ၵူၼ်းႁၢႆႉဢဝ်မၢၵ်ႇပွမ်းပွႆႇသႂ်ႇၼႂ်းႁိူၼ်းၵူၼ်းမိူင်းၼမ်ႉၶမ်း

မိူဝ်ႈၼႆႉဝၼ်းထီႉ 18 October 2024 (လိူၼ်သိပ်းဢဵတ်းလွင်ႈ 1 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ် 08:00 မူင်း မီးၵူၼ်းႁၢႆႉ ဢဝ်မၢၵ်ႇပွမ်းၵႂႃႇပွႆႇသႂ်ႇ ႁိူၼ်းၵူၼ်းမိူင်းလင်ၼိုင်ႈ တီႈၼႂ်းပွၵ်ႉဢွင်ႇမျႅတ်ႉတႃႇ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မီးၵူၼ်းႁၢႆႉ 2 ၵေႃႉ ၶီႇလူတ်ႉၶိူင်ႈ လမ်းလဵဝ်ၵၼ်သေ ဢဝ်မၢၵ်ႇၵႂႃႇပွႆႇသႂ်ႇ ၼႂ်းႁိူၼ်းၵူၼ်းမိူင်းၸၢဝ်းၶႄႇ လႄႈ ၵၢမ်ႇလီ ၵူၼ်းၼႂ်းႁိူၼ်း ဢမ်ႇတၼ်းမီးၽႂ်လႆႈမၢတ်ႇၸဵပ်း၊ ႁိူၼ်းယေးတႄႉၺႃးၸၢၵ်ႇမၢၵ်ႇ လူႉသုမ်းၵွႆၼမ်ဝႆႉယူႇၶႃႈ၊ တီႈဝဵင်းၼမ်ႉၶမ်းၼႆႉ ပဵၼ်ၸုမ်းသိုၵ်း TNLA ၵုမ်းၵမ်ဝႆႉ ဝႃႈၼႆ။

ၵူၼ်းႁၢႆႉ 2 ၵေႃႉၼၼ်ႉ မိူဝ်ႈလဵဝ်ပၢႆႈလွတ်ႈဝႆႉလႄႈ ဢမ်ႇႁူႉဝႃႈပဵၼ်ၽႂ်ၸုမ်းလႂ်သေ ယွၼ်ႉသင် လႄႈ ဢဝ်မၢၵ်ႇၵႂႃႇပွႆႇသႂ်ႇႁိူၼ်း ၵူၼ်းမိူင်းၼႆၼၼ်ႉၵေႃႈ ဢမ်ႇပႆႇမီးၽႂ်ႁူႉၸွမ်း ၼႆယဝ်ႉ။

တႆးလွတ်ႈလႅဝ်း