2024  ၼၼ်ႉမႃး တေႃႇထိုင်ဝၼ်းထီႉ 28 July 2024 ၼၼ်ႉ ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇတီႈဝဵင်းသႅၼ်ဝီသေ ၵူၼ်းမိူင်းဢၼ်လႆႈလူႉတၢႆၸွမ်းတင်းသဵင်မီး 13 ၵေႃႉ လႄႈဢၼ်မၢတ်ႇၸဵပ်းမီး 24 ၵေႃႉ ႁိူၼ်းယေးလူႉၵွႆၸွမ်း 43 လင် ၼႆၼၼ်ႉ တေႃႇထိုင်ယၢမ်းလဵဝ် သိုၵ်းၸုမ်းလႂ်ၵေႃႈ ပႆႇၶိုၼ်းႁပ်ႉဢဝ်ပုၼ်ႈၽွၼ်းသၢႆႈတႅၼ်းပၼ်ၶိုၼ်း ၼႆယဝ်ႉ။

မိူဝ်ႈၼႂ်းဝၼ်းထီႉ 5 August 2024 ၼႆႉၵေႃႈ သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈၼႂ်းဝဵင်းၵူတ်ႇၶၢႆလႄႈ ႁဵတ်းႁႂ်ႈၾႆးလုၵ်ႉမႆႈၵၢတ်ႇ ၵူၺ်းဢမ်ႇၵႃး ၵူၼ်းမိူင်းလႆႈလူႉတၢႆၸွမ်းဢမ်ႇယွမ်း 5 ၵေႃႉ။ ၼႂ်းဝၼ်းလဵဝ်ၵၼ်ၼၼ်ႉၵူၺ်း တီႈဝဵင်းၵျွၵ်ႉမႄးၵေႃႈ သိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇသႂ်ႇတီႈၵွင်းမူးလွႆသႅင် (ပတမျႃး) ၼၼ်ႉ 2 လုၵ်ႈ၊ တီႈႁိမ်းႁွမ်းပွၵ်ႉသၶၢၼ်းၵူင်းၼၼ်ႉ 96 လုၵ်ႈ လႆႈႁူႉၸွမ်းၼင်ႇၼႆ။

တႆးလွတ်ႈလႅဝ်း