ၵူၼ်းမိူင်းၺႃးယိုဝ်းတၢႆ 37 ၵေႃႉ ၼႂ်းတိူင်းၸႄႈၵႅင်း

သင်ႇၶၸဝ်ႈ လႄႈ ၵူၼ်းဝၢၼ်ႈၵူၼ်းမိူင်း ပႃးၸဵမ်ၼၢင်းယိင်း ဢၼ်ယူႇသၢင်ႈၵိၼ်သဝ်း လၢႆလၢႆဝဵင်း ၼႂ်းတိူင်းၸႄႈၵႅင်းၼၼ်ႉ ထုၵ်ႇၵူၼ်းဢမ်ႇႁူႉၸုမ်းယိုဝ်းတၢႆပႅတ်ႈ 37 ၵေႃႉ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ၸုမ်းပရႁိတ ၼႂ်းတိူင်းၸႄႈၵႅင်းလၢတ်ႈၼႄဝႃႈ “ၼႂ်းလိူၼ် September 2022 ၵူၼ်းမိူင်း ဢၼ်ယူႇသၢင်ႈၵိၼ်သဝ်းၼႂ်းၸႄႈဝဵင်း မူင်ႇယႂႃႇ၊ ၵလေး၊ သူၺ်ႇပိူဝ်ႇ၊ ဝႅတ်ႉလႅတ်ႉ၊ ၵၢၼ်ႉပလူႇ၊ ၸႄႈၵႅင်း၊ ၶမ်းပၢတ်ႉ၊ ႁူမ်ႈမၢၵ်ႇလၢင်း၊ ထီးၶျၢႆႉ၊ မၢၼ်ႈမွၵ်ႇ ၼႆႉ ထုၵ်ႇၺႃးၵူၼ်းဢမ်ႇႁူႉၸုမ်း ယိုဝ်းတၢႆပႅတ်ႈ ႁူမ်ႈ 37 ၵေႃႉ၊ ၼႂ်းၼၼ်ႉၵမ်ႈၽွင်ႈၺႃးယိုဝ်းတၢႆ ၽွင်းၵႂႃႇသူင်ႇၵႂႃႇႁပ်ႉ လုၵ်ႈဢွၼ်ႇတီႈႁူင်းႁဵၼ်း၊ ၵမ်ႈၽွင်ႈၺႃးယိုဝ်းတၢႆၼႂ်းႁိူၼ်း၊ ၸွမ်းတၢင်း၊ ၼႂ်းၵၢတ်ႇ လႄႈ ၽၢႆႇၼႃႈလုၵ်ႈမေးၸိူဝ်းၼႆႉ၊ ၸဝ်ႈၼင်ႈၵျွင်းပႃးၼိုင်ႈၵေႃႈ ထုၵ်ႇယိုဝ်းတၢႆမိူၼ်ၵၼ်၊ လွင်ႈၼႆႉပဵၼ်ႁွႆးမိုဝ်းၸုမ်းလႂ်ႁဵတ်းသၢင်ႈ လႄႈ ယွၼ်ႉသင်သေ ၸိူဝ်းၶဝ်သမ်ႉထုၵ်ႇၺႃးယိုဝ်းတၢႆၼႆၼၼ်ႉ ဢမ်ႇလႆႈႁူႉၸွမ်း” ဝႃႈၼႆ။

ၼႂ်းလိူၼ် September 2022 ၼႆႉ မီး 30 ဝၼ်း လႄႈ ဝၼ်းတီႈဢၼ်ၵူၼ်းမိူင်းၼႂ်းပိုၼ်ႉတီႈ ဢမ်ႇထုၵ်ႇယိုဝ်းတၢႆၼၼ်ႉ တေမီးဝၼ်းထီႉ 9၊ 13၊ 14၊ 16၊ 22၊ 24၊ 27၊ 29၊ 30 သေ လိူဝ်ၼၼ်ႉၵူၼ်းမိူင်းၺႃးယိုဝ်းတၢႆၵူႈဝၼ်း ဝႃႈၼႆ။

တႆးလွတ်ႈလႅဝ်း

ၶေႃႈမုၼ်းတီႈ − Voice of Myanmar