ၵေႃၵမ်ၵၢၼ်ပွင်သၢင်ႈလွင်ႈငမ်းယဵၼ် (PMC) RCSS ဢဝ်ၶိူင်ႈၵမ်ႉၵႅမ် ပၢႆးယူႇလီ ဢၢပ်ႈပၼ်ၽူႈၵဵဝ်ႇၶွင်ႈ ၼႂ်း လၢႆလၢႆၸႄႈဝဵင်း

ၵေႃၵမ်ၵၢၼ်ပွင်သၢင်ႈလွင်ႈငမ်းယဵၼ် (PMC) RCSS လႄႈ ၸုမ်းတူင်ႇဝူင်းၵူၼ်း ႁူမ်ႈမိုဝ်းၵၼ်သေ  ဢဝ်ၶိူင်ႈၵမ်ႉၵႅမ် ပၢႆးယူႇလီ တႃႇႁႄႈၵင်ႈ  COVID-19 သူင်ႇထိုင်ပၼ် ပေႃႈမႄႈၵူၼ်းမိူင်း လႄႈ ၽၢႆႇပၢႆးယူႇလီ လူင်ပွင်ၸိုင်ႈ လၢႆလၢႆၸႄႈဝဵင်း ၼႂ်းၸိုင်ႈတႆး။

မိူဝ်ႈဝၼ်းထီႉ 09−11 April 2020 (လိူၼ် 5 လွင်ႈ 2 ၶမ်ႈ − 4 ၶမ်ႈ ပီႊတႆး 2114 ၼီႈ) ၶုၼ်သိုၵ်းလူင် ၶမ်းသိူဝ်း လႆႈႁပ်ႉပုၼ်ႈၽွၼ်း ဢွၼ်ႁူဝ်လုၵ်ႈၸုမ်း လႄႈ ၸုမ်းတူင်ႇဝူင်းၵူၼ်းသေ ဢဝ်ၽႃႈတူမ်းသူပ်း (Mask) ၊ ၼမ်ႉယႃလၢင်ႉမိုဝ်း ၊ ၶိူင်ႈၵမ်ႉၵႅမ် ပၢႆးယူႇလီ တႃႇႁႄႈၵင်ႈ COVID-19 ၸိူဝ်းၼႆႉ ဢဝ်ဢၢပ်ႈပၼ်တီႈ ၽူႈမီးပုၼ်ႈၽွၼ်းၽၢႆႇလူင်ပွင်ၸိုင်ႈ၊ ဢိၵ်ႇတင်း ၵေႃႇမတီႇ ၵႅတ်ႇၶႄႁႄႉၵင်ႈတၢင်းပဵၼ် COVID-19 (မၢင်တီႈမီးၸုမ်းၵူၼ်းၼုမ်ႇတႆး TYO၊ မေႃယႃ ၽၢႆႇပၢႆးယူႇလီ လူင်ပွင်ၸိုင်ႈ၊ ၽၢႆႇဢုပ်ႉပိူင်ႇ လူင်ပွင်ၸိုင်ႈ၊ ပလိၵ်ႈမၢၼ်ႈ ၊ ၽူႈယႂ်ႇၵူၼ်းလူင် ၼႂ်းပွၵ်ႉ ၶဝ်ႈပႃးဝႆႉ) ၼႆယဝ်ႉ။

ၼႂ်းၸႄႈဝဵင်းဢၼ် ၶုၼ်သိုၵ်းလူင် ၶမ်းသိူဝ်း ဢွၼ်ႁူဝ်လုၵ်ႈၸုမ်းသေ ဢဝ်ၶိူင်ႈၵမ်ႉၵႅမ်ပၢႆးယူႇလီ ဢၢပ်ႈပၼ် တီႈၽူႈမီးပုၼ်ႈၽွၼ်းၽၢႆႇလူင်ပွင်ၸိုင်ႈ လႄႈ ၵေႃႇမတီႇၵႅတ်ႇၶႄႁႄႉၵင်ႈတၢင်းပဵၼ် COVID- 19 ၼၼ်ႉ ပဵၼ်တီႈဝဵင်း လၢႆးၶႃႈ ၊ လွႆလႅမ် ၊ ၼမ်ႉၸၢင် ၊ ၵေးသီး ၊ ပၢင်လူင် ၊ မိူင်းၵိုင် ၊ မိူင်းၼွင် ၊ မိူင်းသူႈ ၊ မူင်းပွၼ် ၊ ၼႂ်းဢိူင်ႇဝၢၼ်ႈၸိင်း ၸႄႈဝဵင်းမိူင်းၼွင်သေ မီးပေႃႈမႄႈၵူၼ်းမိူင်း၊ ၽူႈမီးပုၼ်ႈၽွၼ်းမၢၼ်ႈ၊ ၸုမ်းႁဵတ်းၵၢၼ်မိူင်း (ပႃႇတီႇ) ဢိၵ်ႇတင်း  မေႃယႃၽၢႆႇပၢႆးယူႇလီ လူင်ပွင်ၸိုင်ႈ ပႂ်ႉႁပ်ႉတွၼ်ႈ ဢဝ်ၶူဝ်းၶွင် လႄႈ တူင်ႉတၵ်ႉ မႂ်ႇသုင် ဢုပ်ႇဢူဝ်းၵၼ် ဝႃႈၼႆ။

ၼႂ်း 9 ၸႄႈဝဵင်း 10 ဢွင်ႈတီႈၼၼ်ႉ ၶုၼ်သိုၵ်းလူင် ၶမ်းသိူဝ်း လႆႈမွၵ်ႇလၢတ်ႈၶေႃႈၵႂၢမ်းၵႂႃႇဝႃႈ− ၸွမ်းလူၺ်ႈ ၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းထိုင် ၼႂ်းမိူင်းႁူမ်ႈတုမ်ယဝ်ႉလႄႈ ယူႇတီႈမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆးၵေႃႈ မႆႈၸႂ်ၵူၼ်းမိူင်းသေ ဝႆႉၼမ်ႉၼၵ်းၼိူဝ်ၵူၼ်းမိူင်း လႄႈ လႆႈၶွတ်ႇၽွတ်ႈ ၵေႃႇမတီႇ တႃႇၵႅတ်ႇၶႄႁႄႉၵင်ႈတင်းပဵၼ် COVID-19 သေ ၶတ်းၸႂ်ႁဵတ်းသၢင်ႈၵႂႃႇ ၼင်ႇၵႃႈ ပွင်ပဵၼ်ႇလႆႈယူႇ ၊ တႃႇတေႁႂ်ႈပေႃးၸၢင်ႈၸွႆႈထႅမ်ၵူၼ်းမိူင်း ႁဝ်းၶႃႈၼႂ်းဝဵင်းၼၼ်ႉၵေႃႈ ယူႇတီႈၵေႃၵမ်ၵၢၼ် ပွင်သၢင်ႈလွင်ႈငမ်းယဵၼ် (PMC) RCSS လႆႈႁူမ်ႈမိုဝ်းတင်း ၸုမ်းတူင်ႇဝူင်းၵူၼ်းလႄႈ ၽူႈမီးၼမ်ႉၸႂ် ၸေႇတၼႃႇၶဝ်သေ ႁူမ်ႈၵၼ်ၶိုင်ပွင်ႁဵတ်းသၢင်ႈၵႂႃႇယူႇယဝ်ႉ− ဝႃႈၼႆ။

ၼႂ်းဝၼ်းထီႉ 10 April 2020 (လိူၼ် 5 လွင်ႈ 3 ၶမ်ႈ ပီႊတႆး 2114 ၼီႈ) ၸဝ်ႈၸၢႆးၸိုၼ်ႈ ၽူႈၵွၼ်းလုမ်းၵပ်းသၢၼ် လူင်ပွင်ၸိုင်ႈ RCSS ဝဵင်းမိူင်းပၼ်ႇၵေႃႈ လႆႈဢဝ် ၶိူင်ႈၵမ်ႉၵႅမ် ပၢႆးယူႇလီ တႃႇႁႄႉၵင်ႈတၢင်းပဵၼ် COVID-19 ဢၼ်ၵေႃၵမ်ၵၢၼ်ပွင်သၢင်ႈလွင်ႈငမ်းယဵၼ် (PMC) RCSS သူင်ႇၵႂႃႇၼၼ်ႉ ၶိုၼ်းဢၢပ်ႈပၼ်တီႈၼႂ်းမိုဝ်း မေႃယႃ ၽၢႆႇပၢႆးယူႇလီ လူင်ပွင်ၸိုင်ႈ လႄႈ ၽူႈၵဵဝ်ႇၶွင်ႈၸုမ်းႁဵတ်းၵၢၼ်လုမ်း လူင်ပွင်ၸိုင်ႈ တီႈဝဵင်းမိူင်းပၼ်ႇ၊ မိူင်းၼၢႆး ၊ မိူင်းတူၼ် ၊ မွၵ်ႇမႆႇ ၊ လၢင်းၶိူဝ်း ၼႆယဝ်ႉ။

ဝၼ်းထီႉ 10 April 2020 (လိူၼ် 5 လွင်ႈ 3 ၶမ်ႈ ပီႊတႆး 2114 ၼီႈ) ၼင်ႇၵဝ်ႇ ၸဝ်ႈတေႇဝိင်ႇ ၽူႈၵွၼ်းလုမ်းၵပ်းသၢၼ် လူင်ပွင်ၸိုင်ႈ RCSS ဝဵင်းၶူဝ်လမ် ၵေႃႈ ဢွၼ်ႁူဝ်လုၵ်ႈၼွင်ႉသေ ဢဝ်ၶိူင်ႈၵမ်ႉၵႅမ် ပၢႆးယူႇလီ တႃႇႁႄႉၵင်ႈၸိူဝ်ႉမႅင်းတၢင်းပဵၼ် COVID-19 ဢၼ်ၵေႃပွင်သၢင်ႈလွင်ႈငမ်းယဵၼ် (PMC) RCSS သူင်ႇၵႂႃႇၼၼ်ႉ ဢၢပ်ႈပၼ်တီႈ ၵေႃႇမတီႇ ၵႅတ်ႇၶႄႁႄႉၵင်ႈတၢင်းပဵၼ် COVID-19 လူင်ပွင်ၸိုင်ႈ တီႈဝဵင်းၵႃႇလိ လႄႈ ဝဵင်းၵုၼ်ႁဵင် မိူၼ်ၵၼ်။

တီႈၼႂ်းၸိုင်ႈတႆးပွတ်းဢွၵ်ႇၶူင်းၵေႃႈ ယူႇတီႈၽူႈမီးပုၼ်ႈၽွၼ်း ၵေႃပွင်သၢင်ႈလွင်ႈငမ်းယဵၼ် (PMC) RCSS လႆႈဢဝ်ၶိူင်ႈၵမ်ႉၵႅမ် ပၢႆးယူႇလီ တွၼ်ႈတႃႇႁႄႉၵင်ႈတၢင်းပဵၼ် COVID-19 သူင်ႇၵႂႃႇတီႈ လုမ်းၵပ်းသၢၼ် လူင်ပွင်ၸိုင်ႈ RCSS ဝဵင်းၵဵင်းတုင် လႄႈ ယူႇတီႈ ၽူႈမီးပုၼ်ႈၽွၼ်း လုမ်းၵပ်းသၢၼ် လူင်ပွင်ၸိုင်ႈ RCSS ဝဵင်းၵဵင်းတုင် တေသိုပ်ႇၸွႆႈထႅမ်ပၼ် တီႈဝဵင်းၵဵင်းတုင် ၊ မိူင်းပဵင်း ၊ တႃႈၶီႈလဵၵ်း လႄႈ တီႈမိူင်းတူၼ်ၵေႃႈ လုမ်းၵပ်းသၢၼ် လူင်ပွင်ၸိုင်ႈ RCSS ဝဵင်းမိူင်းတူၼ် လႆႈယိုၼ်ႈဢၢပ်ႈပၼ်တီႈ ႁူင်းယႃၵူၼ်းမိူင်း ဝဵင်းမိူင်းတူၼ် ဝႃႈၼႆ။

လိူဝ်ၼၼ်ႉ လႆႈႁူႉၸွမ်းထႅင်ႈဝႃႈ ႁူင်းယႃလူင်ပွင်ၸိုင်ႈၵေႃႈ မီးလွင်ႈႁၢင်ႈႁႅၼ်းဝႆႉပႃး ႁွင်ႈယႃလမ်ႇလွင်ႈ တႃႇတမ်းဝၢင်းၽူႈတိတ်းၸပ်းၸိူဝ်ႉမႅင်း တၢင်းပဵၼ် COVID-19 ဝႆႉယူႇသေတႃႉ ၵမ်ႉၼမ်ၶိူင်ႈၵမ်ႉၵႅမ် ဢမ်ႇပႆႇတဵမ်ထူၼ်ႈ။

ၼႂ်းဝၼ်းထီႉ 08-10 April 2020 (လိူၼ် 5 လွင်ႈ 1 ၶမ်ႈ − လိူၼ်ႁႃႈလွင်ႈ 3 ၶမ်ႈ ပီႊတႆး 2114 ၼီႈ) ၸုမ်းၵူၼ်းၼုမ်ႇတႆး ဝဵင်းပၢင်ႇသၢႆး ဢွၼ်ႁူဝ်တုင်းလူႇၶၢမ်ႇငိုၼ်းတွင်း တီႈၽူႈမီးၼမ်ႉၸႂ်ၸေႇတၼႃႇ၊ ၸုမ်းႁဵတ်းၵၢၼ်တူင်ႇဝူင်းၵူၼ်း၊ SSPP၊ RCSS ယဝ်ႉသေ ၶိုၼ်းသိုပ်ႇသိုဝ်ႉ ၽႃႈတူမ်းသူပ်း ၊ ၼမ်ႉယႃလၢင်ႉမိုဝ်း၊ ၶိူင်ႈတႅၵ်ႈလူမ်းမႆႈ၊ ထူင်မိုဝ်း ၸိူဝ်းၼႆႉတင်းၼမ်သေ ၸႅၵ်ႇပၼ်ၵူၼ်းမိူင်းၼႂ်းပိုၼ်ႉတီႈ ၸႄႈဝဵင်းပၢင်ႇသၢႆး။

ဝၼ်းထီႉ 11 April 2020 (လိူၼ် 5 လွင်ႈ 4 ၶမ်ႈ ပီႊတႆး 2114 ၼီႈ) ၸုမ်းၵူၼ်းၼုမ်ႇတႆး ဝဵင်းမူႇၸေႊ ဢွၼ်ႁူဝ်ၼမ်းၼႃႈသေ ဢဝ်ၽႃႈပူၵ်းသူပ်း ၸႅၵ်ႇပၼ် ပေႃႈမႄႈၵူၼ်းမိူင်း ၸွမ်းႁိမ်းႁွမ်း ဝဵင်းမူႇၸေႊ လႄႈ ၽူႈမီးပုၼ်ႈၽွၼ်း လုမ်းၵပ်းသၢၼ်ပၢႆးမၢၵ်ႈမီး RCSS ဝဵင်းမူႇၸေႊၵေႃႈ လႆႈၵႂႃႇၶဝ်ႈႁူမ်ႈၸွႆႈထႅမ် ႁဵတ်းသၢင်ႈမိူၼ်ၵၼ်။

ၼင်ႇႁိုဝ် ပေႃႈမႄႈၵူၼ်းမိူင်း ပေႃးတေၸၢင်ႈလႆႈၵူတ်ႇထတ်း ပၢႆးယူႇလီ လႄႈ လႆႈထွမ်ႇၵႂၢမ်းႁူႉ ၵဵဝ်ႇလူၺ်ႈၸိူဝ်ႉမႅင်းတၢင်းပဵၼ် COVID-19 ၼၼ်ႉ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး တေႁူမ်ႈမိုဝ်း ၽူႈၵဵဝ်ႇၶွင်ႈ လၢႆၽၢႆႇလၢႆတၢင်းသေ ၶတ်းၸႂ်ႁဵတ်းသၢင်ႈၶိုင်ပွင်ၵႂႃႇ ၸွမ်းၼင်ႇပွင်ပဵၼ်လႆႈ လႄႈ ၸွမ်းၼင်ႇၶဝ်ႈထိုင်လႆႈ ၼႂ်းပိုၼ်ႉတီႈ ၼၼ်ႉယူႇယဝ်ႉ။

တႆးလွတ်ႈလႅဝ်း