ၵူၼ်းမိူင်းၵျွၵ်ႉမႄးတိူဝ်ႉမၢၵ်ႇလူင်တၢႆတင်းႁိူၼ်း

သၢမ်ၵေႃႉပေႃႈမႄႈလုၵ်ႈ ႁဵတ်းၵေႃႉၵၼ်တီႈၼႂ်းဝၢင်းႁူင်းၸၢၵ်ႈလိူဝ်ႈမႆႉ ဝၢၼ်ႈၶူဝ်မုင်း ဢိူင်ႇၶူဝ်မုင်း ၸႄႈဝဵင်းၵျွၵ်ႉမႄးၼၼ်ႉ လႆႈတိူဝ်ႉၸပ်းၺႃးမၢၵ်ႇလူင် ၶွင်ၸုမ်းယိပ်းၵွင်ႈၵၢင်ႇသေ လူႉသဵင်ႈၵႂႃႇတင်းမူတ်း ၼႆယဝ်ႉ။

မိူဝ်ႈဝၼ်းထီႉ 16 July 2024 (လိူၼ်ပႅတ်ႇမႂ်ႇ 11 ၶမ်ႈ ပီႊတႆး 2118 ၼီႈ) ယၢမ်းဝၢႆးဝၼ်း 14:00 မူင်း မီးမၢၵ်ႇလူင်ၸုမ်းယိပ်းၵွင်ႈၵၢင်ႇ ၵႂႃႇတူၵ်းတႅၵ်ႇတီႈ ၼႂ်းဝၢင်းႁူင်းၸၢၵ်ႈလိူဝ်ႈမႆႉသေ ၵေႃႉပဵၼ်လုင်းၵေႇလႃႇသ ဢႃႇယုမွၵ်ႈ 70 ပီႊ၊ ပႃႈပႂၢင်ႉ ဢႃႇယု 60 ပီႊ လႄႈ လုၵ်ႈၸၢႆး ၵလႃးလေး ဢႃႇယု 40 ပီႊ လႆႈတၢႆထင်တီႈၵႂႃႇ တင်းသၢမ်ၵေႃႉပေႃႈမႄႈလုၵ်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မၢၵ်ႇဢၼ်ၵႂႃႇတူၵ်းတႅၵ်ႇသႂ်ႇၵူၼ်းမိူင်းၼႆႉ ပဵၼ်မၢၵ်ႇလူင်ၶွင်ၸုမ်းသိုၵ်းမၢၼ်ႈ၊ ၸိူဝ်းၶဝ်သၢမ်ၵေႃႉပေႃႈမႄႈလုၵ်ႈၼႆႉ ပဵၼ်ၵူၼ်းဝၢၼ်ႈတိုဝ်ႉလႅင် ပၢႆႈၽေးပၢင်တိုၵ်းသေ မႃးယွၼ်းယူႇသဝ်းဝႆႉ တီႈႁူင်းၸၢၵ်ႈလိူဝ်ႈမႆႉ ၼႆၶႃႈဢေႃႈ၊ ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ၸုမ်းသိုၵ်းမၢၼ်ႈ ယိုဝ်းမၢၵ်ႇလူင်ၵႂႃႇတူၵ်းသႂ်ႇတီႈ ဢွင်ႈတီႈမေးၵႃး ၼႂ်းပွၵ်ႉ 8 လႄႈ ၾႆးမႆႈၵႃးၵႂႃႇ 3 လမ်း ဝႃႈၼႆ။

ၶၢပ်ႈတူဝ်ၸိူဝ်းၶဝ်ပေႃႈမႄႈလုၵ်ႈသၢမ်ၵေႃႉၼၼ်ႉ တၢင်းၽၢႆႇၸုမ်းပရႁိတ ဝဵင်းၵျွၵ်ႉမႄး လႆႈၵႂႃႇၸွႆႈဢဝ်ၶၢပ်ႈတူဝ်သေ ဢဝ်သူင်ႇဝႆႉတီႈႁူင်းယႃယဵၼ်ဝႆႉ ဝႃႈၼႆ။

ယွၼ်ႉပၢင်တိုၵ်းတီႈၼႂ်းဝဵင်းၵျွၵ်ႉမႄးသေ မီးၵူၼ်းမိူင်းလႆႈမၢတ်ႇၸဵပ်းတၢႆတင်းၼမ် လႄႈ ၶူဝ်းၶွင်/ႁိူၼ်းယေးၵေႃႈ လူႉၵွႆတင်းၼမ် သေဢမ်ႇၵႃး ဢမ်ႇမီးၸုမ်းယိပ်းၵွင်ႈၵင်ႇၸုမ်းလႂ် ႁပ်ႉဢဝ်ပုၼ်ႈၽွၼ်းသၢႆတႅၼ်းပၼ် လွင်ႈလူႉသုမ်း ၼႆယဝ်ႉ။

တႆးလွတ်ႈလႅဝ်း