ၵူၼ်းႁၢႆႉၶဝ်ႈပိုတ်းယိုဝ်းတီႈၼႂ်း ႁူင်းႁဵၼ်းၽၢၵ်ႇလႄႈ ႁဵတ်းႁႂ်ႈမီးၵူၼ်းလူႉတၢႆတင်းၼမ်

ၵူၼ်းႁၢႆႉၶဝ်ႈၵႂႃႇပိုတ်းယိုဝ်းလုၵ်ႈဢွၼ်ႇ တီႈၼႂ်းႁူင်းႁဵၼ်းၽၢၵ်ႇ ဢၼ်မီးၼႂ်း ၸႄႈတွၼ်ႈၼွင်ပူဝ်း လမ်းၽူး ၸိုင်ႈထႆး ႁဵတ်းႁႂ်ႈမီးၵူၼ်းလူႉတၢႆဢမ်ႇယွမ်း 36 ၵေႃႉ ဝႃႈၼႆ။

မိူဝ်ႈဝၼ်းထီႉ 6 October 2022 ၼၼ်ႉ မီးလွင်ႈပိုတ်းယိုဝ်း တီႈၼႂ်းႁူင်းႁဵၼ်းၽၢၵ်ႇတီႈၼိုင်ႈ ဢၼ်မီးၼႂ်းဢိူင်ႇဢူႇထႆႈသဝၼ် ၸႄႈဝဵင်းၼႃးၵၢင် ၸႄႈတွၼ်ႈၼွင်ပူဝ်းလမ်းၽူး ၸိုင်ႈထႆးသေ ႁဵတ်းႁႂ်ႈမီးၵူၼ်းလူႉတၢႆတီႈဢေႇသုတ်း 36 ၵေႃႉ ၼႂ်းၼၼ်ႉ ပဵၼ်လုၵ်ႈဢွၼ်ႇလဵၵ်ႉ 24 ၵေႃႉ၊ ၵူၼ်းလူင် 12 ၵေႃႉလႄႈ မၢတ်ႇၸဵပ်း 12 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈလၢတ်ႈတီႈသိုဝ်ႇၶၢဝ်ႇဝႃႈ လႆႈႁၼ်ၵူၼ်းၸၢႆးၵေႃႉ ၼိုင်ႈ ယိပ်းမိတ်ႈတင်းၵွင်ႈ ၶဝ်ႈၵႂႃႇတီႈၼႂ်းႁူင်းႁဵၼ်းၽၢၵ်ႇ မိူဝ်ႈယၢမ်းၵၢင်ဝၼ်း၊ ယွၼ်ႉၾူၼ်တူၵ်း သေ လုၵ်ႈဢွၼ်ႇၶဝ်ၵမ်ႈၽွင်ႈ ဢမ်ႇလႆႈမႃးႁူင်းႁဵၼ်း လႄႈ တီႈၼႂ်းႁူင်းႁဵၼ်းၽၢၵ်ႇၼၼ်ႉ တေမီး လုၵ်ႈဢွၼ်ႇယူႇမွၵ်ႈ 30 ၵေႃႉ ဢိၵ်ႇတင်း ၶူးဢၼ်ပႃးတွင်ႉလႆႈ 8 လိူၼ် ၼိုင်ႈၵေႃႉသေ ၵူၼ်းႁၢႆႉလႆႈ ယိုဝ်းၵွင်ႈ 4−5 ၵမ်း၊ မိူဝ်ႈတႄႇမၼ်း ၵူၼ်းႁိမ်းႁွမ်းသမ်ႉထၢင်ႇဝႃႈ ပိူၼ်ႈၸုတ်ႇမူၵ်ႇတႅၵ်ႇၵူၺ်း ဝႃႈၼႆ။

ဝၢႆးသေမၼ်းၸၢႆးယိုဝ်းလုၵ်ႈဢွၼ်ႇလဵၵ်ႉ လႄႈ ၶူး တီႈႁူင်းႁဵၼ်းၽၢၵ်ႇယဝ်ႉၼၼ်ႉ ၶိုၼ်းဝၢႆႇပွၵ်ႈမႃးတီႈႁိူၼ်းမၼ်းသေ လမ်းယိုဝ်းၵူၼ်းယူႇႁိမ်းႁွမ်းႁိူၼ်းမၼ်းၼၼ်ႉ လူႉတၢႆထႅင်ႈ 2 ၵေႃႉ သေဢမ်ႇၵႃး ၶႃႈႁႅမ်ပႃး လုၵ်ႈ လႄႈ မေးတူဝ်ၵဝ်ႇယဝ်ႉ မၼ်းၸၢႆးၶိုၼ်း ဢဝ်ၵွင်ႈယိုဝ်းၶႃႈတူဝ်တၢႆ ၼႆယဝ်ႉ။ ၽွင်းလုၵ်ႉတီႈႁူင်းႁဵၼ်းၽၢၵ်ႇသေ ပွၵ်ႈမႃးၶိုၼ်းတီႈႁိူၼ်း ၼၼ်ႉ ၸွမ်းသဵၼ်ႈတႃႈသၢႆတၢင်းၵေႃႈ မၼ်းၸၢႆးဢဝ်ၵႃးၽႃႇၵူၼ်းမၢတ်ႇၸဵပ်းတင်းၼမ် ၼႆယူႇယဝ်ႉ။

ၵူၼ်းႁၢႆႉၵေႃႉၼႆႉ ပဵၼ်ပလိၵ်ႈထႆး(ၵဝ်ႇ) ဢႃႇယု 34 ပီႊ ယွၼ်ႉပိူဝ်ႈမီး လွင်ႈၵဵဝ်ႇၶွင်ႈၸွမ်းယႃႈမဝ်းၵမ်းလႄႈ လႆႈထုၵ်ႇပူတ်းဢွၵ်ႇၼႂ်းၵၢၼ်ပဵၼ်ပလိၵ်ႈသေ ဢွၼ်တၢင်း မၼ်းၸၢႆး တေၶဝ်ႈၵႂႃႇပိုတ်းယိုဝ်း တီႈၼႂ်းႁူင်းႁဵၼ်းၽၢၵ်ႇ မိူဝ်ႈယၢမ်းၵၢင်ဝၼ်းၼၼ်ႉ မၼ်းၸၢႆး လႆႈၵႂႃႇၶိုၼ်ႈလုမ်းတြႃး တီႈၼႂ်းၸႄႈတွၼ်ႈၼွင်ပူဝ်းလမ်းၽူး မိူဝ်ႈယၢမ်းၵၢင်ၼႂ် ဝႃႈၼႆ။

ၵဵဝ်ႇလူၺ်ႈလွင်ႈပလိၵ်ထႆး(ၵဝ်ႇ) ၶဝ်ႈပိုတ်းယိုဝ်းလုၵ်ႈဢွၼ်ႇလဵၵ်ႉ တီႈၼႂ်းႁူင်းႁဵၼ်းၽၢၵ်ႇလႄႈ ႁဵတ်းႁႂ်ႈမီးၵူၼ်းလူႉတၢႆ မၢတ်ႇၸဵပ်းတင်းၼမ်ၼႆႉ ႁဵတ်းႁႂ်ႈၵူၼ်းတင်းလုမ်ႈၾႃႉတူၵ်းၸႂ်ၵၼ် တေႉတေႉဝႃႈဝႃႈလႄႈ ၽူႈၼမ်းလၢႆလၢႆၸိုင်ႈမိူင်းၵေႃႈ လႆႈဢွၵ်ႇမႃးမွင်ၸႂ်ၸွမ်းပေႃႈမႄႈပီႈၼွင်ႉ ၸိူဝ်းၵိုတ်းတၢင်းလင် ယူႇယဝ်ႉ။

တႆးလွတ်ႈလႅဝ်း