ၵူၼ်းသိုၵ်းပျီႇတူႉၸိတ်ႉ 758 ၵေႃႉၼိုင်ႈ ၺႃးၶႃႈတၢႆ တီႈၼႂ်းၸႄႈဝဵင်းၶူဝ်လမ်

မိူဝ်ႈၼႂ်းဝၼ်းထီႉ 5 July 2022 (လိူၼ်ပႅတ်ႇမႂ်ႇ 8 ၶမ်ႈ ပီႊတႆး 2116 ၼီႈ) မီးၵူၼ်းဢမ်ႇႁူႉၸိုဝ်ႈ/ၸုမ်း ၶႃႈႁႅမ်ပႅတ်ႈ ၸၢႆးသႅင် ဢၼ်ယူႇၸွမ်းသိုၵ်းပျီႇတူႉၸိတ်ႉ 758 တီႈႁိမ်းၵွင်းမူးသၢၼ် တီႈဝဵင်းၶူဝ်လမ် (ၶူဝ်ၶမ်း) ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၵူၼ်းၼႂ်းပိုၼ်ႉတီႈလၢတ်ႈၼႄဝႃႈ “ၸၢႆးသႅင်ၼႆႉ ပဵၼ်ၵူၼ်းၸႃႇတီႉမိူင်းပၼ်ႇသေ မိူဝ်ႈဢွၼ်တၢင်းမၼ်းၸၢႆးယၢမ်ႈၶဝ်ႈယူႇ ၼႂ်းၸုမ်းပျီႇတူႉၸိတ်ႉ ပၢင်ႇလႅင်းသႂ်ဢေႃႈ ယၢမ်းလဵဝ်တႄႉမၼ်း ၶၢႆႉပၢႆႈ မႃးယူႇၸွမ်း ၸုမ်း758 တီႈၼမ်ႉႁူးၼႆၶႃႈဢေႃႈ၊ ငိၼ်းဝႃႈၸၢႆးသႅင်ၼႆႉ ပဵၼ်ပႃး လုၵ်ႈပီႈလုၵ်ႈၼွင်ႉ ၵၼ်တင်း ၸဝ်ႈတႃႉ ၸုမ်း 758 ၼမ်ႉႁူးၼႆၶႃႈ” လၢတ်ႈၼႄၼင်ႇၼႆ။

သိုပ်ႇလၢတ်ႈထႅင်ႈဝႃႈ “လွင်ႈပိူင်ပဵၼ် ဢၼ်ၸၢႆးသႅင် လႆႈၺႃးၶႃႈတၢႆၼႆႉ မိူဝ်ႈယၢမ်း 04:00 မူင်းပၢႆၼၼ်ႉ မီးၵူၼ်းထူဝ်းၽူင်းႁွင်ႉမၼ်း ႁႂ်ႈၵႂႃႇတီႈသူၼ်ၼႆဢေႃႈ ထိုင်ၶၢဝ်းယၢမ်းၵၢင်ၶမ်ႈ 8:00 မူင်းၼႆႉ ၵူၼ်းဝၢၼ်ႈ ၶဝ်လႆႈၵႂႃႇႁၼ် တူဝ်တၢႆမၼ်းၸၢႆး တီႈႁိမ်းသူၼ်မၼ်း ၵွင်းမူးသၢၼ်သေ ၵူၼ်းဝၢၼ်ႈၶဝ်ၸင်ႇၵႂႃႇပွင်ႇတီႈ ပလိၵ်ႈမၢၼ်ႈလႄႈ ၽၢႆႇပလိၵ်ႈမၢၼ်ႈၶဝ် လႆႈမႃးၵူတ်ႇထတ်းႁၼ်ဝႃႈ မၼ်းၸၢႆးထုၵ်ႇ ဢဝ်ၸိူၵ်ႈမတ်ႉမိုဝ်း မၼ်းဝႆႉသေ ဢဝ်မိတ်ႈထိူဝ်ၶေႃးမၼ်းၸၢႆးတၢႆထင်တီႈၼႆၶႃႈ။ လၢတ်ႈၼင်ႇၼႆ။

ဝၢႆးသေသိုၵ်းမၢၼ်ႈယိုတ်းမိူင်းမႃးၼႆႉ ၼႂ်းပိုၼ်ႉတီႈမိူင်းတႆးပွတ်းႁွင်ႇ၊ ပွတ်းၸၢၼ်း၊ ပွတ်းဢွၵ်ႇ ၵႆႉၵႆႉမီးလွင်ႈၶႃႈႁႅမ်ၵၼ်တၢႆ လႄႈၽူႈလၵ်ႉၵူၼ်းၸူၼ်ၸိူဝ်းၼႆႉၵေႃႈ လိူင်ႇၼမ်တႄႉတႄႉ ၼႆယဝ်ႉ။

တႆးလွတ်ႈလႅဝ်း