ၵူၼ်းမိူင်းသၢၼ်ၶတ်းဝႆႉသေတႃႉ ၶွမ်ႇပၼီႇၶဝ်တႄႇၶုတ်းထၢၼ်ႇႁိၼ်တီႈမိူင်းၵူၵ်း

ၵူၼ်းမိူင်းၵူၵ်း ႁူမ်ႈၵၼ်သၢၼ်ၶတ်းဝႆႉ လွင်ႈတေၶုတ်းထၢၼ်ႇႁိၼ်ၼႂ်းပိုၼ်ႉတီႈမိူင်းၵူၵ်း ၸႄႈဝဵင်း မိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းၼႆသေတႃႉၵေႃႈ မိူဝ်ႈလဵဝ်ၼႆႉ ၶွမ်ႇပၼီႇၶုတ်းထၢၼ်ႇႁိၼ်ၶဝ် တႄႇၶုတ်းထၢၼ်ႇႁိၼ် ယဝ်ႉၼႆ ၵူၼ်းၼႂ်းပိုၼ်ႉတီႈၶဝ် လၢတ်ႈၼင်ႇၼႆ။

ၸွမ်းလူၺ်ႈၶေႃႈပိုၼ်ၽၢဝ်ႇ ၵေႃၵပ်းသၢၼ်တူင်ႉၼိုင်တႃႇမႄႈၼမ်ႉမိူင်းတႆးၼၼ်ႉ ဢွၵ်ႇဝႆႉမိူဝ်ႈဝၼ်းထီႉ 22 October 2019 ၼႆႉဝႃႈ ၵူၼ်းမိူင်းၵူၵ်း 300 ပၢႆႁူမ်ႈၵၼ်ၸတ်းပၢင်ယွၼ်းသူးပၼ်ၼမ်ႉလိၼ်ႁိၼ်ၽႃ ပႃႇမႆႉ လႄႈ သၢၼ်ၶတ်း လွင်ႈၶုတ်းထၢၼ်ႇႁိၼ်လႄႈ ႁူင်းၾႆးၾႃႉ ၼႂ်းမိူင်းၵူၵ်းသေ တုၵ်းယွၼ်း သၢၼ်ၶတ်းတေႃႇ ၶွမ်ႇပၼီႇထႆးလႄႈမၢၼ်ႈ ၊ ၵူၺ်းၵႃႈ ဝၢႆးၼၼ်ႉဢမ်ႇႁိုင် ပုၼ်ႈတႃႇတေ ၶုတ်းထၢၼ်ႇႁိၼ် ၼႆသေ ၸုမ်းႁဵတ်းၵၢၼ် ၶွမ်ႇပၼီႇထႆးၶဝ်ၵႂႃႇတီႇၽဵဝ်ႈတီႈလိၼ်ပိုၼ်ႉတီႈ တၢင်းတူၵ်းမၢၼ်ႈဝဵင်း 3200 ဢေႇၵႃႉၼႆယဝ်ႉ။

လွင်ႈၼႆႉ ၽၢႆႇတင်းၶွမ်ႇပၼီႇၶဝ် ႁွင်ႉၵူၼ်းမိူင်း ႁဵတ်းပၢင်ၵုမ်ၵၼ် တီႈၵျွင်းမုၼ်ၸဝ်ႈ မၢၼ်ႈဝဵင်းသေ လၢတ်ႈၵူၼ်း မိူင်းတႄႉ တေၶုတ်းၸၢမ်းတူၺ်း တႃႇ 3200 ဢေႇၵႃႉ ၊ ၵူၺ်းၵႃႈ တႃႇ 3200 ဢေႇၵႃႉၼႆႉ မၼ်းၼမ်ႁႅင်းၼႃႇလႄႈ ၸွမ်းၼင်ႇဢၼ်ၵူၼ်းမိူင်းၶဝ်လႆႈႁၼ်ၼၼ်ႉ ဢမ်ႇၸႂ်ႈဝႃႈ ၸၢမ်းၶုတ်းထၢၼ်ႇ ႁိၼ်ၵူၺ်း ၶဝ်ၶုတ်းတႄႉတႄႉ ဝႃႈၼႆ ၊ ပေႃးတေသိုပ်ႇၶုတ်းၼႆၸိုင် ဢမ်ႇၵွမ်ႉၵႃး တုမ်ႉတိူဝ်ႉတေႃႇ မိူင်းၵူၵ်းၵူၺ်း တႄႇၸဵမ်ဝၢၼ်ႈလဵၵ်ႉဝၢၼ်ႈယႂ်ႇ ႁိမ်းႁွမ်းၸိူဝ်းၼႆႉလႄႈ တေတုမ်ႉတိူဝ်ႉပႃး သၽႃႇဝ သိင်ႇဝႅတ်ႉလွမ်ႉ ၼမ်ႉလိၼ်ႁိၼ်ၽႃႁဝ်းလႄႈ ၵူၼ်းဝၢၼ်ႈ ၵူၼ်းမိူင်း မိူင်းၵူၵ်းၶဝ် ပဵၼ်ဢၼ်မႆႈၸႂ်တႄႉတႄႉၼႆယဝ်ႉ။

လွင်ႈၼႆႉၵေႃႈ ၵူၼ်းမိူင်း မိူင်းၵူၵ်းၶဝ်ႁူမ်ႈၵၼ်တႅမ်ႈလိၵ်ႈသၢၼ်ၶတ်း သူင်ႇထိုင်ပၼ် ၽူႈၵဵဝ်ႇၶွင်ႈၶဝ်ယဝ်ႉ ၵူၺ်းၵႃႈဝႃႈ ဢမ်ႇမီးလွင်ႈလႅၵ်ႈလၢႆႈသင်မႃးၼႆယဝ်ႉ။

ပေႃးတူၺ်းငဝ်းလၢႆးတေႃႈလဵဝ်ၼႆႉ ဝၢၼ်ႈၵမ်ႈၽွင်ႈၼႂ်းမိူင်းၵူၵ်း ႁၼ်ဝႃႈမီးထၢၼ်ႇႁိၼ်ၼႆလႄႈ ဝၢၼ်ႈႁိမ်းႁွမ်း ၸိူဝ်းၼၼ်ႉၵေႃႈ ပေႃးဝႃႈၶုတ်းၸၢမ်းတူၺ်းယဝ်ႉ မီးထၢၼ်ႇႁိၼ်ၼႆၸိုင် ၵူဝ်ဝႃႈတေ လႆႈၶၢႆႉပၼ်ဝၢၼ်ႈလႄႈ တီႈလိၼ်ပူႇမွၼ်ႇၼၢႆးယႃႈႁဝ်း လႄႈ တုမ်ႉတိူဝ်ႉတေႃႇသၽႃႇဝ သိင်ႇဝႅတ်ႉလွမ်ႉ ၸိူဝ်းၼႆႉ ၼႆယဝ်ႉ။

မိူဝ်ႈဝၼ်းထီႉ 11 July 2019 ၼႆႉ ၶွမ်ႇပၼီႇ သႁႃၵွၼ်း (SQ) မိူင်းထႆးလႄႈ ၶွမ်ႇပၼီႇ သူၺ်ႇယေႇၵၢၼ်ႇ (Golden Lake co.,ltd) မိူင်းမၢၼ်ႈ လႆႈလူင်းလၢႆးမိုဝ်း MOU ၸွမ်းၵၼ် တႃႇၶုတ်းထၢၼ်ႇႁိၼ် ၼႂ်းမိူင်းၵူၵ်း တႃႇၶၢဝ်းတၢင်း 28 ပီႊသေ မုင်ႈမွင်းဝႃႈ တေမီးလၢႆးလႆႈ 27 ႁဵင်လၢၼ်ႉဝၢတ်ႇ ငိုၼ်းထႆးၼႆ လႆႈႁၼ် ၼႂ်းလိၵ်ႈပိုၼ်ၽၢဝ်ႇၼၼ်ႉ လၢတ်ႈဝႆႉၼင်ႇၼႆ။ၽၢႆႇထႆးၶဝ် ႁူမ်ႈတိုၼ်းလၢင်းဝႆႉ 300 လၢၼ်ႉဝၢတ်ႇသေ ပေႃးလႆႈၼမ်ႉမျၢတ်ႈၼမ်ႉတွၼ်းမႃးၸိုင် ထႆးတေလႆႈ 70% ၶွမ်ႇပၼီႇမၢၼ်ႈ တေလႆႈ 30% ၼႆယဝ်ႉ။

ၶွမ်ႇပၼီႇထႆးလႄႈ ဢီႇတလီႇၶဝ် လႆႈၶႂၢင်ႉတႃႇၶုတ်းႁႄႈလိၵ်ႈၼၢႆႉ (ထၢၼ်ႇႁိၼ်သီၼမ်ႉထၢၼ်) ၼႂ်းမိူင်းၵူၵ်း ၼႂ်းပီႊ 2008 ၵူၺ်းၵႃႈ လႆႈၵိုတ်းယင်ႉပႅတ်ႈ ၼႂ်းပီႊ 2011 ယွၼ်ႉၵူၼ်းမိူင်းလႄႈ ၵူၼ်းမိူင်းထႆး ႁူမ်ႈၵၼ် သၢၼ်ၶတ်းႁၢဝ်ႉႁႅင်းၼႆယဝ်ႉ။

ၵူၼ်းဝၢၼ်ႈမိူင်းၵူၵ်းၵေႃႉၼိုင်ႈၵေႃႈလၢတ်ႈဝႃႈ “ႁဝ်းၶႃႈၸတ်းပၢင်ယွၼ်းသူးပၼ်ၼမ်ႉလိၼ်ႁိၼ်ၽႃႁဝ်း ၶႃႈ ပုၼ်ႈတႃႇတေၵႅတ်ႇၶႄႁႄႉၵင်ႈၽေးၶဵၼ် လႄႈ ႁၵ်ႉသႃၶူဝ်းတိုၼ်းထၢၼ်ႇႁိၼ်ႁဝ်းၶႃႈ ဝႆႉၼႂ်းၽႅၼ်ႇလိၼ် မိူင်းတႆးၼၼ်ႉယဝ်ႉၶႃႈ ၊ သင်ဝႃႈလႆႈၶုတ်းဢွၵ်ႇၼႆ မၼ်းတိုၼ်းတေတုမ်ႉတိူဝ်ႉတီႈ လိၼ်ႁႆႈၼႃး ၊ ထိူၼ်ႇၶိူဝ်း ပႃႇမႆႉႁဝ်းလႄႈ မႄႈၼမ်ႉႁဝ်းၶႃႈၸိူဝ်းၼႆႉယဝ်ႉ ဝႃႈၼႆ။

မိူင်းၵူၵ်းၼႆႉ ႁၢင်ႇၵႆလႅၼ်လိၼ်ထႆး မွၵ်ႈ 40 ၵီႇလူဝ်ႇမီႇတိူဝ်ႇ ပဵၼ်ဝႆႉမိူင်းႁူၺ်ႈလွႆ ၼႂ်းၸိုင်ႈတႆးပွတ်းဢွၵ်ႇၶူင်း ၊ မီးႁူဝ်ၵူၼ်းမွၵ်ႈ 2500 ပဵၼ်ဢွင်ႈတီႈယူႇသဝ်း ပီႈၼွင်ႉတႆး ၊ လႃးႁူႇ ၊ ဢႃႇၶႃႇသေ ယူႇႁိမ်းၸမ် ႁူဝ်မႄႈၼမ်ႉၵူၵ်း ဢၼ်လႆလဵင်ႉလူသၢႆၸႂ် သတ်းလႄႈ တူင်ႇဝူင်းၵူၼ်း လၢႆလၢႆၶိူဝ်းၵူၼ်း ပႃးၸဵမ်ၵူၼ်းမိူင်း ၸိူဝ်းယူႇ တွၼ်ႈတၢင်းတႂ်ႈမႄႈၼမ်ႉ ၼႂ်းၸႄႈတွၼ်ႈၵဵင်းမႆႇ ၵဵင်းႁၢႆး မိူင်းထႆးၸိူဝ်းၼႆႉပႃးၼႆယဝ်ႉ။ ယၢမ်းလဵဝ်တႄႉသိုၵ်းမၢၼ်ႈ သၢမ်တပ်ႉၵွင် လႆႈထႅမ်ႁႅင်းသိုၵ်း ၶဝ်ႈလွမ်ႉႁွပ်ႈဝႆႉၼႂ်းပိုၼ်ႉတီႈ ပိူဝ်ႈတႃႇ ဢဝ်လွင်ႈႁူမ်ႇလူမ်ႈ ၵၢၼ်ၶုတ်းထၢၼ်ႇႁိၼ်ဝႃႈၼႆ။

တႆးလွတ်ႈလႅဝ်း